ރައީސް އިބްރާހިމް މުހައްމަދު ސޯލިހަކީ އަދާލަތު ޕާޓީގެ މެމްބަރެއް ނޫން ކަމެއް ވެސް އެނގިވަޑައިނުގަންނަވާ ކަމަށް ދެންނެވީ އެމްޑީޕީއަށް ވުރެން މާބޮޑަށް އަދާލަތު ޕާޓީއަށް އިތުބާރު ކުރައްވައި އިސްކަން ދެއްވާތީ ކަމަށް ވިލުފުށީ ދާއިރާގެ މެމްބަރު ހަސަން އަފީފް މިއަދު ވިދާޅުވެއްޖެ އެވެ.
އަފީފްގެ މި ތުހުމަތު ރައީސަށް އަނެއްކާވެސް އަމާޒުކުރެއްވީ އެމަނިކުފާނަކީ, އެމްޑީޕީގެ އެންމެ އިސް ލީޑަރު ކަމަށާއި ވެރިކަމުގައި ދެމިހުންނަވަން ބޭނުންވަނީ ވެސް އެމްޑީޕީގެ މެޖޯރިޓީއާ އެކުގައި ކަަމަށް މިދިޔަ ބުރާސްފަތިދުވަހު ވިދާޅުވެފައި ވަނިކޮށެވެ. އަފީފް ދެއްކެވި ވާހަކަތަކަށް ނިސްބަތްކުރައްވައި ރައީސް ވިދާޅުވެފައި ވަނީ ޕާޓީގެ ސީނިއާ ބޭފުޅެއްގެ ގޮތުގައި ހުންނަވައި އަފީފް، އެމަނިކުފާނާ ގުޅޭ ގޮތުން ދެއްކެވި ވާހަކައިގެ ހަގީގަތް ބަލަން ޗެއާޕާސަން ހަސަން ލަތީފްގެ އަރިހުން އެދިވަޑައިގަތީ އެމްޑީޕީގެ މަސްލަހަތަށްޓަކައި ކަަމަށެވެ.
މިކަމުގައި އަފީފްގެ ހިތްހަމަނުޖެހުންތަކެއް ހުރި ކަމަށް ވާހަކަ ދެކެވިފައި ވަނިކޮށް "އަދަދު"އަށް މިއަދު ވިދާޅުވީ ރައީސް އެދިވަޑައިގަތް ގޮތަށް މައްސަލަ ބަލައިދޭން ޕާޓީގައި އޭނާ ވެސް އެދިވަޑައިގެންފައިވާނެ ކަމަށެވެ. އޭނާއަށް މައްސަލައަކަށް ވަނީ، އަފީފް ވިދާޅުވި ގޮތުގައި، އެމްޑީޕީއަށް ވުރެން އަދާލަތު ޕާޓީ އިސްކުރެއްވުމެވެ.
މި ވެރިކަމުގައި ހޯމް މިނިސްޓަރުކަން ކުރައްވާ އަދި ކޯލިޝަންގެ އެއް ލީޑަރު އިމްރާން އަބްދުﷲ ނިސްބަތްވެވަޑައިގަންނަވާ އަދާލަތު ހިމެނެނީ އެމްޑީޕީ އިސްވެ އޮވެ ރައީސް ސޯލިހްގެ ވެރިކަން އުފެއްދި ހަތަރު ޕާޓީގެ ތެރޭގަ އެވެ.
އަފީފް ތުހުމަތު ކުރެއްވި ގޮތުގައި އެމްޑީޕީއަށް ނުދެއްވާ އިސްކަން އަދާލަތަށް ދެއްވަ އެވެ. ތަފްސީލަށް އެދިވަޑައިގަތުމުން މިސާލެއް ދައްކަވަމުން ވިދާޅުވީ ރައީސް އެންމެ އިތުބާރު ކުރައްވާ މަގާމުގައި ހުންނެވީ އަދާލަތު ޕާޓީގެ ބޭފުޅެއް ކަމަށެވެ.
