ކާބުލް، އަފްގާނިސްތާން (އޯގަސްޓު 15) - ވެރިރަށް ކާބުލް ފިޔަވައި އެހެން ހުރިހާ ސިޓީއެއް ހިފައި އަފްގާނިސްތާނުގެ ފުރިހަމަ ކޮންޓްރޯލް ހޯދުމާ ތާލިބާނުން ގާތްވެއްޖެ އެވެ.
ހޮނިހިރު ދުވަހު މަޒަރީ ޝަރީފް ހިފުމަށް ފަހު އާދީއްތަ ދުވަހުގެ ދަންވަރުގެ ވަގުތުގައި ވަނީ އިރުމަތީގައި އޮންނަ ޖަލާލްއާބާދު ވެސް ހިފާފަ އެވެ.
ތާލިބާން ހަނގުރާމަވެރިން ކާބުލް ވަށާލާފައި ވާއިރު، ރައީސް އަޝްރަފް ގަނީގެ ސަރުކާރު އޮތީ ގޮތް ހުސްވެފަ އެވެ. ސަރުކާރަށް ޖެހޭނީ ވެރިރަށުގައި ބޮޑު ލޭ އޮހޮރުވުމަކަށް ތައްޔާރު ވާން ނުވަތަ އަމާންދޭށެވެ.
އެމެރިކާގެ ރައީސް ޖޯ ބައިޑެން ވަނީ އިތުރު 1،000 ސިފައިން އަފްގާނިސްތާނަށް ފޮނުއްވާފަ އެވެ. އެ މީހުންގެ މަސައްކަތަކަށް ވާނީ ކާބުލްގައި ތިބި އެމެރިކާ ރައްޔިތުން ރައްކާތެރިކަމާ އެކު ގައުމަށް ގެންދިޔުމުގައި އެހީވުމެވެ.
ކާބުލްގައި ހުންނަ އެމެރިކާ އެމްބަސީގެ މުވައްޒަފުންގެ އިތުރުން އެމެރިކާ އަށް އެހީތެރިކަން ފޯރުކޮށްދީފައިވާ އަފްގާނިސްތާނުގެ އެތައް ހާސް ރައްޔިތުން ވެސް އެމެރިކާ އަށް ގެންދާނެ އެވެ.
އެމެރިކާ އާއި ކެނެޑާ އަދި ސްޕެއިން، ޑެންމާކް، ނޯވޭ، ނެދަލޭންޑްސް އަދި އެހެން ގިނަ ގައުމުތަކެއްގެ އެމްބަސީ މުވައްޒަފުން ވެސް އަނބުރާ ގެންދިޔުމުގެ މަސައްކަތް މިހާރު ދަނީ ކުރަމުންނެވެ.
ކާބުލް ހިފުމަށް ތާލިބާނުން އަމާޒު ހިފާފައި ވާއިރު، ތާލިބާނުންނާއި އަފްގާނިސްތާނުގެ ސަރުކާރާ ދެމެދު ސުލްހައިގެ މަޝްވަރާތަކުގައި މެދުވެރިއެއްގެ ދައުރު އަދާ ކުރާ ގަތަރުން ވަނީ ހަމަލާތައް ހުއްޓާލުމަށް ތާލިބާނަށް ގޮވާލާފަ އެވެ.
