ސީލައިފް ފްލެޓްތަކުގެ މައްސަލާގައި ހިޔާނާތްތެރިވިކަމުގެ ދައުވާ އުފުލާފައިވާ އެ ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އަންމަޓީ) ޝަރުތުތަކާއެކު ވެސް ބަންދުން ދޫނުކުރުމަށް ކުރިމިނަލް ކޯޓުން ނިންމައިފި އެވެ.
ހިޔާނާތުގެ ބޮޑެތި ތުހުމަތުތަކެއް ކުރެވޭ އަންމަޓީ މިހާރު ބަންދުގައި ހުރީ އޭނާއަކީ ބަންދުގައި ހުންނަން ޖެހޭ މީހެއް ކަމަށް ކަނޑައަޅައި، ހައިކޯޓުން ހުކުމްކޮށްފައިވުމުންނެވެ.
ތަހުގީގަށް އަންމަޓީ ރާއްޖެ ގެނައީ ލަންކާގައި އުޅެނިކޮށެވެ. އޭގެ ފަހުން އޭނާ ބަންދުގައި ހުރިއިރު ދައުވާ އުފުލުމަށް ފަހު ވެސް އޭނާގެ ބަންދަށް މުއްދަތު ޖަހަމުން ދިޔަ އެވެ. އަދި ފަހުން ޝަރީއަތް ނިމެންދެން އަންމަޓީ ބަންދުކުރި އެވެ. އެ އަމުރު އެހެން އޮއްވައި، އޭނާ ދޫކޮށްލުމަށް ކުރިމިނަލް ކޯޓުގައި މައްސަލަ ބައްލަވާ ގާޒީ ހަސަން ސައީދު އަމުރު ކުރެއްވި އެވެ.
އެ އަމުރު ހައިކޯޓުގައި ދައުލަތުން އިސްތިއުނާފުކުރުމުން އެ ކޯޓުން ނިންމީ އަންމަޓީގައި ބަންދުކޮށްފައި ބަހައްޓަން ޖެހޭ މީހެއް ކަމަށެވެ. އެހެންވެ، އޭނާ ހައްޔަރުކުރުމަށް ދައުލަތުގެ މައްޗަށް ހައިކޯޓުން އަމުރު ނެރުނެވެ.
އެ އަމުރުގެ ދަށުން ބަންދުގައި ހުރި އަންމަޓީގެ ބަންދު ރިވިއު ކުރުމަށް ޖިނާއީ އިޖުރާއަތުގެ ގާނޫނުގެ ދަށުން ލާޒިމްކުރާތީ، ދައުލަތުން އިއްޔެ ވަނީ އެކަމަށް ކުރިމިނަލް ކޯޓަށް ހުށަހަޅާފަ އެވެ. ދައުލަތުން ކުރިމިނަލް ކޯޓުގައި އެދިފައިވަނީ އަންމަޓީގެ ބަންދު ދަމަހައްޓައިދިނުމަށެވެ.
އެއީ އަންމަޓީގެ މައްޗަށް ހެކި ހުރުމުންނާއި އޭނާއަކީ ޝަރީއަތަށް ފިލައިގެން ގޮސްދާނެ މީހެއް ކަމަށްވާތީ ކަމަށް ދައުލަތުގެ ވަކީލް ވިދާޅުވި އެވެ. ވަކީލް ގޮތުގައި އަންމަޓީގެ ޕާސްޕޯޓް ހިފަހައްޓާފައި އޮތް ނަމަވެސް، އޭނާއަކީ ވަލުދޮރާށިން ވެސް ފިލައިގެން ގޮސްދާނެ މީހެކެވެ.
ނަމަވެސް، އަންމަޓީ އެ ތުހުމަތުތައް ދޮގުކޮށް ކޯޓުގައި އެދިފައިވަނީ އިތުރު ޝަރުތަކެއް މަތިކޮށްފައި ނަމަވެސް ބަންދުން ދޫކޮށްލުމަށެވެ. އެގޮތުން ކޯޓަށް ނުވަތަ ދައުލަތުގެ އިދާރާއަކަށް ކޮންމެ ދުވަހަކު ހާޒިރުވާން ޖެހޭ ގޮތަށް ޝަރުތުކޮށް ނޫނީ ކަފާލާތުގެ ދަށުން މީހަކު ޖާމިނުވެގެން ދޫކޮށްދިނުމަށް ވެސް އެދުނެވެ.
