ދޯހާ، ގަތަރު (އޯގަސްޓު 17) - އަފްގާނިސްތާނުގެ އަންހެނުންނާއި އަންހެން ކުދިން މޫނު އެއްކޮށް ނިވާކޮށްގެން ބުރުގާ އެޅުން މަޖުބޫރު ނުކުރާނެ ކަމުގެ އިޝާރާތެއް ތާލިބާނުން ދީފި އެވެ.
މީގެ ކުރިން 1996 އިން 2001 އަށް ތާލިބާނުން ހިންގި ވެރިކަމުގައި އަންހެނުންނަށް މަޖުބޫރު ކުރީ މޫނު އެއްކޮށް ނިވާވާ ފަދަ ބުރުގާ އެޅުމަށެވެ. އެފަދަ ބުރުގާގައި އަންހެން މީހާ އަށް ފެންނަ ގޮތް ހެދުމަށް ލޮލާ ދިމާލުގައި ހަރުކޮށްފައި ހުންނަނީ ތުނި ފޮތިކޮޅެކެވެ.
ތާލިބާނުން ކުރިން ވެރިކަން ކުރިއިރު އެ މީހުން ވަނީ އަންހެނުން ވަޒީފާ އަދާ ކުރުން މަނާކޮށް، އަންހެން ކުދިންގެ ސްކޫލުތައް ބަންދުކޮށްފަ އެވެ.
"ހިޖާބުގެ ގޮތުގައި އޮތީ މޫނު އެއްކޮށް ނިވާ ކުރުން އެކަންޏެއް ނޫން، އެކި ބާވަތުގެ ހިޖާބު އެބަވޭ،" ދޯހާގައި ހުންނަ ތާލިބާނުންގެ ސިޔާސީ އޮފީހުގެ ތަރުޖަމާނު ސުހެއިލް ޝަހީން ސްކައި ނިއުސް އަށް ބުންޏެވެ.
ނަމަވެސް ތާލިބާނުން ބަލައިގަންނާނީ ކޮން ބާވަތްތަކެއްގެ ހިޖާބު ކަމެއް އޭނާ ހާމައެއް ނުކުރެ އެވެ.
ތާލިބާނުންގެ ވެރިކަމުގައި އަންހެނުން ހެދުން އަޅާ ގޮތުގެ އިތުރުން އަންހެނުންގެ ތައުލީމަށް ވާނެ ގޮތަކާ މެދު އެކި ގައުމުތަކާއި ޖަމިއްޔާތަކުން ވަނީ ކަންބޮޑުވުން ފާޅުކޮށްފަ އެވެ.
ތައުލީމަށް އިޝާރާތްކޮށް، ޝަހީން ބުނީ އަންހެނުން ތައުލީމް ހާސިލް ކުރަން ހުރަސް ނާޅާނެ ކަމަށެވެ.
"ޕްރައިމަރީން ފެށިގެން މަތީ ތައުލީމަށް، އޭގެ މާނައަކީ ޔުނިވާސިޓީއާ ހަމައަށް ވެސް ކިޔެވޭނެ. ބައިނަލްއަގްވާމީ ކޮންފަރެންސްތަކުގައި ވެސް މި ސިޔާސަތު މިހެން އޮތްކަން ހާމަކޮށްފައި ވާނެ. މޮސްކޯ ކޮންފަރެންސާއި ދޯހާ ކޮންފަރެންސްގައި ވެސް،" ޝަހީން ބުންޏެވެ.
އޭނާ ބުނީ ތާލިބާނުން ކޮންޓްރޯލް ކުރާ ހިސާބުތަކުގައި ހުރި އެތައް ހާސް ސްކޫލުތަކެއް ބަންދުނުކޮށް އޮޕަރޭޓް ކުރަމުންދާ ކަމަށެވެ.
މީގެ ކުރިން ތާލިބާނުން ވެރިކަން ކުރިއިރު އާއްމުންގެ ދިރިއުޅުމުގެ ކަންކަން ބެލުމަށް "ދީނީ ފުލުހުން" ވެސް ގާއިމްކުރި އެވެ.
