ކުޓުޕަލޯންގް، ބަންގްލަދޭޝް (އޯގަސްޓު 10) - ބަންގްލަދޭޝްގެ ކޮވިޑް ކޭސްތައް ރިކޯޑު އަދަދަކަށް އިތުރުވާން ފަށާފައި ވަނިކޮށް އެ ގައުމުގައި ތޮއްޖެހިފައިވާ ކޭމްޕުތަކުގައި ދިރިއުޅޭ ރޮހިންޔާ ރެފިއުޖީންނަށް ވެކްސިން ދޭން ފަށައިފި އެވެ.
ސިއްހީ އޮފިޝަލުން ބުނެފައި ވަނީ 850،000 ރެފިއުޖީން ދިރިއުޅޭ ކޭމްޕުތަކުން މިހާތަނަށް 2،600 ކޭސް ފެނިފައި ވާއިރު، 29 މީހުން މަރުވެފައިވާ ކަމަށެވެ. ނަމަވެސް ތަޖުރިބާކާރުން ބުނަނީ އެއީ އަސްލު އަދަދަށް ވުރެ އެތައް ގުނައެއް މަދު ކަމަށެވެ.
ރެފިއުޖީންނަށް ވެކްސިން ދިނުމުގެ ފުރަތަމަ މަރުހަލާގައި އުމުރުން 55 އަހަރުން މަތީގެ 48،000 މީހުންނަށް ޗައިނާގެ ސިނޯފާމް ވެކްސިން ދޭނީ ތިން ދުވަސް ތެރޭގައި ކަމަށް އެ ސަރަހައްދުގެ ހެލްތު ޗީފު މަހްބޫބުއް ރަހްމާން އޭއެފްޕީއަށް ވިދާޅުވި އެވެ.
އޮފިޝަލުން ބުނީ ވެކްސިނާ މެދު ހޭލުންތެރިކަން އިތުރު ކުރުވުމަށް ރެފިއުޖީ ކޭމްޕުތަކުގައި ބޮޑު ކެމްޕޭނެއް ހިންގި ކަމަށާއި ވޮލަންޓިއަރުން ވަކިވަކި ރެފިއުޖީންގެ ކައިރިއަށް ގޮސް ވެކްސިން ޖެހުމުގެ މުހިއްމު ކަމާ ގުޅޭ މައުލޫމާތު ފޯރުކޮށްދިން ކަމަށެވެ.
ބަންގްލަދޭޝްގެ ޑެޕިއުޓީ ރެފިއުޖީ ކޮމިޝަނަރު ޝަމްސް އުދް ދޫޒާ އޭއެފްޕީއަށް ވިދާޅުވީ ބޭ އޮފް ބެންގޯލްގައިވާ ރަށަކަށް ބަދަލުކުރި 18،000 ރެފިއުޖީންނަށް ވެކްސިން ދިނުމުގެ މަސައްކަތް ވެސް މި ހަފްތާގައި ފަށާނެ ކަމަށެވެ.
ބަންގްލަދޭޝްގައި ކޭސްތައް އިތުރުވާން ފަށާފައި ވާތީ ރެފިއުޖީން ހިމެނޭ ގޮތަށް 169 މިލިއަން މީހުން މި ވަގުތު ތިބީ ލޮކްޑައުންކޮށްފަ އެވެ.
އެ ގައުމުން މިހާތަނަށް ކޮވިޑް ބަލީގައި 23،000 މީހުން މަރުވެފައި ވާއިރު، 1.4 މިލިއަން ކޭސް ފެނިފައި ވެ އެވެ. މިހާރު ފެންނަމުންދާ ކޭސްތަކުގެ 98 ޕަސެންޓު ގުޅިފައި ވަނީ ހަލުވިކަމާ އެކު ފެތުރޭ ޑެލްޓާ ވޭރިއެންޓާ އެވެ.
"ކޭމްޕުތަކުގައި ދިރިއުޅޭ ރޮހިންޔާ މީހުންގެ ތެރޭގައި ވައިރަސް އިތުރަށް ފެތުރުން ހުއްޓުވޭނެ ހަމައެކަނި ގޮތަކީ ހުރިހާ އުމުރެއްގެ މީހުންނަށް ވެކްސިން ދިނުން،" ސިއްހީ އެހީ ދޭ ޖަމިއްޔާ އެމްއެސްއެފްގެ ބަންގްލަދޭޝް ޗީފް ރޮމެއިން ބްރީ ވިދާޅުވި އެވެ.
ބަންގްލަދޭޝްގައި ދިރިއުޅޭ ގިނަ ރޮހިންޔާ ރެފިއުޖީންނަކީ ކައިރީގައި އޮންނަ މިޔަންމާގެ ސިފައިން އެ ދަރިކޮޅުގެ މީހުންނާ ދެކޮޅަށް ހިންގާ ލާއިންސާނީ އަމަލުތަކުން ސަލާމަތްވުމަށް ހިޖުރަ ކުރި މީހުންނެވެ. އެ މީހުން ހިޖުރަ ކުރީ 2017 ގައި ނަމަވެސް އެނބުރި މިޔަންމާއަށް ދެވޭނެ ކަމުގެ އުއްމީދެއް އަދިވެސް ނެތެވެ.
