ކާބުލް، އަފްގާނިސްތާން (އޯގަސްޓު 7) - ފާއިތުވި 24 ގަޑިއިރު ތެރޭގައި އަފްގާނިސްތާނުގެ ދެ ސިޓީއެއްގެ ފުރިހަމަ ކޮންޓްރޯލް ތާލިބާނުން ހޯދައިފި އެވެ.
ޖައުޒްޖަން ޕްރޮވިންސްގެ ވެރިރަށް، ޝެބެރްގާން ސިޓީގެ ޑެޕިއުޓީ ގަވަރުނަރު ވިދާޅުވީ ސިފައިންނާއި ސަރުކާރުގެ އޮފިޝަލުން އެ ސިޓީ ދޫކޮށް ކައިރީގައިވާ އެއާޕޯޓަކަށް ގޮސްފައިވާ ކަމަށެވެ.
"ސިޓީގެ ފުރިހަމަ ކޮންޓްރޯލް މިހާރު އޮތީ ތާލިބާނުންގެ އަތުގައި،" ޑެޕިއުޓީ ގަވަރުނަރު ގާދިރު މާލިއާ އޭއެފްޕީއަށް ވިދާޅުވި އެވެ.
ޝެބެރްގާން ސިޓީއަކީ އަފްގާނިސްތާނުގައި ތާލިބާނުންނާ ދެކޮޅަށް ވަރުގަދަ އަސްކަރީ މަސައްކަތްތަކެއް ކުރި ލީޑަރު އަބްދުލް ރާޝިދު ދޮސްތުމް ނިސްބަތްވާ ސިޓީ އެވެ.
ތުރުކީން ސިއްހީ ފަރުވާ ހޯދުމަށް ފަހު އޭނާ އެނބުރި އަފްގާނިސްތާނަށް އައީ މިދިޔަ ހަފްތާގަ އެވެ. ނަމަވެސް މި ވަގުތު އޭނާ ހުރީ ވެރިރަށް ކާބުލްގައި ކަމަށްވެ އެވެ.
ބޭރު ސިފައިން މިދިޔަ މޭ މަހު އަފްގާނިސްތާނުން ފައިބަން ފެށުމާއެކު ތާލިބާނުން ވަނީ ހަނގުރާމަ ވަރުގަދަކޮށް ރަށްފުށުގެ ބޮޑު ހިސާބެއް ހިފައިފަ އެވެ.
ހުކުރު ދުވަހު ނިމްރޯޒް ޕްރޮވިންސްގެ ވެރިރަށް ޒަރާންޖެ ސިޓީގެ ފުރިހަމަ ކޮންޓްރޯލް ތާލިބާނުންނަށް ލިބުނީ "ހަނގުރާމަ ކުރުމަކާ ނުލަ" އެވެ. އެއީ އެ މީހުންނަށް ހިފުނު ފުރަތަމަ ސިޓީ އެވެ.
އެއާ ހިލާފަށް ޝެބެރްގާން ހިފަން ހަނގުރާމަވެރިން މަސައްކަތް ކުރުމުން އެ މީހުންނާ ދެކޮޅަށް ހަމަލާ ދިން ކަމަށް ރިޕޯޓުތައް ބުނެ އެވެ. ނަމަވެސް ދޮސްތުމްގެ ގާތް މީހަކު ބުނީ ތާލިބާނުން ސިޓީ ހިފާފައިވާ ކަމަށެވެ.
ދޮސްތުމް އަކީ 1990 ގެ އަހަރުތަކުގައި އަފްގާނިސްތާނުގެ އުތުރުގައި ތާލިބާނުންނާ ދެކޮޅަށް ގިނަ އަދަދެއްގެ ހަނގުރާމަވެރިން ނެރުނު މީހެކެވެ. އޭނާގެ ގްރޫޕުން ހަނގުރާމައިގެ ޖަރީމާ ހިންގި ކަމަށް ވެސް ތުހުމަތު ކުރެވެ އެވެ.
ދޮސްތުމްގެ ގްރޫޕުގެ މެމްބަރުން ޝެބެރްގާން ދޫކޮށް ފިލުމުން ސަރުކާރަށް ވަނީ ބޮޑު ގެއްލުމެއް ލިބިފަ އެވެ. ސަރުކާރުން އުއްމީދު ކުރީ ހަނގުރާމަވެރި ގްރޫޕުތަކުގެ އެހީއާއެކު ތާލިބާނުން ބަލިކުރެވޭނެ ކަމަށެވެ.
