ޕެރިސް، ފްރާންސް (އޯގަސްޓު 16) - އަފްގާނިސްތާނުގެ ވައިގެ ސަރަހައްދުން ދަތުރު ނުކުރުމަށް އެ ގައުމުގެ އޭވިއޭޝަން އޮތޯރިޓީން އެންގުމުން، ބައިނަލްއަގްވާމީ އެއާލައިންތަކުން އެ ސަރަހައްދާ ދުރަށް ޖެހިއްޖެއެވެ.
އަފްގާނިސްތާނުގެ ސިވިލް އޭވިއޭޝަން އޮތޯރިޓީން އެއާލައިންތަކަށް ނެރުނު ނޯޓިސްއެއްގައި ބުނީ ކާބުލްގެ ވައިގެ ސަރަހައްދުގެ ކޮންޓްރޯލް ސިފައިންނާ ހަވާލުކޮށްފައިވާ ކަމަށެވެ.
އެހެންކަމުން އެ ސަރަހައްދުން ދަތުރު ކުރަން ހަމަޖެހިފައިވާ ހުރިހާ ފްލައިޓެއް އެހެން މަގަކުން ދިޔުމަށް އެއާލައިންތަކަށް ގޮވާލާފައި ވެ އެވެ.
އަފްގާނިސްތާނުގެ ފުރިހަމަ ކޮންޓްރޯލް އާދީއްތަ ދުވަހު ތާލިބާނުން ނެގުމުން ގިނަ އެއާލައިންތަކުން ނިންމީ އެ ގައުމުގެ ވައިގެ ސަރަހައްދުން ދަތުރު ނުކުރުމަށެވެ.
އޮސްޓްރިއަން އެއާލައިންސް، ބްރަސެލްސް އެއާލައިންސް، ޔޫރޯވިންގްސް، ސްވިސް އަދި އެއާ ފްރާންސް ހިމެނޭ ލުފްތަންސާ ގްރޫޕުން ބުނީ މުއްދަތެއް ނެތް ގޮތަށް އަފްގާން ވައިގެ ސަރަހައްދަށް ނުވަންނަން ނިންމާފައިވާ ކަމަށެވެ.
އޭގެ ސަބަބުން ލުފްތަންސާ ގްރޫޕުން އިންޑިއާ އަށް ކުރާ ފްލައިޓުތައް އެއް ގަޑިއިރު ލަސްވާނެ ކަމަށް އަންގާފައި ވެ އެވެ. އަފްގާން ވައިގެ ސަރަހައްދަށް ނުވަންނަން ނިންމީ ފްލައިޓްތަކުގެ ރައްކާތެރިކަމަށްޓަކައި ކަމަށް ލުފްތަންސާ އިން ބުންޏެވެ.
އޭގެ އިތުރުން އެއާ ފްރާންސުން ބެންކޮކާއި، ހޯ ޗީ މިން ސިޓީ، ނިއު ދިއްލީ އަދި ސިންގަޕޫރަށް ކުރާ ދަތުރުތައް ވަނީ ރީރައުޓްކޮށްފަ އެވެ.
ބްރިޓިޝް އެއާވޭޒް އިން ނެރުނު ބަޔާނެއްގައި ބުނީ މި ވަގުތަށް އަފްގާން ވައިގެ ސަރަހައްދު ބޭނުން ކުރުން ހުއްޓާލާފައިވާ ކަމަށެވެ.
ސިންގަޕޫރު އެއާލައިންސުން ބުނީ އަފްގާނިސްތާނުގައި ހިނގަމުންދާ ކަންކަމަށް ރިއާޔަތް ކުރުމަށް ފަހު އެ ސަރަހައްދަށް ނުވަނުމަށް ނިންމާފައިވާ ކަމަށެވެ.
ވާޖިން އެޓްލާންޓިކުން ބުނީ އިސްލާމްއާބާދާއި، ލާހޯރު، މުމްބާއީ އަދި ނިއު ދިއްލީ އަށް ކުރާ ފްލައިޓުތައް ދާނީ އަފްގާން ވައިގެ ސަރަހައްދަށް ނުވަދެ ކަމަށެވެ. އަދި އެންމެ މުހިއްމު ކަމަކީ ކަސްޓަމަރުންގެ ރައްކާތެރިކަމާއި ސިއްހަތު ކަމަށް ބުންޏެވެ.
ވިހި އަހަރަށް ފަހު އަފްގާނިސްތާނުގެ ވެރިކަމަށް ތާލިބާނުން އައުމުން ހޯމަ ދުވަހު ވެރިރަށް ކާބުލްގެ އެއާޕޯޓުން ފެނުނީ ހިތްދަތި މަންޒަރެކެވެ.
އެތައް ހާސް އަފްގާން ރައްޔިތުން އެއާޕޯޓަށް ޖަމާވެ، އެމެޖެންސީގައި ފުރަމުން ދިޔަ ފްލައިޓުތަކުގައި ގައުމުން ދެވޭތޯ މަސައްކަތް ކުރި އެވެ.
އެމެރިކާ އިން ވަނީ އަފްގާނިސްތާނުގައި ތިބި އެމެރިކާ އެމްބަސީ މުވައްޒަފުންނާއި އެމެރިކާގެ އެހެން ރައްޔިތުން ރައްކާތެރިކަމާ އެކު އަނބުރާ ގައުމަށް ގެނައުމުގެ މަސައްކަތް ކުރުމަށް 6،000 ސިފައިން ކާބުލް އަށް ފޮނުވާފަ އެވެ.
އެމެރިކާ ރައްޔިތުންގެ އިތުރުން އެ ގައުމުން އަފްގާނިސްތާނުގައި ހިންގި އޮޕަރޭޝަނުގައި ތަރުޖަމާނުންނާއި އެހެން ވަޒީފާތަކުގައި އުޅުނު އަފްގާން ރައްޔިތުން ވެސް އެމެރިކާ އަށް ގެންދާނެ އެވެ.
ފްރާންސާއި، ޖަރުމަނު އަދި އޮސްޓްރޭލިއާ ހިމެނޭހެން އެހެން ގައުމުތަކުން ވެސް ވަނީ ރައްޔިތުން ބަލައި ޗާޓަރު ފްލައިޓުތައް ކާބުލް އަށް ފޮނުވާފަ އެވެ.
