ޕޯޓް އޯ ޕްރިންސް، ހެއިޓީ (އޯގަސްޓު 18) - މިދިޔަ ހޮނިހިރު ދުވަހުގެ ރޭ ހެއިޓީ އަށް އައި 7.2 މެގްނިޓިއުޑްގެ ބިން ހެލުމުގައި މަރުވި މީހުންގެ އަދަދު 1،941 އަށް އަރައިފި އެވެ.
ކެރީބިއަން ސަރަހައްދުގައި އޮންނަ ހެއިޓީގެ ސިވިލް ޕްރޮޓެކްޝަން އެޖެންސީން ބުނީ އަނިޔާވި މީހުންގެ އަދަދު 9،900 އަށް އަރާފައިވާ ކަމަށެވެ. އޭގެ އިތުރުން 60،000 ގެ ބިމާ ހަމަވެފައިވާ ކަމަށާއި 76،000 ގެޔަށް ގެއްލުން ލިބުނު ކަމަށް އެ އިދާރާއިން ބުންޏެވެ.
ބިންހެލުން އައިސްފައި ވަނީ ތޮއްޖެހިފައިވާ ވެރިރަށް، ޕޯޓް އޯ ޕްރިންސްގެ 160 ކިލޯމީޓަރު ހުޅަނގުންނެވެ.
އެ ހާދިސާގައި ގެދޮރު ގެއްލިފައިވާ އެތައް ހާސް މީހުންނަށް އިތުރު ހިތާމަޔާ ކުރިމަތިވީ ގަދަ ވަޔާއި ބޯ ވާރެއާ އެކު ތޫފާން ގްރޭސް އެރުމުންނެވެ.
އެމެރިކާގެ ނޭޝަނަލް ހަރިކޭން ސެންޓަރުން ވަނީ ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތައް ހިނގާފާނެ ކަމުގެ އިންޒާރު ދީފަ އެވެ.
ދެހާސް ދިހަ ވަނަ އަހަރު އައި 7.0 މެގްނިޓިއުޑްގެ ބިން ހެލުމުގައި ވެރިރަށް ޕޯޓް އޯ ޕްރިންސް އާއި ކައިރި އެހެން ސިޓީތައް އެއްކޮށް ބިމާ ހަމަވި އެވެ. އެ ފަހަރު 200،000 މީހުން މަރުވެ، 300،000 އަށް ވުރެ ގިނަ މީހުންނަށް އަނިޔާވި އެވެ.
އެ ގައުމަށް އަނެއްކާވެސް ބޮޑު ބިންހެލުމެއް އައިސްފައި ވާއިރު މީގެ މަހެއްހާ ކުރިން ބަޔަކު ދިން ހަމަލާއެއްގައި ރައީސް ޖޮވެނެލް މޮއިޒް ވަނީ އަވަހާރަކޮށްލާފަ އެވެ. ފަގީރުކަމާއި ގޭންގު ހަމަނުޖެހުން އިންތިހާއަށް އޮތް ހެއިޓީގެ ކޮވިޑުގެ ހާލަތު ވެސް ގޯހެވެ.
ހޮނިހިރު ދުވަހުގެ ބިން ހެލުމަށް ފަހު އެމެރިކާ އިން ވަނީ 15.4 ޓަނުގެ ކާބޯތަކެތީގެ އެހީ ހެއިޓީ އަށް ފޮނުވާފަ އެވެ. މެކްސިކޯ އިން ވަނީ ބޯފެނާއި ބޭހުގެ އެހީ ފޮނުވާފަ އެވެ.
