އަލްޖިއާޒް، އަލްޖީރިއާ (އޯގަސްޓު 10) - މާ ގަދަޔަށް ހޫނުވުމާއެކު ޖަންގަލިތަކުގައި ރޯވެ މިހާތަނަށް ހަތް މީހަކު މަރުވެފައިވާ ކަމަށް އަލްޖީރިއާގެ އިންޓީރިއާ މިނިސްޓަރު ވިދާޅުވެއްޖެ އެވެ.
ސޯޝަލް މީޑިއާގައި ދައުރުވަމުންދާ ފޮޓޯތަކުން ފެންނަނީ ވެރިރަށް އަލްޖިއާޒްގެ އިރުން އޮންނަ ކަބީލީ ޖަންގަލި ސަރަހައްދުގެ އަވަށްތައް ވަށައިގެން އަލިފާން ރޯވެފައިވާ މަންޒަރެވެ.
އަލްޖީރިއާގެ އިތުރުން މެޑިޓެރޭނިއަން ސަރަހައްދުގެ ގިނަ ގައުމުތަކަކުން މި ވަގުތު ދަނީ ޖަންގަލިތަކުގައި ރޯވެފައިވާ އަލިފާންގަނޑުތައް ކޮންޓްރޯލް ކުރުމަށް މަސައްކަތް ކުރަމުންނެވެ.
ގްރީސް އާއި ތުރުކީ އަދި ސައިޕްރަސް އިން ވެސް އަލިފާންގަނޑުތައް ކޮންޓްރޯލް ކުރުމުގެ މަސައްކަތް ކުރާއިރު، އެމެރިކާގެ ކެލިފޯނިއާގެ ޖަންގަލިތަކުގައި ވެސް ދަނީ ރޯވެ އަނދަމުންނެވެ.
މީޓިއޮރޮލޮޖިސްޓުން ބުނީ އަލްޖީރިއާގެ ހޫނުމިން 46 ޑިގްރީ ސެލްސިއަސް އަށް އަރާފައިވާ ކަމަށެވެ. ވާރޭ ނުވެހުމުގެ ސަބަބުން އެ ގައުމަށް ވަނީ ފެނުގެ ދަތިކަން ވެސް ވަރަށް ބޮޑަށް ކުރިމަތިވެފަ އެވެ.
ބައެއް އަލިފާންގަނޑުތައް ރޯވީ ގުދުރަތީ ގޮތުން ނަމަވެސް އިންޓީރިއާ މިނިސްޓަރު ވިދާޅުވީ ބައެއް ސަރަހައްދުތަކުގައި ރޯވީ އިހުމާލުން ކަމަށް ބެލެވޭ ކަމަށެވެ.
މިކަމުގެ ތުހުމަތު ކުރެވޭ ތިން މީހަކު ހައްޔަރުކޮށްފައިވާ ކަމަށް އެ ގައުމުގެ ޕަބްލިކް ރޭޑިއޯ އިން ބުނެފައިވެ އެވެ. ފަހަކަށް އައިސް ޖަންގަލީގައި މީހުން ގަސްދުގައި ރޯކުރާ ކަމުގެ އަޑުތައް އެ ގައުމުގައި ވަނީ ގަދަވެފަ އެވެ.
މިދިޔަ މަހު ރައީސް އަބްދެލްމަޖްދީދް ތެބޫނޭ ވަނީ ޖަންގަލީގައި ރޯކޮށްފި ނަމަ ދޭ އަދަބު ހަރުކަށި ކުރަން ބިލެއް އެކުލަވާލުމަށް އަމުރު ކުރައްވާފަ އެވެ. އެ ބިލުގައި އަދަބެއްގެ ގޮތުގައި 30 އަހަރުގެ ޖަލު ހުކުމެއް ހިމަނަން ނިންމާފައި ވާއިރު، އަލިފާނުގައި މީހަކު މަރުވެއްޖެ ނަމަ އުމުރަށް ޖަލަށް ލެވޭނެ އެވެ.
މިދިޔަ ހޯމަ ދުވަހު އދ. އިން ނެރުނު ރިޕޯޓަކުން ހާމަވެފައިވާ ގޮތުގައި ދުނިޔެ މާ ބޮޑަށް ހޫނުވުމުގެ ސަބަބުން ގުދުރަތީ ގޮތުން ޖަންގަލީގައި ރޯވުން ފަދަ ކަންކަން ކުރިއަށް ވުރެ ގިނައިން ދަނީ ހިނގަމުންނެވެ.
