މި އަހަރުގެ ސާފް ޗެމްޕިއަންޝިޕް ބޭއްވުމުގެ ފުރުސަތު މިއަދު ރާއްޖެ އަށް ލިބުމަކީ ބޮޑު އުފަލެއް ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރާއްޖޭން ފުރަތަމަ ފަހަރަށް ސާފް ޗެމްޕިއަންޝިޕް ބޭއްވީ 2008 ވަނަ އަހަރު ސްރީލަންކާ ގުޅިގެންނެވެ. ރާއްޖޭން އޭގެ ފަހުން ހޯސްޓްކުރި ހަމައެކަނި ބައިނަލްއަގުވާމީ ފުޓްބޯޅަ މުބާރާތަކީ 2014 ވަނަ އަހަރުގެ އޭއެފްސީ ޗެލެންޖް ކަޕް އެވެ.
މި ފަހަރުގެ ސާފް ޗެމްޕިއަންޝިޕް ބޭއްވުމަށް ރާއްޖޭން ބިޑް ކާމިޔާބުކުރީ ނޭޕާލާ ވާދަކޮށެވެ. ބައްދަލުވުމުގައި ބައިވެރިވި ހުރިހާ ގައުމެއްގެ ތާއީދު ލިބުނީ ރާއްޖޭގައި މުބާރާތް ބާއްވާށެވެ.
ރައީސް މިއަދު ކުރެއްވި ޓްވީޓެއްގައި ވަނީ މި މުބާރާތް ރާއްޖޭގައި ބޭއްވުމަށްޓަކައި އެފްއޭއެމާ ގުޅިގެން މަސައްކަތް ކުރި ހުރިހާ ފަރާތަކަށް މަރުހަބާ ދަންނަވާކަމަށެވެ. ރައީސް ވަނީ މިއީ ރާއްޖެ އަށް ލިބުނު ބޮޑު އުފަލެއް ކަމުގައި ވިދާޅުވެފަ އެވެ.
ސާފް ބޭއްވުމުގެ ބިޑް ރާއްޖޭން ކާމިޔާބު ކުރުމުން އެކަމަށްޓަކައި ނައިބު ރައީސް ފައިސަލް ނަސީމް ވެސް ވަނީ އެފްއޭއެމާއި މި ކަމުގައި ޝާމިލުވި އެންމެނަށް މަރުހަބާ ދަންނަވައިފަ އެވެ. ނައިބު ރައީސް ވިދާޅުވީ މިއީ ކާމިޔާބު އިވެންޓަކަށް ވާނެ ކަމުގެ އުއްމީދު އެބައޮތް ކަމަށެވެ.
މިހާރު އޮތްގޮތުން މި ފަހަރުގެ ސާފް ބާއްވަން ތާވަލު ކޮށްފައިވަނީ އޮކްޓޫބަރު 1-15 އަށެވެ.
މި ފަހަރުގެ ސާފް ޗެމްޕިއަންޝިޕަކީ އެންމެ ފުރަތަމަ މިދިޔަ އަހަރު ބަންގްލަދޭޝްގައި ބާއްވަން ނިންމި މުބާރާތެކެވެ. އެކަމަކު މި އަހަރަށް ފަސްކުރަން ޖެހުނީ މިދިޔަ އަހަރު ކޮވިޑް-19ގެ ހާލަތު ވަރަށް ބޮޑަށް ގޯސްވުމުންނެވެ. ގިނަ މަސައްކަތްތަކެއް ކޮށްގެން ވެސް މި އަހަރު ބަންގްލަދޭޝްގައި މުބާރާތް ހޯސްޓްކުރަން ކުރި މަސައްކަތް ކާމިޔާބުވާ ގޮތެއްނުވި އެވެ. އެހެންވެ، ޖެހުނީ މުބާރާތް ބާއްވާނެ ގައުމެއް ކަނޑައަޅަން ބިޑަށް ހުޅުވާލާށެވެ. ބިޑް ކާމިޔާބުކުރީ ރާއްޖޭންނެވެ.
އެންމެ ފަހުން ސާފް ޗެމްޕިއަންޝިޕް ބޭއްވީ 2018 ވަނަ އަހަރު ބަންގްލަދޭޝްގެ ޑާކާގަ އެވެ. އެ ފަހަރުގެ މުބާރާތުގެ ފައިނަލުގައި އިންޑިއާ ބަލިކޮށް ރާއްޖޭން ވަނީ ދެ ވަނަ ފަހަރަށް ސަރަހައްދުގެ ޗެމްޕިއަންކަން ހޯދައިފަ އެވެ.
މި ފަހަރުގެ ސާފް ޗެމްޕިއަންޝިޕްގައި ޔަގީނުން ވެސް ޕާކިސްތާނަށް ނުކުޅެވޭނެ އެވެ. އެއީ އެ ގައުމު މި ވަގުތު އޮތީ ފީފާގެ ސަސްޕެންޝަނެއްގައި ކަމަށްވާތީ އެވެ. ބޫޓާނުން މީގެ ކުރިން މުބާރާތުގައި ނުކުޅެވޭނެކަމަށް އަންގާފައިވީ ނަމަވެސް މުބާރާތް ރާއްޖޭގައި ހޯސްޓްކުރާނަަމަ ބޫޓާން ވެސް ކުޅުމުގެ ފުރުސަތު ބޮޑެެވެ. ބޫޓާނުން މިއަދުގެ ސާފް ބައްދަލުވުުގައި އަންގާފައިވަނީ މުބާރާތުގައި ބައިވެރިވުވާ މެދު ކުރިއަށް އޮތް ދެ ދުވަހެއްގެ ތެރޭ ގޮތެއް ނިންމާނެ ކަމަށެވެ.
މި ވަގުތު ސާފްގައި ބައިވެރިވާނެކަން އިއުލާނު ކޮށްފައިވަނީ ރާއްޖެ، އިންޑިއާ، ނޭޕާލް، ބަންގްލަދޭޝް އަދި ސްރީލަންކާ އެވެ. ފަސް ޓީމުގެ މެދުގައި ކުޅޭނަމަ ފުރަތަމަ އޮންނާނީ ލީގު ބުރެކެވެ. އެ އަށް ފަހު އެންމެ މަތިން ނިންމާ ދެ ގައުމެއް ފައިނަލްގައި ކުޅޭގޮތަށެވެ. ބޫޓާން ވާދަކުރާނަމަ މުބާރާތް ބާއްވާނީ ހަ ޓީމުގެ މެދުގައި ދެ ގްރޫޕަށް ބަހާލައިގެންނެވެ.
