އޮޓާވާ، ކެނެޑާ (އޯގަސްޓު 14) - ތާލިބާނުންގެ ސަބަބުން ދިރިއުޅުމަށް ނުރައްކާވެފައިވާ އަފްގާނިސްތާނުގެ 20،000 ރެފިއުޖީން ކެނެޑާއަށް ގެންދަން ނިންމައިފި އެވެ.
ކެނެޑާއިން ބުނީ އެ ގައުމަށް ގެންދާ ރެފިއުޖީންގެ ތެރޭގައި ހިމެނޭނީ އަންހެން ލީޑަރުންނާއި، ސަރުކާރު މުވައްޒަފުންނާއި، ނުރައްކާ އޮތް އެހެން ބައެއް މީހުން ކަމަށެވެ.
"އަފްގާނިސްތާނުގެ ހާލަތު ފެނިފައި ހިތް ހަލާކުވޭ. ކަމެއް ނުކޮށް، އެ މަންޒަރު ބަލަން ކެނެޑާއިން ނޯންނާނެ،" އިމިގްރޭޝަން މިނިސްޓަރު މާކޯ މެންޑިޗީނޯ ވިދާޅުވި އެވެ.
އޭނާ ވިދާޅުވީ ކެނެޑާއަށް ގެންދާ ރެފިއުޖީންގެ ތެރޭގައި ހިމެނެނީ އަފްގާނިސްތާނުގައި މިހާރު ވެސް އުޅޭ ބައެއް މީހުންނާއި ފުރާނައަށް ނުރައްކާވުމުން ކައިރި އެހެން ގައުމުތަކަށް ހިޖުރަކޮށްފައިވާ މީހުން ކަމަށެވެ.
އަންހެން ލީޑަރުންނާއި ސަރުކާރު މުވައްޒަފުންގެ އިތުރުން އިންސާނީ ހައްގުތަކަށް މަސައްކަތް ކުރާ އެކްޓިވިސްޓުންނާއި މައިނޯރިޓީއަށް ނިސްބަތްވާ އެކި ދީނުގެ މީހުންނާއި ނޫސްވެރިން ވެސް ކެނެޑާއަށް ދާ ރެފިއުޖީންގެ ތެރޭގައި ހިމެނޭނެ އެވެ.
މެންޑިޗީނޯ ވިދާޅުވީ ކެނެޑާގެ ރައްކާތެރިކަން ހޯދަން އެތައް ގިނަ އަފްގާން ރައްޔިތުންތަކެއް ހިޖުރަ ކުރަން މަސައްކަތް ކުރަމުން ދާއިރު، ފުރަތަމަ ފްލައިޓު ޖެއްސީ ޓޮރޮންޓޯއަށް ހުކުރު ދުވަހު ކަމަށެވެ.
އަފްގާނިސްތާނުގައި ތާލިބާނުން ކުރި ހޯދަމުން ގޮސް ވެރިރަށް ކާބުލްގެ ގޭޓުތަކާ ހަމައަށް މިހާރު ފޯރާފައި ވާއިރު، ކެނެޑާއިން ނިންމާފައި ވަނީ އެމްބަސީގެ މުވައްޒަފުން ގައުމަށް ގެނައުމަށެވެ.
ކެނެޑާގެ އިތުރުން، ސްޕެއިން، ޑެންމާކް، ނޯވޭ، ނެދަލޭންޑްސް އަދި އެހެން ގިނަ ގައުމުތަކެއް އެމްބަސީ މުވައްޒަފުން ވެސް އަނބުރާ ގައުމުތަކަށް ގެންދިޔުމުގެ މަސައްކަތް މިހާރު ދަނީ ކުރަމުންނެވެ.
