ޓީޒީ އޫޒޫ، އަލްޖީރިއާ (އޯގަސްޓު 11) - މެޑިޓެރޭނިއަން ސަރަހައްދުގެ ގިނަ ގައުމުތަކެއްގެ ޖަންގަލީގައި ރޯވެފައިވާ މި ދަނޑިވަޅުގައި އަލްޖީރިއާގައި އަނދަމުންދާ އަލިފާންގަނޑުގައި މަރުވި މީހުންގެ އަދަދު 69 އަށް އަރައިފި އެވެ.
ރައީސް އަބްދެލްމަދްޖީދް ތެބޫނޭ ވަނީ މުޅި ގައުމުގައި ހިތާމަ ފާޅުކުރުމުގެ ތިން ދުވަސް އިއުލާނު ކުރައްވާފަ އެވެ. ކަމާބެހޭ އިދާރާތަކުން ބުނީ ކުޑަ ވަގުތުކޮޅެއްގެ ތެރޭގައި އެއް ފަހަރާ އެހާ ގިނަ އަލިފާންގަނޑު ރޯވުމުން ބަޔަކު ގަސްތުގައި ރޯކުރީ ކަމަށް ތުހުމަތު ކުރެވޭ ކަމަށެވެ.
ދައުލަތުގެ ނިއުސް އެޖެންސީ އޭޕީއެސް އިން ބުނީ އަންގާރަ ދުވަހުން ފެށިގެން 50 އަށް ވުރެ ގިނަ އަލިފާންގަނޑު ޖަންގަލިތަކުގައި ރޯވެފައިވާ ކަމަށެވެ. މަރުވި މީހުންގެ ތެރޭގައި އަލިފާން ނިއްވުމުގައި އުޅުނު 28 ސިފައިންގެ މީހުން ވެސް ހިމެނެ އެވެ.
ގަސްތުގައި އަލިފާން ރޯކުރި ކަމަށް ތުހުމަތު ކުރެވޭތީ ބަޔަކު ހައްޔަރު ކުރި ނަމަވެސް އެ މީހުންގެ މައުލޫމާތު އާއްމުކޮށްފައެއް ނުވެ އެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަނީ ޖަންގަލިތަކުގައި ރޯވެފައިވާ އަލިފާންގަނޑު ވަށާލާފައިވާ އަވަށްތަކުގައި ދިރިއުޅޭ މީހުން ސަލާމަތް ވާނެ ގޮތެއް ނެތި ތާށިވެފައި ތިބި މަންޒަރާއި އަނދާ ހުލިވެފައިވާ އަވަށްތަކުގެ މަންޒަރެވެ.
އަލްޖީރިއާގެ އިތުރުން މެޑިޓެރޭނިއަން ސަރަހައްދުގެ ގިނަ ގައުމުތަކަކުން މި ވަގުތު ދަނީ ޖަންގަލިތަކުގައި ރޯވެފައިވާ އަލިފާންގަނޑުތައް ކޮންޓްރޯލް ކުރުމަށް މަސައްކަތް ކުރަމުންނެވެ.
ގްރީސް އާއި ތުރުކީ އަދި ސައިޕްރަސް އިން ވެސް އަލިފާންގަނޑުތައް ކޮންޓްރޯލް ކުރުމުގެ މަސައްކަތް ކުރާއިރު، އެމެރިކާގެ ކެލިފޯނިއާގެ ޖަންގަލިތަކުގައި ވެސް ދަނީ ރޯވެ އަނދަމުންނެވެ.
މީޓިއޮރޮލޮޖިސްޓުން ބުނީ އަލްޖީރިއާގެ ހޫނުމިން 46 ޑިގްރީ ސެލްސިއަސް އަށް އަރާފައިވާ ކަމަށެވެ. ވާރޭ ނުވެހުމުގެ ސަބަބުން އެ ގައުމަށް ވަނީ ފެނުގެ ދަތިކަން ވެސް ވަރަށް ބޮޑަށް ކުރިމަތިވެފަ އެވެ.
މިދިޔަ ހޯމަ ދުވަހު އދ. އިން ނެރުނު ރިޕޯޓަކުން ހާމަވެފައިވާ ގޮތުގައި ދުނިޔެ މާ ބޮޑަށް ހޫނުވުމުގެ ސަބަބުން ގުދުރަތީ ގޮތުން ޖަންގަލީގައި ރޯވުން ފަދަ ކަންކަން ކުރިއަށް ވުރެ ގިނައިން ދަނީ ހިނގަމުންނެވެ.
