މާލޭގެ ބްލޮކްތަކުގެ ވެރިން ކަނޑައެޅުމަށް އިންތިހާބެއް ބާއްވަން ނިންމައި އެ މަގާމުތަކަށް ކުރިމަތިލުމުގެ ފުރުސަތު ސިޓީ ކައުންސިލުން އިއްޔެ ހުޅުވާލައިފި އެވެ.
ބުލޮކްތަކުގެ ވެރިން ހޮވުމަށް ބާއްވާ އިންތިހާބު އޮންނާނީ އޮކްޓޫބަރު ނުވަ ވަނަ ދުވަހެވެ. އެ މަގާމަށް ކުރިމަތިލުމުގެ މުއްދަތު މިއަދުން ފެށިގެން މިމަހުގެ 26 އާ ހަމައަށް ވަނީ ހުޅުވާލައިފަ އެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ މާލޭގެ ބްލޮކްތަކުގެ ވެރިން ހޮވަނީ، ސިޓީ ކައުންސިލާ އެކު ރައްޔިތުންނާ ގާތުން ހިދުމަތް ދިނުމަށް ކަމަށެވެ. ކައުންސިލްގެ ޕްލޭންތަކާއި މަސައްކަތްތައް އަދި ރައްޔިތުންގެ ހިޔާލާއި މަޝްވަރާ ހޯދުމުގައި ވެސް އެ މަންދޫބުންގެ އިސް ދައުރެއް އޮންނާނެ ކަން އޭނާ ފާހަގަކުރެއްވި އެވެ.
"މިއީ ރައްޔިތުންނާ ގާތުން ހިދުމަތް ދިނުމަށް ކައުންސިލްތަކާ ގުޅިގެން މަސައްކަތް ކުރާނެ އަދި މުއާމަލާތްކުރާނެ މަންދޫބުންތަކެއް،" މުއިއްޒު ވިދާޅުވި އެވެ.
ކުރިމަތިލެވޭ މީހުންގެ ޝަރުތުތައް
- އަށާރަ އަހަރު ފުރިފައިވާ ދިވެއްސެއްކަމުގައި ވުން.
- އެ މީހަކު އެ ކުރިމަތިލާ ބުލޮކެއްގައި ދިރިއުޅޭ މީހެއްކަމުގައިވުން.
- ވައްކަން، ޓެކުން، ފޭރުން، ނުވަތަ ކޮރަޕްޝަނުގެ ކުށެއް ސާބިތުވެފައިނުވާ މީހެއް ކަމުގައިވުން.
- އެއްވެސް މީހަކަށް އަދި ކުޑަކުއްޖަކަށް، ޖިންސީ ޖިސްމާނީ ހާނިއްކައެއް ކުރި މައްސަލައެއްގައި ހިމެނޭ މީހަކަށް ނުވުން.
- ޖިނާއީ ކުށެއް ސާބިތުވެފައި ވާނަމަ ހުކުމް ތަންފީޒު ކުރެވުނުތާ ތިން އަހަރު ވެފައިވުން.
- އިންތިހާބު ކުރެވޭ އެއްވެސް އެހެން މަގާމެއްގައި ހުރި މީހަކު ކަމުގައި ނުވުން.
- މުސްތަގިއްލު މުއައްސަސާއެއްގެ ނުވަތަ ސިޔާސީ މަގާމެއް ފުރާ މީހެއް ކަމުގައި ނުވުން.
އިންތިހާބަށް ކުރިމަތިލާ ފޯމް ހުށަހަޅަން ޖެހެނީ އެ ބްލޮކެއްގައި ދިރިއުޅޭ 10 މީހެއްގެ ސޮޔާއެކު އެވެ. ބްލޮކް ވެރިންނަކީ މުސާރަ ލިބޭ މަގާމެއް ނޫން ކަމަށް ކައުންސިލުން ބުންޏެވެ.
