ޕޯޓް އޯ ޕްރިންސް، ހެއިޓީ (އޯގަސްޓު 15) - ހޮނިހިރު ދުވަހުގެ ރޭ ހެއިޓީއަށް އައި 7.2 މެގްނިޓިއުޑްގެ ބިންހެލުމެއްގައި މަރުވި މީހުންގެ 304 އަށް އަރާފައި ވާއިރު، ގެއްލިފައިވާ މީހުން ހޯދުމުގެ މަސައްކަތް ކުރަމުން އެބަ ދެ އެވެ.
ބިންހެލުން އައިސްފައި ވަނީ ތޮއްޖެހިފައިވާ ވެރިރަށް، ޕޯޓް އޯ ޕްރިންސްގެ 160 ކިލޯމީޓަރު ހުޅަނގުންނެވެ. ދެހާސް ދިހަ ވަނަ އަހަރުގެ ބާރުގަދަ ބިންހެލުމަކުން ލިބުނު ގެއްލުންތަކުން އަރައިނުގަނެވިގެން އުޅެނިކޮށް އައި މި ބިންހެލުމުގައި ވެސް ބޮޑެތި ގެއްލުންތަކެއް ވަނީ ވެފަ އެވެ.
ރިޕޯޓުތައް ބުނާ ގޮތުން ބިންހެލުމުގެ އަސަރު މުޅި ހެއިޓީ އަށް ކުރި އެވެ. ކެރީބިއަން ސަރަހައްދުގައި އޮންނަ އެ ގައުމުގެ ހުޅަނގު ދެކުނުގައި ހުރި ގެތަކާއި ސްކޫލުތައް ބިމާ ހަމަވެފައިވާ ކަމަށް މަންޒަރު ދުށް ފަރާތްތަކާ ހަވާލަދީ އޭއެފްޕީން ބުންޏެވެ.
ހެއިޓީގެ ސިވިލް ޕްރޮޓެކްޝަން އެޖެންސީން ބުނީ މަރުވި މީހުންގެ އަދަދު 304 އަށް އަރާފައި ވާއިރު، އެތައް ސަތޭކަ ބަޔަކު ގެއްލިފައިވާ ކަމަށެވެ. އޭގެ އިތުރުން އެތައް ހާސް ބަޔަކަށް އަނިޔާވެގެން ދަނީ ފަރުވާ ދެމުންނެވެ.
ސިވިލް ޕްރޮޓެކްޝަން އެޖެންސީގެ ވެރިޔާ ޖެރީ ޗޭންދްލާ ވިދާޅުވީ ބައެއް ހޮސްޕިޓަލްތައް އެއްކޮށް ފުރިފައިވާ ކަމަށާއި ފަރުވާ ދިނުމަށް ބޮޑެތި ގޮންޖެހުންތަކާ ކުރިމަތިވެފައިވާ ކަމަށެވެ. ބިންހެލުމާ ގުޅިގެން ހެއިޓީގައި ވަނީ ކުއްލި ނުރައްކަލުގެ ހާލަތު އިއުލާނުކޮށްފަ އެވެ.
ހެއިޓީ ކައިރީގައި އޮންނަ އެމެރިކާ އިން ބުނެފައި ވަނީ އަވަސް އެހީ ފޯރުކޮށްދޭނެ ކަމަށެވެ.
ބިންހެލުން އައުމާއެކު އެމެރިކާގެ ޖިއޮލޮޖިކަލް ސާވޭ (ޔޫއެސްޖީއެސް) އިން ވަނީ ރާޅުގެ އުސްމިން ތިން މީޓަރުގައި ހުންނާނެ ކަމަށް ލަފާކޮށް ސުނާމީގެ އިންޒާރު ދީފަ އެވެ. ނަމަވެސް އޭގެ ކުޑަ އިރުކޮޅެއް ފަހުން އިންޒާރު އުވާލި އެވެ.
ދެހާސް ދިހަ ވަނަ އަހަރު އައި 7.0 މެގްނިޓިއުޑްގެ ބިން ހެލުމުގައި ވެރިރަށް ޕޯޓް އޯ ޕްރިންސް އާއި ކައިރި އެހެން ސިޓީތައް އެއްކޮށް ބިމާ ހަމަވި އެވެ. އެ ފަހަރު 200،000 މީހުން މަރުވެ، 300،000 އަށް ވުރެ ގިނަ މީހުންނަށް އަނިޔާވި އެވެ.
އެ ބިންހެލުމުގައި މިލިއަނަކަށް ވުރެ ގިނަ މީހުންގެ ގެދޮރު ގެއްލުނެވެ. އޭގެ އިތުރުން ސަރުކާރުގެ އިމާރަތްތަކާއި ސްކޫލުތައް ބިމާ ހަމަވެ، ގައުމުގެ ސިއްހީ ނިޒާމުގެ 60 ޕަސެންޓަށް ގެއްލުން ލިބުނެވެ.
ހެއިޓީގެ މައި ހޮސްޕިޓަލަށް އޭރު ލިބުނު ގެއްލުންތައް އަދިވެސް މަރާމާތުކޮށް ނުނިމެ އެވެ. ހެއިޓީގެ ސަރުކާރުން ފެއިލްވަމުން ދާތީ އަލުން އިމާރަތް ކުރުމުގެ މަސައްކަތުގައި އިސްނަގައިގެން އުޅެން ޖެހެނީ އަމިއްލަ ޖަމިއްޔާތަކެވެ.
އެ ގައުމަށް އަނެއްކާވެސް ބޮޑު ބިންހެލުމެއް އައިސްފައި ވާއިރު މީގެ މަހެއްހާ ކުރިން ބަޔަކު ދިން ހަމަލާއެއްގައި ރައީސް ޖޮވެނެލް މޮއިޒް ވަނީ އަވަހާރަކޮށްލާފަ އެވެ. ފަގީރުކަމާއި ގޭންގު ހަމަނުޖެހުން އިންތިހާއަށް އޮތް ހެއިޓީގެ ކޮވިޑުގެ ހާލަތު ވެސް ގޯހެވެ.
