ބެއިރޫތު، ލުބްނާން (އޯގަސްޓު 18) - ލުބްނާނަށް ދިމާވެފައިވާ ތެލުގެ ދަތިކަމާ ހެދި ހޮސްޕިޓަލްތަކުން ކަރަންޓު ކެނޑި، ބަންދުކުރަން ޖެހިދާނެ ކަމުގެ ބިރު ބޮޑުވެއްޖެ އެވެ.
އެކަމުގެ އަސަރު އެންމެ ބޮޑަށް ކޮށްފައި ވަނީ މި ހަފްތާގައި ތެޔޮ ޓޭންކަރެއް ގޮވައި 28 މީހުން މަރުވި އުތުރުގެ ސަރަހައްދަށެވެ. އުތުރު އައްކަރް ސަރަހައްދުގެ މަގުބައްތި އާއި ފޯނު ލައިންތަކުގެ ހިދުމަތް ވެސް ވަނީ ކެނޑިފަ އެވެ.
އައްކަރް ސަރަހައްދުގައި ހުންނަ އަލް ތްލެއިލް އަވަށުގައި މި ހަފްތާގައި ތެޔޮ ޓޭންކަރެއް ގޮވައި ގިނަ ބަޔަކު މަރުވިއިރު، އެ ސަރަހައްދުގެ ހޮސްޕިޓަލްތަކުގައި ފަރުވާ ދެވޭނެ ގޮތެއް ނެތި އަނިޔާވި މީހުން ގެންދަން ޖެހުނީ އެތައް ކިލޯމީޓަރެއް ދުރުގައި ހުރި ޓްރިޕޮލީގެ ހޮސްޕިޓަލަކަށެވެ.
މި އަހަރުގެ ހޫނު މޫސުން ފެށުމާއެކު ލުބްނާންގެ ހަ މިލިއަން މީހުންނަށް ތެލުގެ ދަތިކަން ދިމާވާން ފެށި އެވެ. ވޯލްޑް ބޭންކުން ބުނެފައި ވަނީ ލުބްނާނަށް ކުރިމަތިވެފައިވާ ހާލަތަކީ 19 ވަނަ ގަރުނުގެ ފަހުން ދުނިޔޭގެ ގައުމަކަށް އައި އެންމެ ބޮޑު އިގްތިސާދީ ކާރިސާ ކަމަށެވެ.
ޖެނެރޭޓަރުތަކަށް ބޭނުންވާ ޑީސެލް ތެޔޮ ނުލިބުމުގެ ސަބަބުން ވިޔަފާރިތަކާއި ހޮސްޕިޓަލްތަކާއި ގައުމުގެ އެންމެ ބޮޑު ޓެލެކޮމް އޮޕަރޭޓަރުގެ ހިދުމަތް ވެސް ވަނީ ލިމިޓުކުރަން މަޖުބޫރުވެފަ އެވެ. ލުބްނާންގައި މިހާރު ދުވާލަކު 22 ގަޑިއިރު ކަރަންޓު ނުލިބެ އެވެ.
އާދީއްތަ ދުވަހު ތެޔޮ ޓޭންކަރު ގޮވި އައްކަރް ސަރަހައްދުގެ ހޮސްޕިޓަލްތަކުގައި ގަބުރުތައް ރައްކާކޮށްފައި ހުރިއިރު، ކަރަންޓު ގޮސް، އިންޓަނެޓާއި ފޯނުގެ ހިދުމަތް ކެނޑިފައި ވާތީ ސިއްހީ އޮފިޝަލުން ދަނީ ހާލަތު ރަނގަޅު ކުރުމަށް އެދި އާދޭސް ކުރަމުންނެވެ.
"އަޅުގަނޑުމެންގެ އަތުގައި ހުރީ 700 ލީޓަރުގެ ޑީސެލް ސްޓޮކެއް. އޭގެން ވާނީ އެންމެ ދުވަހަކަށް،" އައްކަރް ސަރަހައްދުގައި ހުންނަ ހަލްބާ އަވަށުގެ ރަހަލް ހޮސްޕިޓަލުގެ ޑިރެކްޓަރު ރިއާދް ރަހަލް ވިދާޅުވި އެވެ.
އެ ހޮސްޕިޓަލާ ކައިރީގައި ހުންނަ އެލް ޔޫސުފް ހޮސްޕިޓަލުގައި ވެސް ހުރީ ބުދަ ދުވަހުގެ ހެނދުނާ ހަމައަށް ބޭނުން ކުރެވޭ ވަރުގެ ޑީސެލް ސްޓޮކެއް އެކަންޏެވެ. އެ ތަނުގެ ޑިރެކްޓަރުގެ އެސިސްޓަންޓް، ނަތަލީން އެލް ޗާރް ވިދާޅުވީ ފޯނު ލައިންތަކުން ހިދުމަތް ނުލިބޭ ކަމަށެވެ.
"އިއްޔެ އިން ފެށިގެން ލޭންޑްލައިންތަކުން ހިދުމަތެއް ނުލިބޭ... އަޅުގަނޑުމެންނަށް ކުރެވުނުހާ މަސައްކަތެއް މި ކުރަނީ ޑީސެލް ލިބޭތޯ،" އޭނާ އޭއެފްޕީ އަށް ވިދާޅުވި އެވެ.
