އަންނަ އޮކްޓޫބަރު މަހު މާލޭގައި ބާއްވާ ސާފް ޗެމްޕިއަންޝިޕްގައި ވާދަނުކުރެވޭނެކަން ބޫޓާނުން ރަސްމީކޮށް އަންގައިފި އެވެ.
މި މަހުގެ ނުވަ ވަނަ ދުވަހު ބޭއްވި ސައުތު އޭޝިއަން ފުޓްބޯޅަ ފެޑެރޭޝަން (ސާފް)ގެ ބައްދަލުވުމުގައި ރާއްޖޭން މުބާރާތް ހޯސްޓް ކުރުމުގެ ބިޑް ކާމިޔާބު ކުރިއިރު، އެ ބައްދަލުވުމުގައި ބޫޓާނުން ވަނީ ސާފް ޗެމްޕިއަންޝިޕްގައި ބައިވެރިވުމާ މެދު ގޮތެއް ނިންމަން ވަގުތު ކޮޅެއް ދޭން އެދިފަ އެވެ.
ބޫޓާނުން މިހާރު ނިންމާފައިވަނީ އޮކްޓޫބަރު މަހު 1-15 އަށް މާލޭގައި ބާއްވަން ތާވަލުކޮށްފައިވާ ސާފް ޗެމްޕިއަންޝިޕްގައި ވާދަނުކުރާ ގޮތަށެވެ. އެއީ ކޮވިޑް-19ގެ ސަބަބުން ޒަރޫރީ ނޫން ކަންކަމުގައި ބޫޓާންގެ މީހުންނަށް މި ވަގުތު ދަތުރުކުރުމުގެ ހުއްދަ ނެތުމުންނެވެ.
މިހާތަނަށް 2003 ވަނަ އަހަރުން ފެށިގެން ބޭއްވި އަށް ސާފް ޗެމްޕިއަންޝިޕްގައި ވެސް ބޫޓާން ވާދަކުރި އެވެ. އެ ޓީމުގެ ނަތީޖާ އެންމެ ރަނގަޅީ 2008 ވަނަ އަހަރު ރާއްޖެ އާއި ސްރީ ލަންކާ ގުޅިގެން މުބާރާތް ހޯސްޓްކުރިއިރު އެވެ. އެ ފަހަރު ބޫޓާނުން ވަނީ ސެމީ ފައިނަލުގައި ކުޅެފަ އެވެ. އެ ޓީމު ބަލިވީ ގަލޮޅު ދަނޑުގައި ކުޅުނު ސެމީ ފައިނަލްގައި އިންޑިއާ އަތުން 2-1 އިންނެވެ.
ބޫޓާންގެ އިތުރުން މި ވަގުތު ފީފާގެ ސަސްޕެންޝަނެއްގައި އޮތް ޕާކިސްތާން ވެސް މި ފަހަރުގެ ސާފް ޗެމްޕިއަންޝިޕްގައި ނުކުޅޭނެ އެވެ.
ފަސް ގައުމުގެ މެދުގައި ކުރިއަށް އޮތް ސާފް ޗެމްޕިއަންޝިޕް ބާއްވާއިރު، މުބާރާތް ކުރިއަށްދާނީ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލް ކުޅޭ ގޮތަށެވެ. ލީގު ބުރަށް ގުރުއަތުލާން ފަސޭހަ ކުރުމުގެ ގޮތުން ގައުމުތައް ތަރުތީބުކުރާނީ މުބާރާތުގެ ޝެޑިއުލް ކަންކަން ނިންމާއިރު ފީފާ ރޭންކިން އޮންނަ ގޮތަށް ބަލައިގެންނެވެ.
މި މަހު 12 ވަނަ ދުވަހު ނެރުނު ފީފާގެ ރޭންކިން އަށް ބަލާއިރު، ސަރަހައްދުން ރޭންކިންގެ އެންމެ ކުރީގައި އޮތީ އިންޑިއާ އެވެ. އެ ޓީމު އޮތީ ދުނިޔޭގެ 105 ވަނައިގަ އެވެ. ރާއްޖެ އޮތީ ދުނިޔޭގެ 158 ވަނައިގަ އެވެ. ނޭޕާލް އޮތީ 168 ވަނައިގަ އެވެ. ބޫޓާން 187 ވަނައިގައި އޮތްއިރު، ބަންގްލަދޭޝް އޮތީ 188 ވަނައިގަ އެވެ. ޕާކިސްތާން 198 ވަނައިގައި އޮތްއިރު، ސްރީލަންކާ އޮތީ 205 ވަނައިގަ އެވެ.
އެންމެ ފަހުން ސާފް ޗެމްޕިއަންޝިޕް ބޭއްވީ 2018 ވަނަ އަހަރު ބަންގްލަދޭޝްގެ ޑާކާގަ އެވެ. މި ފަހަރުގެ ސާފް ޗެމްޕިއަންޝިޕަކީ ވެސް މިދިޔަ އަހަރު ބަންގްލަދޭޝްގައި ބާއްވަން ނިންމި މުބާރާތެކެވެ. އެކަމަކު، މި އަހަރަށް ފަސްކުރަން ޖެހުނީ މިދިޔަ އަހަރު ކޮވިޑް-19ގެ ހާލަތު ވަރަށް ބޮޑަށް ގޯސްވުމުންނެވެ.
ގިނަ މަސައްކަތްތަކެއް ކޮށްގެން މި އަހަރު ވެސް ބަންގްލަދޭޝްގައި މުބާރާތް ހޯސްޓްކުރަން ކުރި މަސައްކަތް ކާމިޔާބުވާ ގޮތެއް ނުވި އެވެ. އެންމެ ބޮޑަށް ދިމާވީ ކޮވިޑް-19 ގެ ހާލަތު އެ ގައުމުގައި ރަނގަޅުނުވުމުގެ މައްސަލަ އާއި ރަނގަޅު ސްޕޮންސަރެއް ހަަމަނުޖެހުމުގެ ކަންބޮޑުވުންތަކެވެ.
ބަންގްލަދޭޝްގައި މުބާރާތް ހޯސްޓް ކުރެވޭ ގޮތް ނުވުމުން ޖެހުނީ މުބާރާތް ބާއްވާނެ ގައުމެއް ކަނޑައަޅަން އަލުން ބިޑަށް ހުޅުވާލާށެވެ. އެންމެ ފުރަތަމަ ރާއްޖެ އާއި އިންޑިއާ އަދި ނޭޕާލުން މުބާރާތް ހޯސްޓްކުރަން ޝައުގުވެރިކަން ފާޅުކުރި ނަމަވެސް އިންޑިއާ އިން ރަސްމީކޮށް ބިޑް ނުކުރެ އެވެ. ރާއްޖޭން ބިޑް ކާމިޔާބުކުރީ ނޭޕާލާ ވާދަކޮށެވެ.
