ކޮލަމްބޯ، ސްރީ ލަންކާ (އޯގަސްޓު 5) - ސްރީ ލަންކާއަށް ކެމިކަލް ފާޓިލައިޒާ އެތެރެ ކުރުން މަނާކޮށްފައި އޮތް އޮތުން އުވާލިތާ އެއް ދުވަސް ފަހުން އަނެއްކާވެސް ސަރުކާރުގެ ނިންމުން ބަދަލުކޮށް، ކެމިކަލް ފާޓިލައިޒާ އެތެރެ ކުރުން މަނާކޮށްފި އެވެ.
ލަންކާއަށް އެތެރެ ކުރުން މަނާ ތަކެތީގެ ލިސްޓަށް ފާޓިލައިޒާ ނުވަތަ ގަސް ކާނާ އިތުރުކުރީ މި އަހަރުގެ ކުރީކޮޅު އެވެ. އެއްގަމު އުޅަނދާއި ލަގްޒަރީ މުދަލާއެކު ބައެއް ސާމާނު އެތެރެ ކުރުން މަނާކޮށްފައި ވަނީ ބޭރު ފައިސާގެ ދަތިކަން ދިމާވާ މައްސަލަ ހައްލު ކުރުމުގެ ގޮތުންނެވެ.
ނަމަވެސް ފާޓިލައިޒާ ނުލިބުމުގެ ސަބަބުން ދަނޑުތައް ހަލާކުވާ މައްސަލަައިގައި ދަނޑުވެރިން ވަނީ މުޒާހަރާކޮށްފަ އެވެ.
ރައީސް ގޮތަބަޔާ ރާޖަޕަކްސަ ވިދާޅުވެފައި ވަނީ ފާޓިލައިޒާ މަނާ ކުރުމުން ލަންކާގެ ދަނޑުވެރިކަން 100 ޕަސެންޓު އޯގެނިކް ދަނޑުވެރިކަމަށް ބަދަލުވާނެ ކަމަށެވެ.
މިދިޔަ ހަފްތާގައި ވެސް ރައީސް ގޮތަބަޔާ އދ. ގެ ފުޑް ސިސްޓަމްސް ސަމިޓުގައި ވަނީ ފާޓިލައިޒާ މަނާ ކުރުން ދިފާއު ކުރައްވާ ވާހަކަދައްކަވާފަ އެވެ. އަދި އެހެން ގައުމުތަކުން ލަންކާގެ މިސާލު ބަލައިގަނެ އޯގެނިކް ދަނޑުވެރި ކަމަށް ދިޔުމަށް ގޮވާލެއްވި އެވެ.
ބުރާސްފަތި ދުވަހު ނޫސްވެރިންނަށް މައުލޫމާތު ދެއްވަމުން އެގްރިކަލްޗާ މިނިސްޓްރީގެ ސެކެޓްރީ އުދިތް ޖާޔަސިންގެ ވިދާޅުވީ "އޯގެނިކް ފާޓިލައިޒާއާ ދިމާލަށް ދިޔުމަށް ސަރުކާރުން ގެންގުޅޭ ސިޔާސަތަށް އެއްވެސް ބަދަލެއް އައިސްފައި ނުވާ" ކަމަށެވެ.
"ނައިޓްރޮޖެން ގިނައިން ހިމެނޭ ބައެއް ގަސް ކާނާއަށް ހުއްދަ ދޭނީ ހަރުކަށި އުސޫލެއްގެ ދަށުން ދޫކުރާ ލައިސެންސަކާ އެކު".
އޭގެ އިތުރުން ޔޫރިއާ ފާޓިލައިޒާއަށް ހުއްދަ ނުލިބޭނެ ކަމަށް އޭނާ ވިދާޅުވި އެވެ. އެ ފާޓިލައިޒާއަކީ ލަންކާގެ 1.25 ބިލިއަން ޑޮލަރުގެ ސައިފަތް އިންޑަސްޓްރީން އެންމެ ގިނައިން ބޭނުން ކުރާ ފާޓިލައިޒާ އެވެ. ލަންކާގައި ހަނޑޫ ދަނޑުތައް ހައްދަން ވެސް އެ ފާޓިލައިޒާ ބޭނުން ކުރެ އެވެ.
ޖަޔަސިންގެ ވިދާޅުވީ ސައިފަތް ދަނޑުތަކާއި ހަނޑޫ ދަނޑުތަކުގައި ދެން ބޭނުން ކުރަން ޖެހޭނީ އޯގެނިކް ގަސްކާނާ ކަމަށެވެ.
ސްރީ ލަންކާގެ ސައިފަތަކީ ރަހަމީރު ކަމަށް މަޝްހޫރު ފެންވަރު ރަނގަޅު ސައިފަތެވެ. ދުނިޔޭގައި އެންމެ ގިނައިން ސައިފަތް އެކްސްޕޯޓް ކުރާ އެއް ގައުމަކީ ވެސް ސްރީ ލަންކާ އެވެ.
ތަޖުރިބާކާރުންގެ ގްރޫޕަކުން މިދިޔަ މަހު ނެރުނު ރިޕޯޓެއްގައި ބުނީ ދަނޑުތައް ހަލާކުވުމުން ގައުމުގެ އިގްތިސާދަށް ނޭދެވޭ އަސަރުކޮށް، ކާބޯތަކެތީގެ ދަތިކަން ކުރިމަތިވެދާނެ ކަމަށެވެ.
ކެމިކަލް ފާޓިލައިޒާގެ ބަދަލުގައި އޯގެނިކް ފާޓިލައިޒާއަށް ބަދަލުވުމާ ގުޅޭ ދިރާސާއެއް ހެދި ރިޔާސީ ކޮމިޓީގެ މެމްބަރެއް ކަމަށްވާ ހާމަން ގުނަރަތްނެ ވިދާޅުވީ ކުއްލިއަކަށް އެ ބަދަލު ގެނައުމުން ވަރަށް ބޮޑު ނޭދެވޭ އަސަރެއް، ވަކިން ހާއްސަކޮށް ސައިފަތުގެ އިންޑަސްޓްރީއަށް، ކުރާނެ ކަމަށެވެ.
"ބައިނަލްއަގްވާމީ މާކެޓުތައް ގެއްލުމުގެ ނުރައްކާ އެބަ އޮތް،" އޭނާ އޭއެފްޕީއަށް ވިދާޅުވި އެވެ.
ސައިފަތް އުފައްދާ ދަނޑެއްގެ އެގްޒެކްޓިވް ސަނަތު ގުރުނަދާ ވިދާޅުވީ ފާޓިލައިޒާގެ ދަތިކަން ދިމާވުމުގެ އަސަރު އޭނާގެ ދަނޑުތަކުން މިހާރު ފެންނަމުންދާ ކަމަށެވެ. އޭނާއަކީ ރަތުނަޕޫރާގައި އޯގެނިކް އަދި އިންއޯގެނިކް ދަނޑުތައް މެނޭޖު ކުރާ މީހެކެވެ.
"ފާޓިލައިޒާ އެތެރެކުރަން އަލުން ހުއްދަ ނުދޭނަމަ، އޮކްޓޯބަރު މަސް އަންނަން ވާއިރަށް ދަނޑުތައް އެއްކޮށް ހަލާކުވާނެ. ނޮވެމްބަރާއި ޑިސެމްބަރު މަހުގެ އެކްސްޕޯޓަށް އޭގެ އަސަރު ކުރާނެ،" ގުރުނަދާ އޭއެފްޕީއަށް ވިދާޅުވި އެވެ.
