ސްޓެލްކޯ އާއި އެމްޑަބްލިއުއެސްސީން ބަންދުކޮށް، އެ ދެ ކުންފުނީގެ އިމާރާތުގެ ގޯތީގެ ތެރެއަށް ވައްދާފައިވާ މަގުތަކެއް ހުޅުވާލަން ސިޓީ ކައުންސިލުން އަންގައި، އެކަމަށް މުހުލަތެއް ދީފި އެވެ.
ސިޓީ ކައުންސިލުން ހުޅުވާލަން އަންގާފައިވަނީ ސްޓެލްކޯއިން ބަންދުކޮށްފައިވާ ތިން މަގަކާއި އެމްޑަބްލިއެެސްސީން ބަންދުކޮށްފައިވާ ދެ މަގެއްގެ ބައެކެވެ.
ހުޅުވާލަން އަންގާފައިވަނީ ސްޓެލްކޯގެ ހެޑް އޮފީހާއި ކުޑަކުދިންގެ ޕާކާ ދެމެދު އޮންނަ ކުޑަ ގޯޅި އާއި ހެޑް އޮފީހާއި ޕާކްގެ ފަހަތަށް އޮންނަ މަގެވެ.
އަދި، ސްޓެލްކޯގެ ހެޑް އޮފީސް ފަހަތަށް އޮތް ކޮއްޓާ ޖެހިގެން އޮންނަ ދޮންއަދަރާދަ ހިނގުމުގެ ބައެއް ވެސް ހުޅުވާލަން ސިޓީ ކައުންސިލުން އެންގި އެވެ.
އެމްޑަބްލިއުއެސްސީއަށް އަންގާފައިވަނީ އެ ކުންފުނީގެ ހެޑް އޮފީސް ވަށާ އޮންނަ ފަޅުމަތީ މަގާއި ނިކަގަސް ހިނގުމުގެ ބަންދުކޮށްފައިވާ ސަރަހައްދު ހުޅުވާލުމަށެވެ.
މާލޭ ސިޓީގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވި ގޮތުގައި އެ މަގުތައް ހުޅުވާލަން އެންގީ، އެ މަގުތައް ބަންދުކޮށްފައިވާތީ ދިމާވާ ދަތި އުނދަގޫތަކުގެ ޝަކުވާ ކައުންސިލަށް ލިބެމުންދާތީ އެވެ.
ދެ ކުންފުންޏަށް މަގުތައް ހުޅުވާލަން ސިޓީ ކައުންސިލުން ދީފައިވަނީ އެއް މަސް ދުވަހުގެ މުއްދަތެއް ކަމަަށް މުއިއްޒު ވިދާޅުވި އެވެ.
ސްޓެލްކޯ އާއި އެމްޑަބްލިއުއެސްސީގެ މަސައްކަތްތަކަށް ފަސޭހަ ކުރުމުގެ ގޮތުން ބަންދުކޮށްފައިވާ މަގުތައް ހުޅުވާލަން އަންގާފައިވާއިރު، ސްޓެލްކޯއިން ވަނީ އެ މަގުތައް ބަންދުކުރުމަށްފަހު އެ ސަރަހައްދުގައި މަސައްކަތްތައް ވެސް ކުރަމުންނެވެ.
ދެ ކުންފުންޏަކުން ބަންދުކޮށްފައިވާ މަގުތައް ހުޅުވާލަން ސިޓީ ކައުންސިލުން އަންގާފައިވާއިރު އިންޑަސްޓްރިއަލް ވިލެޖުގައި ސްޓެލްކޯއަށް ދީފައިވާ ބިމެއް ވެސް ސިޓީ ކައުންސިލުން ވަނީ ހުސްކޮށްފަ އެވެ. އެތަން އެންގުމަކާ ނުލައި ހުސްކުރި މައްސަލާގައި ސްޓެލްކޯއިން ފުލުހަށް ވެސް ދިޔަ އެވެ.
ޕްލޭނިން މިނިސްޓްރީން މިހާރު ވަނީ އެ ބިމަކީ ސިޓީ ކައުންސިލްގެ ބިމެއް ނޫން ކަމަށް އެ ކައުންސިލަށް އަންގާފަ އެވެ.
