ކޮލަމްބޯ، ސްރީ ލަންކާ (އޯގަސްޓު 6) - ހޮސްޕިޓަލްތައް ފުރި ފަރުވާ ނުދެވުމުގެ ސަބަބުން ގިނަ އަދަދެއްގެ ކޮވިޑް ބަލި މީހުން ސްރީ ލަންކާގައި މަރުވަމުންދާ ކަމުގެ ރިޕޯޓުތައް ފެތުރެން ފަށާފައި ވަނިކޮށް އެ ގައުމުގައި އަޅާފައިވާ ރައްކާތެރިކަމުގެ ފިޔަވަޅުތައް ހަރުކަށިކޮށްފި އެވެ.
ސަރުކާރުން ބުނީ ސިއްހީ ކާރިސާގެ ހާލަތު ގޯސްވަމުން ދާތީ ދައުލަތުގެ ރަސްމިއްޔާތުތަކާއި އާއްމު އެއްވުންތައް ބޭއްވުން ސެޕްޓެމްބަރު އެއް ވަނަ ދުވަހުގެ ނިޔަލަށް މަނާ ވާނެ ކަމަށެވެ.
މިދިޔަ ހަފްތާގައި ސިވިލް ސާވަންޓުން އޮފީސްތަކަށް ނިކުންނަން އެންގި ނަމަވެސް، އެ ނިންމުން ވަނީ އަނބުރާ ގެންގޮސްފަ އެވެ. އޭގެ ބަދަލުގައި ވީހާވެސް ގިނަ ބަޔަކު ގޭގައި ތިބެގެން މަސައްކަތް ކުރެވޭ ގޮތަށް ރޭވުމަށް ވެރިންނަށް ވަނީ އަންގާފަ އެވެ.
ފިޔަވަޅުތައް ހަރުކަށިކޮށްފައި މި ވަނީ މިދިޔަ ހަފްތާގައި ރިޕޯޓުކުރި ކޭސްތަކާއި މަރުތަކުގެ އަދަދު އޭގެ ކުރީ މަހާ އަޅާ ބަލާއިރު ދެ ގުނަ އިތުރުވެފައި ވަނިކޮށެވެ.
ލަންކާ ސަރުކާރުން ހިންގާ ކޮޮލަމްބޯ ސައުތު ހޮސްޕިޓަލުގައި ތިން ބަލިމީހުން އެއް އެނދެއްގައި ބާއްވާފައިވާ މަންޒަރު ފެންނަ ފޮޓޯތައް ނޫސްވެރިޔާ ތިލަކްޝާނީ މަޑުވަންތީ ވަނީ ސޯޝަލް މީޑިއާގައި އާއްމުކޮށްފަ އެވެ.
އޭނާ ބުނީ ބަލި ދެމީހަކު އޭނާގެ ކުރިމަތީގައި މަރުވީ ފަރުވާ ލިބޭނެ އިރެއްގެ އިންތިޒާރުގައި މަޑުކޮށްގެން ތިއްބައި ކަމަށެވެ. ސިއްހީ މަސައްކަތްތެރިން ތިބީ ވަރުބަލިވެފައި ކަމަށާއި އެނދުތައް ފުރިގެން ގަސްގަހުގެ ހިޔަލުގައި ބަލި މީހުން ބާއްވައިގެން ވެސް ފަރުވާދެމުންދާ ކަމަށް އޭނާ ބުންޏެވެ.
"މީގެ މަސްތަކެއް ކުރިން އިންޑިއާގައި ދިމާވި ކަންކަން އަހަރުމެން ރިޕޯޓު ކުރިން. މިއަދު އެ މަންޒަރު ފެންނަމުން މި ދަނީ އަހަރުމެންގެ ލޯ ކުރިމަތިން،" ފޭސްބުކްގައި ގިނަ ބަޔަކު ޝެއާކޮށްފައިވާ ޕޯސްޓުގައި އޭނާ ލިޔެފައިވެ އެވެ.
