ކާބުލް، އަފްގާނިސްތާން (އޯގަސްޓު 16) - ލޭ އޮހޮރުވުމަށް ފުރުސަތު ނުދޭން ކަމަށް ވިދާޅުވެ އަފްގާނިސްތާނުގެ ރައީސް އަޝްރަފް ގަނީ ގައުމު ދޫކޮށް ވަޑައިގެންނެވުމާއެކު، 20 އަހަރުވީ ދިގު ހަނގުރާމައިން މޮޅުވެ، އަފްގާނިސްތާނުގެ ފުރިހަމަ ކޮންޓްރޯލް ތާލިބާނުންނަށް ލިބިއްޖެ އެވެ.
ކުޑަ ދުވަސްކޮޅެއްގެ ތެރޭގައި މުޅި އަފްގާނިސްތާން އެއްކޮށް ހިފައި ރޭ ދަންވަރު ހަނގުރާމަވެރިން ރިޔާސީ ގަނޑުވަރަށް ވަނުމާއެކު ވެރިރަށް ކާބުލްގައި ވަނީ ބިރުވެރިކަމާއި ކަންބޮޑުވުން އުފެދިފަ އެވެ.
ހޯމަ ދުވަހު ފަތިސްވުމާއެކު އެތައް ހާސް ބަޔަކު ވަނީ ކާބުލް ދޫކޮށް ދެވޭތޯ މަސައްކަތް ފަށާފަ އެވެ. ތާލިބާނުންގެ ހަރުކަށި ވެރިކަމެއްގައި އުޅެން ބޭނުން ނުވާ މީހުން ޖަމާވެ އެއާޕޯޓު އޮތީ ފުރިފަ އެވެ.
އާދީއްތަ ދުވަހު ގައުމު ދޫކޮށް ވަޑައިގެންނެވި ރައީސް ގަނީ ފޭސްބުކްގައި ކުރެއްވި ޕޯސްޓެއްގައި ވިދާޅުވީ "ކަނޑި އާއި ބަޑީގެ އިންސާފުން ތާލިބާނުން ކާމިޔާބު ހޯދާފައިވާ" ކަމަށެވެ.
ތާލިބާނުންގެ ކޯ ފައުންޑަރު އަބްދުލް ގަނީ ބަރާދަރް ވެސް ސޯޝަލް މީޑިއާގައި ޕޯސްޓު ކުރި ވީޑިއޯއެއްގައި ބުނީ އެ ގްރޫޕަށް ކާމިޔާބު ލިބިފައިވާ ކަމަށެވެ.
އެންމެ 10 ދުވަސް ތެރޭގައި ތާލިބާނުން ވަނީ އަފްގާނިސްތާނުގެ ހުރިހާ ބޮޑެތި ސިޓީތަކެއް ހިފައިފަ އެވެ. އެމެރިކާ ސިފައިންގެ އެހީތެރިކަން ނެތި، އަފްގާނިސްތާނުގެ ސިފައިން ވަނީ ހަތިޔާރު ބަހައްޓައި އަމާން ދީފަ އެވެ.
ތާލިބާނުން ބުނީ ބޭނުންވަނީ "ސުލްހަވެރިކަމާ އެކު ވެރިކަމުގެ ބާރުތައް ބަދަލު ކުރަން" ކަމަށެވެ. ތާލިބާނުން އަލުން ވެރިކަމަށް މި އަންނަނީ 20 އަހަރު ފަހުންނެވެ.
ނަވާރަ ސަތޭކަ ނުވަދިހަ ހަޔަކުން ފެށިގެން އޮތް ތާލިބާނު ވެރިކަން ވެއްޓުނީ ސެޕްޓެމްބަރު 11، 2001 ގެ ޓެރަރިސްޓު ހަމަލާތަކާ ގުޅިގެން އެމެރިކާ އިން އަފްގާނިސްތާނުގެ ފަސްގަނޑަށް އެރުމުންނެވެ.