އެ އެދުމާ ގުޅޭ ގޮތުން ގޮތެއް ނިންމުމަށް މިއަދު ބޭއްވި އަޑުއެހުމުގައި ގާޒީ ހަސަން ސައީދު ވިދާޅުވީ އަންމަޓީގެ މައްޗަށް ހިޔާނާތުގެ ބޮޑެތި ތުހުމަތުތަކެއް ކުރެވޭއިރު އޭނާ ދޫކޮށްލައިފިނަމަ މުޖުތަމައުގެ މަސްލަހަތު ގެއްލި، ކުށް ކުރުމަށް ހިތްވަރު ލިބޭނެ ކަމަށެވެ.
އަދި، ޝަރުތުތަކަކާއެކު އަންމަޓީ ދޫކޮށްލި ނަމަވެސް އެ ޝަރުތުތަކަށް އޭނާ އަމަލު ކުރާނެ ކަމަކަށް ޝަރީއަތަށް ގަބޫލު ނުކުރެވޭ ކަމަށް ގާޒީ ވިދާޅުވި އެވެ. ޝަރީއަތަށް ބޮޑަށް ބުރަވެވެނީ އޭނާ ބަންދުން ދޫކޮށްލައިފިނަމަ ޝަރީއަތަށް ހާޒިރުނުވެ ފިލައިގެން ގޮސްދާނެ ކަމަށް ވެސް ވިދާޅުވި އެވެ.
އެހެންވެ، ގާޒީ ނިންމެވީ މި ހާލަތުގައި އަންމަޓީ ބަންދުން ދޫނުކުރުމަށެވެ. ނަމަވެސް، 30 ދުވަހުން ފަހުން އަނެއްކާވެސް ބަންދު ރިވިއު ކުރާއިރު ހާލަތު ބަދަލުވެފައިވާނަމަ އެކަމަށް ރިއާޔަތް ކުރައްވާނެ ކަމަށް ގާޒީ ވިދާޅުވި އެވެ.
ސީލައިފް ހިޔާނާތުގެ މައްސަލާގެ ޝަރީއަތުގެ މިއަދުގެ އަޑުއެހުމުގައި އަންމަޓީގެ މައްޗަށް އުފުލާފައިވާ ހިޔާނާތުގެ 42 ދައުވާގެ ތެރެއިން ހަތަރު ދައުވާއެއް ދައުލަތުން ވަނީ އިއްވައިފަ އެވެ. އެ ހަތަރު ދައުވާއަށް ވެސް އަންމަޓީ އިންކާރު ކުރުމުން ދައުލަތުން ވަނީ ދައުވާތައް ސާބިތުކުރުމަށް ހެކި ހުށަހަޅާފަ އެވެ.
މި މައްސަލާގެ ޝަރީއަތް ކުރިއަށް ދަނީ 42 ދައުވާ ވަކިވަކިންނެވެ. އެއީ، އޭނާ ހިޔާނާތްތެރިވި ކޮންމެ މީހެއްގެ މައްސަލަ ވަކިންނެވެ.
އެޗްޑީސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑާ ދެމެދު 2015ގައި ވެފައިވާ އެއްބަސްވުމެއްގެ ދަށުން ހުޅުމާލޭގައި 3000 ހައުސިން ޔުނިޓް އެޅުމަށް، ހަވާލުކުރި އެވެ. ނަމަވެސް، އެއްބަސްވުމުގައިވާ މުއްދަތުގައި ހައުސިން ޔުނިޓްތައް އެޅުމުގެ އަމަލީ މަސައްކަތް ފުރިހަމަނުކޮށް، އެކި މީހުން އަތުން ބޮޑެތި އަދަދުތަކުން ފައިސާ ނެގި އެވެ.
