ކާބުލް، އަފްގާނިސްތާން (އޯގަސްޓު 15) - ތާލިބާން ހަނގުރާމަވެރިން ވެރިން ކާބުލް ވަށާލުމާ އެކު ރައީސް އަޝްރަފް ގަނީ ގައުމު ދޫކޮށް ވަޑައިގެންފި އެވެ.
"މި ހާލަތު ރައްޔިތުންގެ އަތް މައްޗަށް ދޫކުރެއްވުމަށް ފަހު އަފްގާނިސްތާނުގެ ކުރީގެ ރައީސް ގައުމު ދޫކުރައްވާ ވަޑައިގެންފި،" ސުލްހައިގެ މަޝްވަރާގައި އިސްކޮށް އުޅުއްވާ އަބްދުﷲ އަބްދުﷲ ފޭސްބުކްގައި އާއްމުކުރެއްވި ވީޑިއޯއެއްގައި ވިދާޅުވި އެވެ.
"އެމަނިކުފާނު ޖަވާބުދާރީ ކުރުއްވާނީ މާތް ﷲ އަދި ރައްޔިތުންނަށް ހައްގު އިންސާފު ލިބޭނެ".
ގަނީ ގައުމު ދޫކޮށް ވަޑައިގެންނެވީ ކޮން ތަނަކަށް ކަމެއް އޭނާ ހާމައެއް ނުކުރައްވަ އެވެ. ނަމަވެސް އަފްގާނިސްތާނުގެ ތޯލޯ ނިއުސް ގްރޫޕުން ބުނީ ވަޑައިގެންނެވީ އަވަށްޓެރި ތަޖިކިސްތާނަށް ކަމަށެވެ.
ތާލިބާނުން ސަރުކާރާ އެކު ކުރަމުން ދިޔަ ސުލްހައިގެ މަޝްވަރާތަކުގައި ޑިމާންޑު ކުރި އެންމެ ބޮޑު އެއް ކަމަކީ ގަނީ ރައީސްކަމުން ދުރުކުރުމެވެ. ނަމަވެސް އެމަނިކުފާނު ވަނީ މަގާމު ދޫކުރަން ދެކޮޅު ހައްދަވާފަ އެވެ.
އެންމެ 10 ދުވަސް ތެރޭގައި ތާލިބާނުން ވަނީ އަފްގާނިސްތާނުގެ ހުރިހާ ބޮޑެތި ސިޓީތަކެއް ހިފައިފަ އެވެ. އެމެރިކާ ސިފައިންގެ އެހީތެރިކަން ނެތި، އަފްގާނިސްތާނުގެ ސިފައިން ވަނީ ހަތިޔާރު ބަހައްޓައި އަމާން ދީފަ އެވެ.
ތާލިބާނުން ބުނީ ބޭނުންވަނީ "ސުލްހަވެރިކަމާ އެކު ވެރިކަމުގެ ބާރުތައް ބަދަލު ކުރަން" ކަމަށެވެ. ތާލިބާނުން އަލުން ވެރިކަމަށް މި އަންނަނީ 20 އަހަރު ފަހުންނެވެ.
ނަވާރަ ސަތޭކަ ނުވަދިހަ ހަޔަކުން ފެށިގެން އޮތް ތާލިބާނު ވެރިކަން ވެއްޓުނީ ސެޕްޓެމްބަރު 11، 2001ގެ ޓެރަރިސްޓު ހަމަލާތަކާ ގުޅިގެން އެމެރިކާ އިން އަފްގާނިސްތާނުގެ ފަސްގަނޑަށް އެރުމުންނެވެ.
ގަނީ ގައުމުން ވަޑައިގެންނެވި އިރު، ތާލިބާނުން ހަނގުރާމަވެރިންނަށް އަންގާފައި ވަނީ ކާބުލް އަށް ނުވަނުމަށެވެ. ތާލިބާނުން ބުނީ ކާބުލްގެ ސެކިއުރިޓީ ބަލަހައްޓާނީ ސިފައިން ކަމަށެވެ.
ނަމަވެސް ފަހުން ތާލިބާން ތަރުޖަމާނަކު ކުރެއްވި ޓްވީޓެއްގައި ވިދާޅުވީ ސިފައިން ދޫކޮށްފައިވާ ހިސާބުތަކަށް ހަނގުރާމަވެރިން ގޮސް، އަމަން ބަލަހައްޓަން ޖެހޭނެ ކަމަށެވެ.
