ޕޯޓް ލުއީ، މޮރިޝަސް (އޯގަސްޓު 5) - މޮރިޝަސްގެ އަގަލޭގާ އައިލެންޑުގައި އިންޑިއާގެ އަސްކަރީ މަރުކަޒެއް ހެދުމަށް ހުއްދަ ދިން ކަމަށް ފެތުރޭ ހަބަރު މޮރިޝަސް ސަރުކާރުން ދޮގުކޮށްފި އެވެ.
ސަރުކާރުގެ އޮފިޝަލަކު އޭއެފްޕީއަށް ވިދާޅުވީ އަސްކަރީ މަރުކަޒަކާ ގުޅޭ އެއްވެސް އެއްބަސްވުމެއްގައި ދެ ގައުމުން ސޮއިކޮށްފައި ނުވާނެ ކަމަށެވެ.
ގާތްގަނޑަކަށް 300 އެއްހާ މީހުން ދިރިއުޅޭ އަގަލޭގާ އައިލެންޑުގައި އިންޑިއާގެ އަސްކަރީ މަރުކަޒެއް ގާއިމް ކުރުމުގެ ގޮތުން އެއާސްޓްރިޕަކާއި ދެ ޖެޓީ އަޅަމުންދާ ކަމަށް ރިޕޯޓު ކުރީ މި ހަފްތާގެ ކުރީކޮޅު އަލް ޖަޒީރާ އިންނެވެ.
ނަމަވެސް އެ ރަށުގައި އަސްކަރީ އެއްވެސް ތަނެއް ހަދަން ރާވާފައި ނުވާނެ ކަމަށް މޮރިޝަސް ސަރުކާރުގެ އޮފިޝަލަކު އޭއެފްޕީއަށް ވިދާޅުވި އެވެ.
"އަގަލޭގާގައި އަސްކަރީ މަރުކަޒެއް އެޅުމަށް އިންޑިއާ އާއި މޮރިޝަސްއާ ދެމެދު އެއްވެސް އެއްބަސްވުމެއް ނޯންނާނެ،" ބޮޑު ވަޒީރު ޕްރަވިންދް ޖުގްނައުތުގެ ކޮމިއުނިކޭޝަން އެޑްވައިޒަރު ކެން އާރިއަން ވިދާޅުވި އެވެ.
އާރިއަން ވިދާޅުވީ އިންޑިއާގެ ބޮޑު ވަޒީރު ނަރެންދްރަ މޯދީ 2015 ވަނަ އަހަރު އެ ގައުމަށް ކުރެއްވި ދަތުރުފުޅުގައި އަގަލޭގާގައި ދެ މަޝްރޫއެއް ހިންގަން ނިންމެވި ކަމަށެވެ.
އެއީ ތިން ކިލޯމީޓަރު ދިގު އެއާސްޓްރިޕް މަޝްރޫއު އާއި ޖެޓީގެ މަޝްރޫއު އެވެ. އާރިއަން ވިދާޅުވީ އެ ދެ ތަން ވެސް އަސްކަރީ ބޭނުމަކަށް ދޫ ނުކުރާނެ ކަމަށެވެ.
އަލް ޖަޒީރާގެ ރިޕޯޓުގެ ސަބަބުން 1965 ގައި އިނގިރޭސިން މޮރިޝަސްގެ ޗާގޯސް އައިލެންޑާ މެދު އަމަލު ކުރި ގޮތަށް އަގަލޭގާ އައިލެންޑަށް ދިމާވެދާނެ ކަމުގެ ބިރު ވަނީ އުފެދިފަ އެވެ.
އިނގިރޭސިން ވަނީ ޗާގޮސް އައިލެންޑު މޮރިޝަސްއިން ވަކިކޮށް, އެމެރިކާ އާއި ގުޅިގެން, އެތަނުގެ އެއް ރަށް ކަމުގައިވާ ޑިއެގޯ ގާސިއާގައި ބޮޑު އަސްކަރީ މަރުކަޒެއް ގާއިމްކޮށްފަ އެވެ.
ޗާގޯސްގެ ރައްޔިތުން ތުހުމަތު ކުރާ ގޮތުގައި އިނގިރޭސި ވިލާތުން ވަނީ އެ މީހުންގެ ބިމަށް ވެރިވެގަނެ، މޮރިޝަސްއާ ވަކިކޮށްފަ އެވެ.
އިނގިރޭސި ވިލާތުން ބުނާ ގޮތުގައި ޗާގޮސްއަކީ އެ އެ ގައުމުގެ ތަނެކެވެ. އަދި އެމެރިކާ އާއެކު އޮތް އެއްބަސްވުން 2036 އާ ހަމައަށް ދިގުދެންމުމަށް ފަހު އަސްކަރީ މަރުކަޒު ބޭނުން ކުރަމުން ދާނެ އެވެ.
ޑިއެގޯ ގާސިއާގެ އަސްކަރީ މަރުކަޒަކީ ފިނި ހަނގުރާމަ އާއި އަފްގާނިސްތާން ހަނގުރާމައިގައި ހުޅަނގުގެ ބާރުތަކަށް މުހިއްމު މަރުކަޒެކެވެ.
