ކާބުލް، އަފްގާނިސްތާން (އޯގަސްޓު 4) - އަފްގާނިސްތާނުގެ ސިޓީތަކުގެ ކޮންޓްރޯލް ހޯދުމަށް ތާލިބާނުންގެ ހަމަލާތައް ވަރުގަދަކޮށްފައިވާ މި ދަނޑިވަޅުގައި ޑިފެންސް މިނިސްޓަރަށް އަމާޒުކޮށް ވެރިރަށް ކާބުލްއަށް ބޮން އަޅައިފި އެވެ.
ޑިފެންސް މިނިސްޓަރު ބިސްމިﷲ މުހައްމަދީ އަށް އަމާޒުކޮށް ބޮން އެޅުމުގެ އިތުރުން ބަޑި ޖަހާފައިވެ އެވެ. މިއީ އެތައް މަސްތަކަކަށް ފަހު ކާބުލްގައި ދިން އެންމެ ވަރުގަދަ ހަމަލާ އެވެ. އަފްގާނިސްތާނުގެ ހުޅަނގާއި ދެކުނުގައި ހިނގި ކުރިމަތިލުންތައް މިހާރު ވަނީ ވެރިރަށާ ހަމައަށް ފޯރާފަ އެވެ.
އަފްގާނިސްތާނާއި އެމެރިކާގެ ސިފައިން ވަނީ ސިޓީތަކާ ދުރަށް ހަނގުރާމަވެރިން ޖެއްސުމަށް ވައިގެ ހަމަލާތައް ދީފަ އެވެ. ތާލިބާނުން ބުނީ ޑިފެންސް މިނިސްޓަރަށް އަމާޒުކޮށް ކާބުލް އަށް ހަމަލާ ދިނީ އެކަމުގެ ބަދަލު ހިފުމުގެ ގޮތުން ކަމަށެވެ.
"މި ހަމަލާއަކީ ގައުމުގެ އެތަން މިތަނަށް ހަމަލާ ދީ ބޮން އެޅުމަށް އަމުރު ކުރަމުންދާ ކާބުލް ސަރުކާރުގެ ވެރިންނާއި އެ މީހުންނާ ގުޅުން ހުރި މީހުންނަށް އަމާޒުކޮށް ދޭނެ ހަމަލާތަކުގެ ފެށުން،" ތާލިބާނުންގެ ތަރުޖަމާނު ޒަބީހުﷲ މުޖާހިދު ސޯޝަލް މީޑިއާގައި އާއްމު ކުރި ބަޔާނެއްގައި ބުންޏެވެ.
ތަޖުރިބާކާރުން ބުނީ އެ ހަމަލާއިން ރަމްޒުކޮށްދެނީ ތާލިބާނުންގެ ހަމަލާތައް އިތުރު ހަރުފަތަކަށް ގެންދިޔުން ކަމަށެވެ. އެމެރިކާ ސިފައިން ފޭބުމުގެ މައްސަލާގައި ކުރި މަޝްވަރާތަކަށް ފަހު އެތައް އަހަރެއް ވަންދެން ތާލިބާނުން ވަނީ ކާބުލްގައި ވަރުގަދަ އެއްވެސް ހަމަލާއެއް ނުދީ އެވެ.
ބުދަ ދުވަހުގެ ހަމަލާ އަމާޒު ކުރީ ޑިފެންސް މިނިސްޓަރުގެ އިތުރުން ގާނޫނު ހަދާ މަޖިލީހުގެ ބައެއް މެމްބަރުންނަށެވެ.
އޭއެފްޕީން ރިޕޯޓު ކުރި ގޮތުގައި ފުރަތަމަ ބޮން ގޮއްވާލާފައި ވަނީ ކާބުލްގެ މެދު ތެރޭގަ އެވެ. އެއާއެކު ކަޅު ދުންތައް އަރައިގެން ދިޔަ މަންޒަރު މީހުންނަށް ފެނިފައިވެ އެވެ.
އޭގެ ދެ ގަޑިއިރު ފަހުން އިތުރު ގޮވުމަކާއެކު ބަޑީގެ ހަމަލާތައް ބަދަލުކުރީ ގްރީން ޒޯން ސަރަހައްދުގަ އެވެ. އެއީ އެމެރިކާގެ އެމްބަސީ އާއެކު ގިނަ ގައުމުތަކެއްގެ އެމްބަސީ ހުންނަ ސަރަހައްދެވެ.