އަފީފް އިޝާރާތްކުރެއްވި ޗީފް އޮފް ސްޓާފްގެ މަގާމުގައި ހުންނެވީ ރައީސް ސޯލިހް ވެރިކަމަށް ގެންނެވި ކެމްޕޭންގައި އިސްކޮށް އުޅުއްވި އަދާލަތު ޕާޓީގެ ކުރީގެ ނައިބު ރައީސް އަލީ ޒާހިރެވެ.
"ދައުލަތް ހިންގުމުގެ އެންމެ މަތީ އޮފީހުގައި އެންމެ އިތުބާރު ކުރައްވާ އެ މަގާމަށް ކީއްވެތޯ އެމްޑީޕީގެ ބޭފުޅަކު ހަމަނުޖެއްސެވީ. ޕާޓީގައި ނެތީތޯ އެ މަގާމް އަދާކުރެއްވޭނެ ބޭފުޅެއް،" އަފީފް ސުވާލު ކުރެއްވި އެވެ.
ރައީސް އެންމެ އިތުބާރު ކުރައްވާ މަގާމުގައި ހުންނަވަން ވާނީ އަފީފް ގަބޫލުކުރައްވާ ގޮތުގައި އެމްޑީޕީގެ ބޭފުޅެކެވެ.
އެހެންވީމަ އަޅުގަނޑު މި ދަންނަވާ ވާހަކައަކީ އަދާލަތަށް އިތުބާރު ކުރައްވާ ސަބަބު ރައީސް ސާފުކޮށްދެއްވަން ޖެހެއޭ. --އަފީފް
އަފީފް ވިދާޅުވި ގޮތުގައި ކޯލިޝަންގައި ބޮޑު އަދި ރައީސް ސޯލިހް ވެރިކަމަށް ގެނައުމަށް އެންމެ ބުރަ މަސައްކަތްތަކެއް ވެސް ކުރީ އެމްޑީޕީންނެވެ. އެ ޕާޓީއަށް ވުރެން ގާތްކަން އެހެން ޕާޓީތަކަށް ބެހެއްޓެވުން ބަލައެއް ނުގަނެވޭ ކަަމަށް ވިދާޅުވި އެވެ.
ރައީސަކީ އެމްޑީޕީގެ އެންމެ އިސް ބޭފުޅާ ކަމަށާއި ޕާޓީގެ މަސްލަހަތަށް އިސްކަންދެއްވައި ދެމިހުންނަވާނީ ވެސް އެމްޑީޕީގައި ކަމަށް ރައީސް ވިދާޅުވެފައިވާ ކަމަށް ދެންނެވުމުން އަފީފް ވިދާޅުވީ "އަމަލުން އެކަން ދައްކަވަން ޖެހިވަޑައިގަންނަވާ" ކަަމަށެވެ.
މިދިޔަ ބުދަދުވަހު ރައީސް ބޭއްވި ނޫސްވެރިންގެ ބައްދަލުވުމުގައި, އަފީފުގެ މައްސަލަ ބަލަން އެންގެވި ސަބަބާ މެދު ނޫސްވެރިން ސުވާލު ކުރުމުން ވިދާޅުވީ އެމަނިކުފާނު ދެކެވަޑައިގަންނަވަނީ އެ ވާހަކައަކީ ޕާޓީގެ ތެރޭގައި ބައިބައިވުން އުފެދޭ ޒާތުގެ ވާހަކައެއް ކަމަށެވެ.
ޕާޓީ ތެރޭގައި ބައިބައިވުން އުފެދޭ ކަމެއް އައިމަ އަޅުގަނޑުޖެހޭނެ އެކަން ހައްލުކުރެވޭތޯ ބަލަން. ހާއްސަކޮށް އަފީފް ކަހަލަ ބޭފުޅެއް އެކަހަލަ ވާހަކައެއް ދެއްކެވީމަ އޭގެ ހަގީގަތް ހޯދަން،" ހަސަން އަށް ގުޅުއްވި ސަބަބު ތަފްސީލްކޮށްދެއްވަމުން ވިދާޅުވި އެވެ.
