ކޮލޮމްބޯ، ސްރީލަންކާ (އޯގަސްޓު 16) - ސްރީލަންކާގައި ކޮވިޑް ކޭސްތަކާއި މަރުތައް އިތުރުވެފައިވާ މި ދަނޑިވަޅުގައި އެ ބައްޔާ ދެކޮޅަށް ސިހުރު ހަދައި "ޖާދޫގެ ބޭސްތައް" ބުއިމަށް ހިތްވަރު ދިން ހެލްތު މިނިސްޓަރު އެ މަގާމުން ދުރުކޮށްފި އެވެ.
ރައީސް ގޮތަބަޔާ ރާޖަޕަކްސަގެ އޮފީހުން ވަނީ ހެލްތު މިނިސްޓަރުގެ މަގާމުން ޕަވިތްރާ ވަންނިއަރައްޗީ ދުރުކޮށް މީޑިއާ މިނިސްޓަރު ކެހެލިޔާ ރަމްބުކްވެއްލާ އަށް އެ މަގާމު ދީފަ އެވެ. ރަމްބުކްވެއްލާ އަކީ ސަރުކާރުގެ ތަރުޖަމާނުގެ މަގާމު ވެސް ފުރުއްވާ ބޭފުޅާ އެވެ.
ހެލްތު މިނިސްޓަރުކަމުން ދުރުކުރި ވަންނިއަރައްޗީ އަށް މިދިޔަ ޖެނުއަރީ މަހު ކޮވިޑް ޖެހި އައިސީޔޫގައި ފަރުވާ ދިނެވެ. ނަމަވެސް އޭނާ ފަހުން ވަނީ ސިހުރު ހަދާ މީހެއްގެ ކައިރިން ހޯދި "ޖާދޫގެ ބޭހެއް" ކޮވިޑާ ދެކޮޅަށް އާއްމުންގެ ތެރޭގައި ބޮއެ، އެކަން ޕްރޮމޯޓުކޮށްފަ އެވެ.
އޭގެ އިތުރުން 21 މިލިއަން މީހުން ދިރިއުޅޭ ލަންކާގައި ބަލިމަޑުކަން ނިމުމަކަށް އަންނާނީ "ހުރުމަތްތެރިވެގެންވާ" ފެން، ކޯރެއްގެ ތެރެއަށް އެޅުމުން ކަމަށް ފާދިރީއަކު ބުނުމުން، މިދިޔަ ނޮވެމްބަރު މަހު އޭނާ އެކަން ވެސް ކުރި އެވެ.
ކޮވިޑާ ގުޅޭ ތަފާސްހިސާބު އާއްމު ކުރުމުގައި އޮޅުވާލާކަން ފަޅާއެރުމުން މިދިޔަ ހަފްތާގައި ލަންކާގެ ހެލްތު މިނިސްޓްރީއަށް ވަރަށް ބޮޑަށް ފާޑުކިޔުން އަމާޒުވި އެވެ.
ހެލްތު މިނިސްޓަރުކަމުން ދުރުކުރި ނަމަވެސް ވަންނިއަރައްޗީ އަދިވެސް އިންނަވާނީ ކެބިނެޓު މެމްބަރެއްގެ ގޮތުގަ އެވެ. އެއީ ހެލްތުގެ ބަދަލުގައި މުހިއްމުކަން ކުޑަ، ޓްރާންސްޕޯޓުގެ މިނިސްޓަރުކަމަށް އޭނާ ކަނޑައަޅާފައި ވާތީ އެވެ.
މިދިޔަ ހަފްތާގައި ލަންކާގައި ކޮވިޑް ޖެހިގެން މަރުވާ މީހުންގެ އަދަދު ދުވާލަކު 150 އަށް ވުރެ މައްޗަށް ދިޔަ އެވެ. ކޮންމެ ދުވަހަކު 3،000 އަށް ވުރެ ގިނަ ކޭސް ދަނީ ފެންނަމުންނެވެ. ލޮކްޑައުން ކުރަން ސަރުކާރުން ދެކޮޅު ހެދި ނަމަވެސް، މިދިޔަ ހަފްތާގައި ވަނީ ފިޔަވަޅުތައް ހަރުކަށިކޮށްފަ އެވެ.
