އިސްތަންބޫލް، ތުރުކީ (އޯގަސްޓު 15) - އެއް ފަހަރާ ގިނަ އަދަދެއްގެ އަފްގާނިސްތާނުގެ ރެފިއުޖީން އެހެން ގައުމުތަކަށް ހިޖުރަ ކުރުން ހުއްޓުވުމަށް ތުރުކީ އާއި ޕާކިސްތާން ގުޅިގެން މަސައްކަތް ކުރަން ނިންމައިފި އެވެ.
ތުރުކީގެ ރައީސް ތައްޔިބް އުރުދުގާން ވިދާޅުވީ އިރާން މެދުވެރިކޮށް ގިނަ އަދަދެއްގެ އަފްގާން ރެފިއުޖީން ތުރުކީ އަށް އަންނަމުންދާކަން ވަނީ ފާހަގަވެފަ އެވެ.
"އެ ސަރަހައްދަށް ހަމަޖެހުން ގެނައުމުގެ މަސައްކަތް އަޅުގަނޑުމެން ކުރާނަން. މަސައްކަތް ފަށާނީ އަފްގާނިސްތާނުން. އެކަން ކުރުމަށް އަޅުގަނޑުމެންނަށް ޖެހެނީ ޕާކިސްތާނާއެކު އޮތް ގުޅުން ވަރުގަދަ ކުރަން،" ޕާކިސްތާނުގެ ރައީސް އާރިފް އަލްވީއާ އެކު އުރުދުގާން ވިދާޅުވި އެވެ.
"މިކަން ކާމިޔާބު ކުރުމަށް ލިބެން ހުރި ހުރިހާ ވަސީލަތެއް ބޭނުން ކުރަން މި ތިބީ ތައްޔާރަށް."
ތުރުކީ އާއި ޕާކިސްތަނުން އެހެން ބުނެފައި ވާއިރު، އަފްގާނިސްތާނުގެ ރައީސް އަޝްރަފް ގަނީ ވަނީ ގައުމު ދޫކުރައްވާ އަވައްޓެރި ތަޖިކިސްތާނަށް ވަޑައިގެންފަ އެވެ.
ކާބުލް ވަށާލައިގެން ތިބި ތާލިބާނުން ބުނީ ބާރުތައް ސުލްހަވެރިކަމާ އެކު ބަދަލު ކުރުމުގެ މަސައްކަތް ކުރާނެ ކަމަށެވެ. އަފްގާނިސްތާނުގައި ތާލިބާނުން ބާރުގަދަވީ އެމެރިކާ ސިފައިން ފޭބުމުންނެވެ.
ތުރުކީ އާއި ޕާކިސްތާން ގުޅިގެން މަސައްކަތް ކުރަން ނިންމީ ޕާކިސްތާނުގެ ރައީސް އާރިފް މި ވަގުތު އިސްތަންބޫލަށް ކުރައްވަމުން ގެންދަވާ ދަތުރުފުޅެއްގަ އެވެ.
ތުރުކީގެ ސިފައިން ވެސް އަފްގާނިސްތާނުގައި އުޅޭއިރު، މި މަހު ފަހުކޮޅު އެމެރިކާ ސިފައިން އަފްގާނިސްތާނުން ފައިބާ ނިމުމުން، ކާބުލް އިންޓަނޭޝަނަލް އެއާޕޯޓުގެ ސެކިއުރިޓީ ބަލަހައްޓައި ދިނުމަށް ތުރުކީން ވަނީ އަމިއްލަ އަށް ހުށަހަޅާފަ އެވެ.
އޭގެ އިތުރުން މަޝްވަރާ ކުރުމަށް ތާލިބާން ލީޑަރުންނާ ބައްދަލުކުރުމަށް ވެސް ރައީސް އުރުދުގާން ހުށަހަޅުއްވާފައި ވެ އެވެ.
އަފްގާން ރެފިއުޖީން ތުރުކީއަށް އަންނަ މައްސަލަ ހޫނުވެ، އިދިކޮޅު ފަރާތްތަކުން އަންނަނީ ވަރުގަދަ ފިޔަވަޅުތައް އެޅުމަށް ސަރުކާރަށް ޕްރެޝަރު ކުރަމުންނެވެ.
އެގޮތުން ސަރުކާރުން ވަނީ އިރާނާ ގުޅޭ ބޯޑަރު ސަރަހައްދުގައި ރެފިއުޖީން ހުއްޓުވުމަށް ބޮޑު ފާރެއް ރޭނުމުގެ މަސައްކަތް އަވަސްކޮށްފަ އެވެ.
"މި ފާރާއެކު ރެފިއުޖީން އައުން އެއްކޮށް ހުއްޓުވޭނެ،" އާދީއްތަ ދުވަހު އުރުދުގާން ވިދާޅުވި އެވެ.