އެމްޑީޕީ އުފައްދަން ކުރި ފުރަތަމަ 40 ސޮއިގެ ތެރޭގައި ދެ ވަނަ އަށް އެމަނިކުފާނު ހިމެނިވަޑައިގަންނަވާ ކަން ފާހަގަކުރައްވަމުން ރައީސް ވިދާޅުވެފައި ވަނީ ސިޔާސީ ޕާޓީގައި މަސައްކަތް ކުރުމާއި ސިޔާސީ މަސައްކަތް ވެސް ފެށުނީ އެމްޑީޕީން ކަމަށެވެ.
"އަޅުގަނޑު ދެމިހުންނާނީވެސް އިރާދަކުރެއްވިއްޔާ، އެމްޑީޕީގައި،" ރައީސް ވިދާޅުވި އެވެ.
އަދާލަތުގެ ނުފޫޒު އެމަނިކުފާނަށް އޮތް ކަަމަށް ކުރައްވާ ތުހުމަތަށް ޖަވާބުދާރީވެވަޑައިގަންނަވަމުން ހަނދާންކޮށްދެއްވީ މި ވެރިކަން އުފެދިފައި އޮތް ގޮތެވެ. މިހާތަނަށް ހުރިހާ އިންތިހާބެއް ކާމިޔާބުވީ ވެސް ކޯލިޝަނަކުން ކަމަށާއި ރައްޔިތުން ވޯޓު ދިން ގޮތަށް ވެރިކަން ކުރެއްވުމަކީ އެއްވެސް ޕާޓީއެއްގެ ނުފޫޒު އޮތުން ކަމަަކަށް ގަބޫލުނުކުރައްވާ ކަމަށް ވިދާޅުވި އެވެ.
"އެހެންވީމާ، އަޅުގަނޑު ވެރިކަން ކުރަމުން ގެންދަންޖެހޭނީ މި ކޯލިޝަންގައި ހިމެނޭ ހުރިހާ ޕާޓީއެއްގެ މަޝްވަރާއާ އެކީގައި. އަޅުގަނޑުގެ މައްޗަކަށް އެއީ ހިންގާ ނުފޫޒެއް ނޫން. އަޅުގަނޑު މަޝްވަރާ ކުރަންޖެހޭ ކަންތައްތަކުގައި، އަދާލަތާ އެކީގައި ވެސް މަޝްވަރާ ކުރަންޖެހޭނެ. ޖުމްހޫރީ ޕާޓީއާ އެކީގައި ވެސް މަސައްކަތް ކުރަންޖެހޭނެ. ރައީސް މައުމޫން، މިހާރު ވެއްޖިއްޔާ، އެމްއާރުއެމްއާ އެކީގައިވެސް މަސައްކަތް ކުރަންޖެހޭނެ. އެމްޑީޕީއާ އެކީގައި ވެސް މަސައްކަތް ކުރަންޖެހޭނެ."
އަފީފް ދެއްކެވި ވާހަކަތައް ބަލައިދޭން ޕާލަމެންޓްރީ ގްރޫޕަށް ހުށަހަޅުއްވާފައިވާ ކަމަށް ހަސަން ލަތީފް ވިދާޅުވި ވާހަކަ ޕާލަމެންޓްރީ ގްރޫޕްގެ ލީޑަރު އަލީ އާޒިމް ދޮގުކުރެއްވި އެވެ. އޭނާ ވިދާޅުވީ މައްސަލަ ނުލިބޭ ކަމަށާއި ހުށަހެޅުއްވިއަސް ޕީޖީން ބެލުމުގެ ފުރުސަތެއް ވެސް ނެތް ކަަމަށެވެ.