ސޯޝަލް މީޑިއާގައި ދައުރުވަމުންދާ އިތުރު ޕޯސްޓުތަކުން ފެންނަނީ ގިނަ އަދަދެއްގެ ގަބުރުތަކެއް ކޮލަމްބޯ ކައިރީގައި ހުންނަ ދެ ހޮސްޕިޓަލެއްގެ ބޭރުގައި ފުނި ފުންޏަށް ޖަހާފައިހުރި މަންޒަރެވެ.
ޕްރައިވެޓް އެއްވުންތައް ބޭއްވުން އަދިވެސް ލަންކާގައި މަނާ ނުކުރެ އެވެ. ނަމަވެސް އެފަދަ އެއްވުންތަކަށް ދެވޭނެ މީހުންގެ އަދަދެއް ވަނީ ކަނޑައަޅާފަ އެވެ.
ޖަނާޒާތަކަށް ދެވޭނެ މީހުންގެ އަދަދު ވަނީ 150 އިން 25 އަށް ތިރިކޮށްފަ އެވެ. ކައިވެނި ހަފުލާތަކަށް ދެވޭނެ އަދަދު ވަނީ 500 އިން 150 އަށް ތިރިކޮށްފަ އެވެ.
ލަންކާގައި އަޅާފައި ހުރި ފިޔަވަޅުތަކަށް މިދިޔަ މަހު ލުއި ދިނީ ވެކްސިން ޕްރޮގްރާމުގެ ދުވެލި އަވަސް ކުރުމަށް ފަހު އެވެ.
ލަންކާގެ 21 މިލިއަން މީހުންގެ ތެރެއިން މިދިޔަ ބުރާސްފަތި ދުވަހާ ހަމައަށް 10 މިލިއަން މީހުން ވަނީ އެއް ޑޯޒް ޖަހައިފަ އެވެ. ދެ ޑޯޒް ފުރިހަމަކޮށްފައި ވަނީ 2.67 މިލިއަން މީހުންނެވެ.
ވެކްސިން ކެމްޕޭން ބާރަށް ކުރިއަށް ދިޔަ ނަމަވެސް، ކޭސްތަކުގެ އަދަދު ވަނީ ދެ ގުނައަށް ވުރެ އިތުރުވެ ދުވާލަކު 2،500 އަށް އަރައިފަ އެވެ. ދުވާލެއްގެ މައްޗަށް މަރުވާ މީހުންގެ އަދަދު އުޅެނީ 80 ގަ އެވެ.
ރަސްމީ ތަފާސްހިސާބު ދައްކާ ގޮތުން ލަންކާއިން މިހާތަނަށް 325،000 ކޭސް ފެނިފައި ވެ އެވެ. އަދި މަރުވެފައި ވަނީ 4،817 މީހުންނެވެ.
ނަމަވެސް ރަސްމީ ތަފާސްހިސާބުގައި ގިނަ ކޭސްތަކާއި މަރުތަކެއް ނުހިމެނޭ ކަމަށް ބެލެވޭތީ ހަގީގީ އަދަދު އެއަށްވުރެ މާ މަތިވާނެ ކަމަށް ތަޖުރިބާކާރުން ބުނެ އެވެ.
ކޮވިޑުގެ އާ ރާޅެއް ލަންކާއަށް ކުރިމަތިވެގެން އުޅެނީ ސިންހަޅަ އަދި ތަމަޅަ އާ އަހަރާ ދިމާކޮށް މިދިޔަ އޭޕްރިލް މަހު ފިޔަވަޅުތަކަށް ލުއި ދިން ފަހުންނެވެ.
އެއަށްފަހު މޭ މަހު ފިޔަވަޅުތައް ހަރުކަށި ކުރުމަށް ފަހު އަނެއްކާ ވެސް ޖުލައި 10 ގައި ލުއި ދިނެވެ.