ބޭރުގެ ސިފައިން އަފްގާނިސްތާން ދޫކޮށް ދާން ފެށުމާ ދިމާކޮށް ތާލިބާނުން ވަރުގަދަ ކުރި ހަނގުރާމައިގައި ފުރަތަމަ ފަހަރަށް ޕްރޮވިންސެއްގެ ވެރިރަށް ހިފީ ހުކުރު ދުވަހު އެވެ.
"ނިމްރޯޒް ޕްރޮވިންސްގެ ވެރިރަށް، ޒަރަންޖް ސިޓީ ވަނީ ތާލިބާނުންގެ އަތް ދަށުގައި،" ޑެޕިއުޓީ ގަވަރުނަރު ރޫހު ގުލް ހައިރްޒާދް އޭއެފްޕީއަށް ވިދާޅުވި އެވެ.
އޭނާ ވިދާޅުވީ އަފްގާނިސްތާނުގެ ހުޅަނގު ދެކުނުގައި އިރާނު ބޯޑަރު ކައިރީގައި އޮންނަ ސިޓީ ތާލިބާނުންގެ ހިފީ "އެއްވެސް ހަނގުރާމަ ކުރުމަކާ ނުލައި" ކަމަށެވެ.
ސޯޝަލް މީޑިއާގައި ދައުރުވި ވީޑިއޯތަކުން ފެންނަނީ ހަނގުރާމަވެރިން މަގުތަކުގައި އުޅޭއިރު، އާއްމުން އުފާ ފާޅުކުރާ މަންޒަރެވެ. ނަމަވެސް އެއީ ސައްހަ ވީޑިއޯތަކެއް ކަމެއް ކަށަވަރު ކުރެވިފައެއް ނުވެ އެވެ.
ރިޕޯޓުތައް ބުނާ ގޮތުން ޒަރަންޖް ސިޓީ ހިފުމަށް ފަހު ތާލިބާނުން އެންމެ ފުރަތަމަ ވެސް ކުރި ކަމަކީ އެ ތަނުގެ ޖަލުގެ ގޭޓުތައް ހުޅުވުމެވެ.
އެއާއެކު ބަންދުކޮށްފައި ތިބި ތާލިބާން ހަނގުރާމަވެރިންނާއި އާއްމު ކުށްވެރިން ވެސް މަގުތަކަށް ނިކުތެވެ. ޓްވިޓާގައި ދައުރުވި ވީޑިއޯތަކުން ފެނުނީ ގިނަ ބަޔަކު ސަރުކާރު އޮފީސްތައް ލޫޓުވާ ތަކެތި ވަގަށް ނަގަމުން ދިޔަ މަންޒަރެވެ.
"ތާލިބާނުން ފެތުރި ޕްރޮޕެގެންޑާގެ ސަބަބު ސިފައިންގެ އަމާން ދިނީ،" ނަން ހާމަ ނުކުރާ އެ ސިޓީގެ އޮފިޝަލަކު އޭއެފްޕީއަށް ވިދާޅުވި އެވެ.
ޒަރަންޖް އާއި ޝެބެރްގާންގެ ކޮންޓްރޯލް ގެއްލުމާ ގުޅޭ ގޮތުން އަފްގާން ސަރުކާރުން މިހާތަނަށް ވަކި އެއްޗެއް ބުނެފައެއް ނުވެ އެވެ.
އެ ދެ ސިޓީ ހިފުމުގެ ކުރިން ހުކުރު ދުވަހު ތާލިބާނުން ވަނީ އަފްގާނިސްތާން ސަރުކާރުގެ މީޑިއާ އިންފޮމޭޝަން ޑިޕާޓްމަންޓުގެ ވެރިޔާ ވެސް އަވަހާރަކޮށްލާފަ އެވެ.
މިދިޔަ ހަފްތާގައި ތާލިބާނުން ވަނީ އިސް އޮފިޝަލުންނަށް އަމާޒުކޮށް ހަމަލާ ދޭނެ ކަމަށް ބުނެފަ އެވެ. އެއީ ސަރުކާރުން ދޭ ވައިގެ ހަމަލާތަކުގެ ރައްދުގަ އެވެ.
އަފްގާނިސްތާނުގެ ދިގު ދާހިލީ ހަނގުރާމަ ހޫނުވީ މިދިޔަ މޭ މަހު ބޭރުގެ ސިފައިން ފައިބަން ފެށުމުންނެވެ. މިހާރު ވެސް ރަށްފުށުގެ ބޮޑު ހިސާބެއް ކޮންޓްރޯލް ކުރަނީ ތާލިބާނުންނެވެ. އަދި ޕްރޮވިންސް ވެރިރަށްތައް ހިފުމަށް ކެނޑިނޭޅި ދަނީ ހަމަލާ ދެމުންނެވެ.
