ރާއްޖޭގައި އެންމެ އެކްޓިވްކޮށް ހަރަކާތްތެރިވަމުން އަންނަ އޮފިޝަލް ލިވަޕޫލް ސަޕޯޓާސް ކްލަބް (އޯއެލްއެސްސީ) އިން މިރޭ ފަށާ އިނގިރޭސި ޕްރިމިއާ ލީގުގެ އާ ސީޒަނަށް އަމާޒުކޮށް އެއް ލައްކަ ރުފިޔާގެ އަގުހުރި ފެންޓަސީ ލީގެއް ހަދައިފި އެވެ.
ލިވަޕޫލް ސަޕޯޓަރުންގެ ޖަމިއްޔާއިން މި ލީގު ކުރިއަށް ގެންދަނީ ފުޅާދާއިރާއެއްގައި މުޅި ރާއްޖެ އަށް ކޭބަލް ފޯރުކޮށްދިނުމުގެ ވިޔަފާރި ކުރަމުން އަންނަ ކޭބަލް ޝޮޕް މޯލްޑިވްސްގެ އެއްބާރުލުމާ އެކުގަ އެވެ.
އިނގިރޭސި ޕްރިމިއާ ލީގުގެ ފެންޓަސީ ލީގު، (އެފްޕީއެލް) އަކީ މުޅި ދުނިޔޭގެ ނިސްބަތުން ބެލިޔަސް ވަރަށް ފޯރީގައި ކުރިއަށްދާ މަގުބޫލު ގޭމެކެވެ. ކޮންމެ މީހަކަށް ވެސް ވަކިން ޓީމެއް ހަދާލައިގެން ޕްރައިވެޓް ލީގުތަކެއްގައި ވާދަކުރުމުގެ ފުރުސަތު ލިބެ އެވެ.
ޕްރިމިއާ ލީގުގެ އިމޭޖް ރައިޓްސް ޑީލަށް ބޮޑު އާމްދަނީއެއް ހޯދައިދޭ މި ގޭމް އޮތީ ރާއްޖޭގައި ވެސް ވަރަށް ބޮޑަށް ވައިގައި ހިފައިފަ އެވެ. ސޯޝަލް މީޑިއާގައި އެކި ވިޔަފާރިތަކުން ވެސް ވަނީ އަމިއްލަ ލީގުތައް ހަދާ އެކި އިނާމްތައް ހުށަހަޅައިފަ އެވެ. އެ ގޮތުން މުޅި ސީޒަނަށް ބޮޑު އިނާމެއް ދީ މަހަކު އެއް އިނާމް ދޭ ގޮތަށް ވެސް ރޭވިފައި ހުރި އަމިއްލަ ލީގުތަކެއް ވެސް އެބަހުއްޓެ އެވެ.
އޯއެލްއެސްސީން މި ފެށި ފެންޓަސީ ލީގުގައި ބައިވެރިވުމުގެ ފުރުސަތު އޮތީ ހުޅުވާލެވިފަ އެވެ. އެކަމަކު، ވަކި ކަންތައްތަކެއް ފުރިހަމަވާން ޖެހޭނެ އެވެ. އެ ގޮތުން އޯލްއެސްސީގެ ފޭސްބުކް ޕޭޖަށް ލައިކް ދީ އިންސްޓަގްރާމް އަދި ޓްވިޓާ އިން އޯއެލްއެސްސީ ފޮލޯ ކުރަން ޖެހޭނެ އެވެ. މީގެ އިތުރުން ކޭބަލް ޝޮޕް މޯލްޑިވްސްގެ ރަސްމީ ފޭސްބުކް ޕޭޖަށް ލައިކް ދޭން ޖެހޭނެ އެވެ. މި ލީގާ ބެހޭ އިތުރު މައުލޫމާތުތައް އޯއެލްއެސްސީގެ ސޯޝަލް މީޑިއާ ޕްލެޓްފޯމްތަކުން ލިބޭނެ އެވެ.
ލިވަޕޫލް ސަޕޯޓަރުންގެ ގްރޫޕްގެ މި ފެންޓަސީ ލީގުން ބޮޑު އިނާމް ދޭނީ ގަދަ ތިނަކަށެވެ. ލީގުގެ އެއް ވަނަ ލިބޭ ފަރާތަކަށް ދޭ އިނާމަކީ 50000 ރުފިޔާ އެވެ. ދެ ވަނަ އަށް ދާ ފަރާތަކަށް 25000 ރުފިޔާ ލިބޭނެ އެވެ. އަދި ތިން ވަނަ ލިބޭ ފަރާތަކަށް 12500 ރުފިޔާ ދޭން ނިންމާފައިވާއިރު، ދިހަ މަހެއްހާ ދުވަހަށް ކުރިއަށްދާ މި ލީގުން ކޮންމެ މަހަކު އެންމެ ކުރި ހޯދާ މީހަކަށް 1250 ރުފިޔާގެ އިނާމެއް ދޭނެ އެވެ.
ރަސްމީކޮށް ރާއްޖޭގައި ވެސް ރަޖިސްޓްރީ ކޮށްގެން ކުރިއަށްގެންދާ ލިވަޕޫލްގެ ސަޕޯޓަރުންގެ ކްލަބުން އަންނަނީ ކުޅިވަރާއި އިޖުތިމާއީ ގޮތުން ވެސް ރާއްޖޭގައި އެކި އުމުރުފުރާގެ މީހުންނަށް ހާއްސަކޮށްގެން އެކި ހަރަކާތްތަށް ހިންގަމުންނެވެ. އެގޮތުން ރާއްޖޭގައި އުޅޭ އެހެން ކްލަބްތަކުގެ ސަޕޯޓަރުންނަށް ހުޅުވާލައިގެން ފުޓްސަލް މުބާރާތެއް ވެސް އިންތިޒާމްކުރި އެވެ.
ލިވަޕޫލް ސަޕޯޓަރުންގެ ކްލަބުން ވަނީ ރާއްޖޭގައި އުޅޭ ލިވަޕޫލް ސަޕޯޓަރުންނަށް ހާއްސަކޮށް މިދިޔަ އަހަރު ބޮޑު ހަރަކާތެއް ކުރިއަށް ގެންގޮސްފަ އެވެ. އެއީ ލިވަޕޫލްގެ ކުރީގެ ވައިސް ކެޕްޓަން ޑެނިއަލް އެގާ ރާއްޖެ ގެނެސްގެން މިދިޔަ އަހަރު ކުރީކޮޅުގައި ކުރިއަށް ގެންދިޔަ ހަރަކާތެކެވެ. ސޯލްޓް ކެފޭގައި ކުރިއަށްދިޔަ އެ އިވެންޓަށް ވަރަށް ގިނަ ބަޔެއްގެ ތަރުހީބު ލިބުނެވެ.
އޯއެލްއެސްސީން އެ ޖަމިއްޔާގެ އިޖުތިމާއީ ޒިންމާގެ ދަށުން ވަނީ ކެއާ ސޮސައިޓީ އަށް 10،000 ރުފިޔާ ހަދިޔާކޮށްފަ އެވެ.