ޑިފެންސް މިނިސްޓަރަށް އެއްވެސް އަނިޔާއެއް ލިބިވަޑައިގެންފައި ނުވާއިރު، އަފްގާން ސިފައިން ވަނީ ތާލިބާނުން ފައްސާލާފަ އެވެ. އަދި އިންޓީރިއާ މިނިސްޓްރީގެ ތަރުޖަމާނު މިރްވައިސް ސްތަނިކްޒާއީ ވިދާޅުވީ އަށް މީހުން މަރުވި ކަމަށެވެ.
ޑިފެންސް މިނިސްޓަރު މުހައްމަދީ ފަހުން ވިދާޅުވީ ހަމަލާ ދިނީ އޭނާ ދިރިއުޅުއްވާ ގެ ކައިރީގައި އަމިއްލައަށް މަރުވެ، ކާރެއް ގޮއްވާލައިގެން ކަމަށެވެ.
ސަލާމަތީ އޮފިޝަލުން ބުނީ އެއަށްފަހު މަޖިލިސް މެމްބަރެއްގެ ގެޔަށް ހަނގުރާމަވެރިން ވަދެގަތް ކަމަށާއި އެ ތަނުގައި ތިބެ މިނިސްޓަރުގެ ގެއަށް ބަޑި ޖަހަމުން ދިޔަ ކަމަށެވެ.
ތާލިބާނުންގެ މި ވަރުގަދަ ހަމަލާ ދިނީ ދެކުނުގައި އޮންނަ ލަޝްކަރް ގަހް ސިޓީގެ ކޮންޓްރޯލް އަލުން ހޯދަން އަފްގާން ސިފައިން ބޮޑު އޮޕަރޭޝަނެއް ފެށުމުންނެވެ.
މިދިޔަ އަންގާރަ ދުވަހު ސިފައިން ވަނީ އެ ސިޓީގައިި ދިރިއުޅޭ އާއްމުން ރައްކާތެރި ތަންތަނަށް ދިޔުމަށް އަންގާފަ އެވެ. އެ ތަނުން އެތައް ސަތޭކަ އާއިލާއެއް ވަނީ ގެތައް ދޫކޮށް ގޮސްފަ އެވެ.
ނަމަވެސް ހަމަލާ ބަދަލު ކުރަމުން ދާތީ ބައެއް އާއިލާތަކަށް ވަނީ ސިޓީ ދޫކޮށް ދެވޭނެ ގޮތް ނުވެ، މަގުމަތީގައި ނުރައްކާތެރި ހާލަތެއްގައި ތާށިވެފަ އެވެ.
އަފްގާނިސްތާނުގެ ރަށްފުށުގެ ބޮޑު ހިސާބަކާއި މުހިއްމު ބޯޑަރު އަވަށްތައް ހިފުމަށް ފަހު ތާލިބާނުންގެ އަމާޒަކީ ބޮޑެތި ސިޓީތައް ހިފުމެވެ. އެގޮތުން ހުޅަނގުގައި އޮންނަ ހިރާތު އާއި ލަޝްކަރް ގަހް އަދި ދެކުނުގައި އޮންނަ ކަންދަހާރުގައި ވެސް ހަނގުރާމަވެރިން ދަނީ ސިފައިންނަށް ހަމަލާ ދެމުންނެވެ.
ހެލްމަންދް ޕްރޮވިންސްގެ ވެރިރަށް، ލަޝްކަރް ގަހްގެ ފުރިހަމަ ކޮންޓްރޯލް ސަރުކާރަށް ގެއްލިއްޖެ ނަމަ، އެކަން ވާނީ ސިފައިންނަށް ލިބޭ ބޮޑު ގެއްލުމަކަށެވެ.
އދ. އިން އެންމެ ފަހުން ބުނެފައި ވަނީ ފާއިތުވި 24 ގަޑިއިރު ތެރޭގައި އެކަނިވެސް އެ ސިޓީން އާއްމުންގެ 40 މީހުން މަރުވެފައިވާ ކަމަށެވެ.
ހިއުމަން ރައިޓްސް ވޮޗް އާއި އިނގިރޭސި ސަރުކާރު އަދި އެމެރިކާއިން ވެސް ވަނީ ތާލިބާނުން އާއްމުންނާ ދެކޮޅަށް ޖަރީމާތައް ހިންގަމުންދާ ކަމަށް ތުހުމަތުކޮށްފަ އެވެ.
