ނިއު ދިއްލީ، އިންޑިއާ (އޯގަސްޓު 6) - އިންޑިއާ އާއި ޗައިނާގެ ހިޔާލު ތަފާތުވުން ބޮޑު ބޯޑަރު ސަރަހައްދުގައި މިދިޔަ އަހަރު ނުރައްކާތެރި ކުރިމަތިލުންތަކެއް ހިނގި ލަޑަކް ހިސާބުން ދެ ގައުމުގެ ސިފައިން އަނބުރާ ގެންގޮސްފި އެވެ.
ހިމަލަޔާ ފަރުބަދަ ސަރަހައްދުގައި އޮންނަ އުސް ލަޑަކް ހިސާބުގައި މިދިޔަ އަހަރު ދެ ގައުމުން ހަމަލާ ބަދަލު ކުރުމަށް ފަހު އެތައް ހާސް ސިފައިންނެއް ފޮނުވާ ހަނގުރާމަ ފަށަން ތައްޔާރުވި އެވެ.
އިންޑިއާ އަސްކަރިއްޔާ އިން ބުނީ މަޝްވަރާ ކުރުމަށް ފަހު ފާއިތުވި ދެ ދުވަސް ތެރޭގައި ޗައިނާ ސިފައިން ހަތިޔާރު ބެހެއްޓުމަށް ފަހު އަނބުރާ ގޮސްފައިވާ ކަމަށެވެ.
"މިދިޔަ އަހަރުގެ މޭ މަހުން ފެށިގެން އެ ސަރަހައްދުގައި ދެ ގައުމުގެ ސިފައިން ވެސް ތިބީ ކޮންމެ ވަގުތަކު ވެސް ހަމަލާ ދޭން ތައްޔާރަށް،" އިންޑިއާ އަސްކަރިއްޔާގެ ބަޔާނުގައި ބުންޏެވެ.
މިދިޔަ އަހަރު ޖޫން 15 ވަނަ ދުވަހު ލަޑަކް ކައިރީގައި އޮންނަ ގަލްވަން ވެލީގައި އިންޑިއާ އާއި ޗައިނާ ސިފައިން ހަމަލާ ބަދަލުކުރި އެވެ. އެ ހަމަލާތަކުގައި އިންޑިއާ ސިފައިންގެ 20 މީހުން މަރުވި އެވެ. ޗައިނާއިން މަރުވި ސިފައިންގެ އަދަދު ހާމަކޮށްފައެއް ނުވެ އެވެ.
އެ ހަމަލާތަކާ އެކު ދެ ގައުމުގެ ވާދަވެރި ގުޅުން ވަރަށް ބޮޑަށް ގޯސްވި އެވެ.
ނަވާރަ ސަތޭކަ ފަސްދޮޅަސް ދެ ވަނަ އަހަރު ބޯޑަރު ސަރަހައްދުގައި އިންޑިއާ އާއި ޗައިނާއިން ހަނގުރާމަ ކުރި އެވެ. އޭރުން ފެށިގެން ވެސް ޖެހިފައި އޮތް މައްސަލައަކީ ބިމުގެ މައްސަލަ އެވެ. ދެ ގައުމުގެ މެދުގައި ނުރަސްމީ ބޯޑަރު "ލައިން އޮފް އެކްޗުއެލް ކޮންޓްރޯލް (އެލްއޭސީ)" ގާއިމްކޮށްފައި ވާއިރު ބޯޑަރު ފޫ އަޅުވާލުމަށް ފަހު ބިން ހިފަން އުޅޭ ކަމަށް އެއް ގައުމުން އަނެއް ގައުމަށް ތުހުމަތު ކުރެ އެވެ.
ލަޑަކް ހިސާބަށް އެތައް ހާސް ސިފައިން ފޮނުވައި ހަނގުރާމަ ފަށަން ތައްޔާރަށް ތިބިއިރު، ދެ ގައުމުން ވަނީ މައްސަލަ ހައްލު ކުރެވޭތޯ ގިނަ އަދަދެއްގެ އަސްކަރީ އަދި ޑިޕްލޮމެޓިކް މަޝްވަރާތައް ބާއްވާފަ އެވެ. އެންމެ ފަހުގެ މަޝްވަރާތައް އޮތީ މިދިޔަ ހޮނިހިރު ދުވަހު އެވެ.
އިންޑިއާ ސިފައިން ބުނީ އެ ސަރަހައްދުގައި ގާއިމް ކުރި ހުރިހާ ވަގުތީ ސްޓްރަކްޗާއެއް ނެގުމަށް ފަހު އާއްމު ހާލަތަށް ރުޖޫއަވެފައިވާ ކަމަށެވެ.
"މި އެއްބަސްވުމުން ލިބޭ ޔަގީންކަމަކީ މި ސަރަހައްދުގެ އެލްއޭސީއަށް ދެ ގައުމުން ވެސް ފުރިހަމަ އަށް އިހްތިރާމުކޮށް، އެއާ އެއް ގޮތަށް އަމަލު ކުރާނެ ކަން".
