މަޒަރީ ޝަރީފް، އަފްގާނިސްތާން (އޯގަސްޓު 11) - ސިފައިންނަށް ހިތްވަރު ދެއްވުމުގެ ގޮތުން، ތާލިބާނުން ވަށާލާފައިވާ އަފްގާނިސްތާނުގެ އުތުރު މަޒަރީ ޝަރީފް ސިޓީއަށް ރައީސް އަޝްރަފް ގަނީ ވަޑައިގެންފި އެވެ.
ހަފްތާއެއްގެ ތެރޭގައި ތާލިބާނުން ވަނީ ޕްރޮވިންސް ވެރިރަށްތަކުގެ ތިން ބައި ކޮށްފައި އެއް ބައި ހިފާފަ އެވެ. އެއާއެކު ސިފައިން ހިތްވަރު އެލި ދަނީ އަމާން ދެމުންނެވެ.
މަޒަރީ ޝަރީފަށް ގަނީ ވަޑައިގެންނެވިތާ ކުޑަ ވަގުތުކޮޅެއްގެ ތެރޭގައި ކައިރި ކުންދޫޒް ސިޓީގައި ވެސް އެތައް ސަތޭކަ ސިފައިންނެއް ވަނީ ހަނގުރާމަ ހުއްޓާލާފަ އެވެ.
ކުންދޫޒް އަކީ މިދިޔަ ހުކުރު ދުވަހުން ފެށިގެން ތާލިބާނުން އަތް ދަށަށް ދިޔަ ނުވަ ވަނަ ސިޓީ އެވެ. ރިޕޯޓުތައް ބުނާ ގޮތުން ސިފައިން އަމާން ދިނީ އެއާޕޯޓަށް ބޮޑު ހަމަލާތަކެއް ދިނުމުންނެވެ.
މަޒަރީ ޝަރީފް ސިޓީއަށް ވަޑައިގެން ގަނީ ވަނީ ތާލިބާނުންނާ ދެކޮޅު ލަޝްކަރުތައް ގެންގުޅޭ އަތާ މުހައްމަދު ނޫރް އާއި އަބްދުލް ރާޝިދު ދޮސްތުމް އާއެކު މަޝްވަރާ ކުރައްވާފަ އެވެ.
އެ ސިޓީ ތާލިބާނުންގެ އަތް ދަށަށް ދިޔުން ވާނީ ސަރުކާރަށް ބޮޑު ދެރައަކަށެވެ. އެހެން ވެއްޖެ ނަމަ އަފްގާނިސްތާނުގެ އުތުރުގެ ފުރިހަމަ ކޮންޓްރޯލް ތާލިބާނުންނަށް ލިބޭނެ އެވެ.
އަފްގާނިސްތާނުގެ ދިގު ހަމަނުޖެހުން އިތުރަށް ގޯސްވެ ހަނގުރާމަ ވަރުގަދަ ކުރީ މިދިޔަ މޭ މަހު ބޭރު ފައުޖުތައް އެ ގައުމުން ފައިބަން ފެށުމުންނެވެ.
