ކޮލަމްބޯ، ސްރީ ލަންކާ، (އޯގަސްޓް 9) - ކޮވިޑުގެ ހާލަތު ގޯސްވެފައިވާ ސްރީ ލަންކާގައި މަރުވާ މީހުންގެ އަދަދު އިތުރުވެ، އެއް ފަހަރާ ގިނަ ގަބުރުތަކެއް އެއްކޮށްގެން އެންދުމުގެ މަސައްކަތް ފަށައިފި އެވެ.
ދުވާލެއްގެ މައްޗަށް ފެންނަ ކޭސްތަކުގެ އަދަދު އެއް މަސް ތެރޭ ވަނީ ދެ ގުނަ އިތުރުވެ، 2،500 އަށް އަރާފަ އެވެ. ކޮންމެ ދުވަހަކު 100 މީހުން މަރުވަމުން ދެ އެވެ.
ކޮލަމްބޯ މުނިސިޕަލިޓީން ގިނަ ގަބުރުތަކެއް އެއް ފަހަރާ އަންދަން ފެށީ އާދީއްތަ ދުވަހުގެ ހަވީރު އެވެ. އެގޮތުން ކޮލަމްބޯ ޖެނެރަލް ސިމެޓްރީގައި އެއް ފަހަރާ 15 ގަބުރު އަންދާލި އެވެ. އެގޮތަށް ހަދަން ޖެހުނީ ލަންކާގެ އެންމެ ބޮޑު ހޮސްޕިޓަލުގެ ފްރީޒަރުގައި ގަބުރުތައް ބަހައްޓާނެ ޖާގަ ހުސްވުމުންނެވެ.
މިއީ މިދިޔަ ޑިސެމްބަރު މަހަށް އެއް ފަހަރާ މިހާ ގިނަ އަދަދެއްގެ ގަބުރުތައް އަންދާލި ފުރަތަމަ ފަހަރެވެ. މިދިޔަ ޑިސެމްބަރު މަހު، އެންމެ 20 ދުވަސްވީ ތުއްތު ކުއްޖަކާ އެކު މުސްލިމް 15 މީހެއްގެ ގަބުރު އަންދާލި މައްސަލަ ހޫނުވި އެވެ.
ކޮވިޑުގައި މަރުވާ މުސްލިމުންގެ ގަބުރުތައް އެންދުމާ ދެކޮޅަށް ލަންކާ އާއި އެހެން ގައުމުތަކުގެ ރައްޔިތުން ނުރުހުން ފާޅުކުރުމުން، ސަރުކާރުން ހުއްދަ ދިނީ އެ ގައުމުގެ އިރުމަތީގައި މީހުންގެ މަދު ހިސާބެއްގައި މުސްލިމުންގެ ގަބުރުތައް ވަޅުލުމަށެވެ.
ޕަބްލިކް ހެލްތު އިންސްޕެކްޓާޒް ޔޫނިއަން (ޕީއެޗްއައި) އިން ބުނީ ކޮވިޑުގައި މަރުވި މީހުންގެ ގަބުރުތައް ފާއިތުވި ހަފްތާ ބަންދުގައި ފުނިޖެހެން ފެށީ ކުއްލިއަކަށް ގިނަ ބަޔަކު މަރުވަމުން ދާތީ، އެ މީހުންގެ ޖަނާޒާގެ ކަންކަން އަވަސް ސްޕީޑުގައު ކުރިއަށް ނުގެންދެވުމުން ކަމަށެވެ.
"މި ރޭޓުގައި ކުރިއަށް ދާ ނަމަ އަޅުގަނޑުމެންނަށް ޖެހޭނީ ގަބުރުތައް އަންދަން އާ ތަންތަން ގާއިމްކުރަން،" ޕީއެޗްއައި ޔޫނިއަންގެ ޗީފް އުޕުލް ރޯހާނާ ނޫސްވެރިންނަށް ވިދާޅުވި އެވެ.
