ކާބުލް، އަފްގާނިސްތާން (އޯގަސްޓު 6) - ބޭރުގެ ސިފައިން އަފްގާނިސްތާން ދޫކޮށް ދާން ފެށުމާ ދިމާކޮށް ތާލިބާނުން ވަރުގަދަ ކުރި ހަނގުރާމައިގައި ފުރަތަމަ ފަހަރަށް ޕްރޮވިންސެއްގެ ވެރިރަށް ހިފައިފި އެވެ.
"ނިމްރޯޒް ޕްރޮވިންސްގެ ވެރިރަށް، ޒަރަންޖް ސިޓީ ވަނީ ތާލިބާނުންގެ އަތް ދަށުގައި،" ޑެޕިއުޓީ ގަވަރުނަރު ރޫހު ގުލް ހައިރްޒާދް އޭއެފްޕީއަށް ވިދާޅުވި އެވެ.
އޭނާ ވިދާޅުވީ އަފްގާނިސްތާނުގެ ހުޅަނގު ދެކުނުގައި އިރާނު ބޯޑަރު ކައިރީގައި އޮންނަ ސިޓީ ތާލިބާނުންގެ ހިފީ "އެއްވެސް ހަނގުރާމަ ކުރުމަކާ ނުލައި" ކަމަށެވެ.
ސޯޝަލް މީޑިއާގައި ދައުރުވި ވީޑިއޯތަކުން ފެންނަނީ ހަނގުރާމަވެރިން މަގުތަކުގައި އުޅޭއިރު، އާއްމުން އުފާ ފާޅުކުރާ މަންޒަރެވެ. ނަމަވެސް އެއީ ސައްހަ ވީޑިއޯތަކެއް ކަމެއް ކަށަވަރު ކުރެވިފައެއް ނުވެ އެވެ.
ޒަރާންޖް ސިޓީގެ ކޮންޓްރޯލް ތާލިބާނުންނަށް ލިބިފައި ވާއިރު، ހުކުރު ދުވަހު އެ މީހުން ވަނީ އަފްގާނިސްތާން ސަރުކާރުގެ މީޑިއާ އިންފޮމޭޝަން ޑިޕާޓްމަންޓުގެ ވެރިޔާ ވެސް އަވަހާރަކޮށްލާފަ އެވެ.
މިދިޔަ ހަފްތާގައި ތާލިބާނުން ވަނީ އިސް އޮފިޝަލުންނަށް އަމާޒުކޮށް ހަމަލާ ދޭނެ ކަމަށް ބުނެފަ އެވެ. އެއީ ސަރުކާރުން ދޭ ވައިގެ ހަމަލާތަކުގެ ރައްދުގަ އެވެ.
ދަވާ ހާން މެނަޕާލް އަވަހާރަކޮށްލާފައި ވާއިރު، ހަނގުރާމައިގައި ލޭ އޮހުރުވުން އިތުރުވެ، ވެރިރަށް ކާބުލްގައި ދޭ ހަމަލާތައް ވެސް ވަނީ އިތުރު ވާން ފަށާފަ އެވެ.
އަފްގާނިސްތާނުގެ ހާލަތު ގޯސްވަމުން ދާތީ އދ. ގެ ސެކިއުރިޓީ ކައުންސިލުގެ ހާއްސަ ބައްދަލުވުމެއް ބާއްވަން ވަނީ ތާވަލުކޮށްފަ އެވެ.
"ކަން ދިމާކުރި ގޮތުން އަނިޔާވެރި ޓެރަރިސްޓުން އަނެއްކާވެސް މި ވަނީ ފިނޑި އަމަލެއް ހިންގައި، އަގުހުރި އަފްގާން ރައްޔިތަކު ޝަހީދުކޮށްލާފައި،" މެނަޕާލް އަވަހާރަވުމާ ގުޅިގެން އިންޓީރިއާ މިނިސްޓްރީގެ ތަރުޖަމާނު މިރްވައިސް ސްތަނިކްޒާއީ ވިދާޅުވި އެވެ.
މެނަޕާލްއަކީ ކާބުލްގެ މީޑިއާ ކޮމިއުނިޓީގައި މަގްބޫލު މީހެކެވެ. ސޯޝަލް މީޑިއާގައި ތާލިބާނުންނަށް ޖޯކު ޖަހައި އެ މީހުންގެ އަގު ވައްޓާލުމަށް އޭނާ އިސް ދައުރެއް އަދާ ކުރަމުން ދިޔަ އެވެ.
މެނަޕާލް އަވަހާރަކޮށްލުމަށް ފަހު އެކަމުގެ ޒިންމާ ތާލިބާނުން ވަނީ ނަގައިފަ އެވެ. ތަރުޖަމާނު ޒަބީހުﷲ މުޖާހިދު މީޑިއާއަށް ދިން މެސެޖެއްގައި ބުނީ "އޭނާ މަރާލީ މުޖާހިދުން ދިން ހާއްސަ ހަމަލާއެއްގައި" ކަމަށެވެ.
މިދިޔަ ބުދަ ދުވަހު ތާލިބާނުން ވަނީ އަފްގާން ސަރުކާރުގެ ވެރިންނާއި އެ މީހުންނާ ގުޅުން ހުރި ފަރާތްތަކަށް އަމާޒުކޮށް ހަމަލާ ދޭނެ ކަމުގެ އިންޒާރު ދީފަ އެވެ.
އޭގެ އެއް ދުވަސް ކުރިން ޑިފެންސް މިނިސްޓަރު ބިސްމިﷲ މުހައްމަދީ އަވަހާރަކޮށްލަން ދިން ހަމަލާއަކުން ސަލާމަތްވެ ވަޑައިގެންނެވީ ހަމަ ކިރިޔާ އެވެ.
އަފްގާނިސްތާނާއި އެމެރިކާ ސިފައިން ވަނީ ތާލިބާނުންނަށް އަމާޒުކޮށް ދޭ ވައިގެ ހަމަލާތައް ވަރުގަދަކޮށްފަ އެވެ. އޭގެ ބޭނުމަކީ ހަނގުރާމަވެރިން ސިޓީތަކާ ދުރަށް ޖެއްސުމެވެ.
އަފްގާނިސްތާނުގެ ދިގު ދާހިލީ ހަނގުރާމަ ހޫނުވީ މިދިޔަ މޭ މަހު ބޭރުގެ ސިފައިން ފައިބަން ފެށުމުންނެވެ. މިހާރު ވެސް ރަށްފުށުގެ ބޮޑު ހިސާބެއް ކޮންޓްރޯލް ކުރަނީ ތާލިބާނުންނެވެ. އަދި ޕްރޮވިންސް ވެރިރަށްތައް ހިފުމަށް ކެނޑިނޭޅި ދަނީ ހަމަލާދެމުންނެވެ.