އޭނާ ވިދާޅުވީ ހޮސްޕިޓަލަށް ޑީސެލް ފޯރުކޮށްދޭ ސަޕްލަޔަރު ސްޓޮކް ފޮނުވުން ލަސް ކުރީ އުތުރު ލުބްނާންގެ ހައިވޭގައި ހަމަލާއެއް އަތުވެދާނެ ކަމުގެ ބިރަށް ކަމަށެވެ. ފަހަކަށް އައިސް އެ ހައިވޭގައި ގްރޫޕުތަކުން ނިކުމެ ޓޭންކަރުތަކަށް ހަމަލާ ދީ ތެޔޮ ސްޓޮކް ހިފެހެއްޓުމުގެ ހާދިސާތައް ދަނީ ހިނގަމުންނެވެ.
ލުބްނާންގެ ރަސްމީ ނޭޝަނަލް ނިއުސް އެޖެންސީ (އެންއެންއޭ) އިން ބުނީ ޑީސެލް ނުލިބި ކަރަންޓު ކެނޑެމުންދާތީ އޮގެރޯ ޓެލެކޮލް ޕްރޮވައިޑަރަށް ވަނީ އިންޓަނެޓާއި، ލޭންޑްލައިން އަދި މޮބައިލް ފޯނުގެ ހިދުމަތް ވެސް އައްކަރްގެ ބައެއް ހިސާބުތަކުން ކަނޑާލަން ޖެހިފައިވާ ކަމަށެވެ.
އެއާއެކު އެ ސަރަހައްދުގެ ބޭންކުތަކާއި، ވިޔަފާރިތަކާއި، ދައުލަތުގެ އިދާރާތަކުގެ ހިންގުން ވަނީ ހުއްޓުމަކަށް އައިސްފަ އެވެ.
އޮގެރޯ ކުންފުނީގެ ވެރިޔާ އިމާދް ކްރެއިދޭ ވިދާޅުވީ ހާލަތު ރަނގަޅު ނުވާ ނަމަ ގައުމުގެ އެހެން ސަރަހައްދުތަކުން ވެސް ހިދުމަތް ކަނޑާލަން މަޖުބޫރު ވާނެ ކަމަށެވެ.
ބެއިރޫތުގެ ދެކުނުގައި އޮންނަ ސަރަހައްދުތަކުގައި ޕެޓްރޯލް އެޅުމަށް ކިޔު ދަމާފައި އޮތް ގޭސް ސްޓޭޝަނެއްގައި ވަނީ ބަޑި ޖެހުމުގެ ހާދިސާއެއް ވެސް ހިނގާފަ އެވެ.
އެންއެންއޭ އިން ބުނީ ބަޑި ޖެހުމުގެ ހާދިސާގައި ބަޔަކަށް އަނިޔާވުމުން ސިފައިން ހަރަކާތްތެރިވާން ފަށާފައިވާ ކަމަށެވެ. ނަމަވެސް އިތުރު ތަފްސީލް ހާމަކޮށްފައެއް ނުވެ އެވެ.
ސެކިއުރިޓީ އޮފިޝަލަކު އޭއެފްޕީ އަށް ބުނީ އެ ހާދިސާ ހިނގީ ގޭސް ސްޓޭޝަނުގައި ގަވާއިދާ ހިލާފަށް ރައްކާކޮށްފައި ހުރި ޕެޓްރޯލް ސްޓޮކް ގެންދަން ސިފައިން މަސައްކަތް ކުރުމުން ކަމަށެވެ.
ބަޑި ޖެހި މީހުން ބުނީ ގަވާއިދާ ހިލާފަށް ޕެޓްރޯލް ސްޓޮކެއް ފޮރުވާފައި ހުރިކަން ސިފައިންނަށް އެނގުނީ ގޭސް ސްޓޭޝަނުގެ ވެރިޔާ އެކަން ރިޕޯޓު ކުރުމުން ކަމަށެވެ. އެހެންވެ، ބަދަލު ހިފުމުގެ ގޮތުން އެ ގޭސް ސްޓޭޝަނުގައި ރޯކޮށްލި އެވެ.
ސޯޝަލް މީޑިއާގައި ދައުރުވަމުންދާ ފޮޓޯ އާއި ވީޑިއޯތަކުން ފެންނަނީ ގްރޫޕަކުން މެޝިން ބަޑިތައް ބޭނުންކޮށްގެން ހަމަލާދޭ މަންޒަރެވެ.
ތެލުގެ ދަތިކަން ދިމާވުމާއެކު ޑިސްޓްރިބިއުޓަރުން ވަނީ ސްޓޮކް ހިފެހެއްޓުމަށް ފަހު އަގުބޮޑުކޮށް ވިއްކަން މަސައްކަތްކޮށްފަ އެވެ. އެއާއެކު ސިފައިން ގޭސް ސްޓޭޝަންތައް ބަލައި ފާސްކުރަން ފެށީ މިދިޔަ ހޮނިހިރު ދުވަހު އެވެ.