ކޮލަމްބޯ ބޯތު ހޮސްޕިޓަލްގެ ފްރީޒަރު ފުރި 20 ގަބުރެއް ބާއްވާފައި އޮތް އިރު، ދެކުނުގައި ހުންނަ ޕާނަދޫރާ ހޮސްޕިޓަލުގައި 50 އަށް ވުރެ ގިނަ ގަބުރު ބާއްވާފައި އެބަ އޮތެވެ.
ކޮލަމްބޯ ނޭޝަލަން ހޮސްޕިޓަލްގެ މޯޗަރީގެ 66 ފްރީޒަރު ވެސް ފުރުމުގެ ސަބަބުން ގަބުރުތައް ބަހައްޓާފައިވަނީ ޓްރޯލީ އާއި މޭޒުތައް މަތީގަ އެވެ.
ކޮވިޑުގެ ބަލިމަޑުކަމުގެ ތެރޭގައި މި ބަލި ޖެހިގެން މަރުވާ މީހުންގެ ގަބުރުތައް އާއިލާއާ ހަވާލުކުރުމުގެ ބަދަލުގައި ނައްތާލަނީ ދައުލަތުންނެވެ.
ރޮހާނާ ވިދާޅުވީ ކޭސްތައް އެހާ ގިނަވުމުން ކޮންޓެކްޓް ޓްރޭސް ކުރުމަކީ މިހާރު ކުރެވޭނެ ކަމެއް ނޫން ކަމަށެވެ.
ހޮސްޕިޓަލްްތައް ފުރި ފަރުވާގެ އިންތިޒާރުގައި މަޑުކޮށްގެން ތިއްބައި ގިނަ ބަޔަކު މަރުވަމުންދާ ކަމުގެ ރިޕޯޓުތައް ފެތުރެން ފަށާފައި ވަނިކޮށް މިދިޔަ ހުކުރު ދުވަހު ލަންކާގައި ފިޔަވަޅުތައް ވަނީ ވަރުގަދަކޮށްފަ އެވެ.
އެގޮތުން ސެޕްޓެމްބަރު އެއް ވަނަ ދުވަހާ ހަމައަށް ދައުލަތުގެ ރަސްމިއްޔާތުތަކާއި އާއްމު އެއްވުންތައް ބޭއްވުން މަނާ ވާނެ އެވެ.
މިދިޔަ އާދީއްތަ ދުވަހާ ހަމައަށް ލަންކާގެ 21 މިލިއަން މީހުންގެ ތެރެއިން 11 މިލިއަން މީހުން ވަނީ އެއް ޑޯޒް ޖަހައިފަ އެވެ. ދެ ޑޯޒް ފުރިހަމަކޮށްފައި ވަނީ 2.93 މިލިއަން މީހުންނެވެ.
ރަސްމީ ތަފާސްހިސާބު ދައްކާ ގޮތުން ލަންކާއިން މިހާތަނަށް 330،000 ކޭސް ފެނިފައި ވެ އެވެ. އަދި މަރުވެފައި ވަނީ 5،107 މީހުންނެވެ.
ނަމަވެސް ރަސްމީ ތަފާސްހިސާބުގައި ގިނަ ކޭސްތަކާއި މަރުތަކެއް ނުހިމެނޭ ކަމަށް ބެލެވޭތީ ހަގީގީ އަދަދު އެއަށްވުރެ މާ މަތިވާނެ ކަމަށް ތަޖުރިބާކާރުން ބުނެ އެވެ.
ކޮވިޑުގެ އާ ރާޅެއް ލަންކާއަށް ކުރިމަތިވެގެން އުޅެނީ ސިންހަޅަ އަދި ތަމަޅަ އާ އަހަރާ ދިމާކޮށް މިދިޔަ އޭޕްރިލް މަހު ފިޔަވަޅުތަކަށް ލުއި ދިން ފަހުންނެވެ.
އެއަށްފަހު މޭ މަހު ފިޔަވަޅުތައް ހަރުކަށި ކުރުމަށް ފަހު އަނެއްކާ ވެސް ޖުލައި 10 ގައި ލުއި ދިނެވެ.
