ދައުލަތުގެ މުއައްސަސާއަކުން ނުވަތަ ދައުލަތުގެ ވެރިއެއްގެ ސަބަބުން އިންސާނީ ނުވަތަ އަސާސީ ހައްގުތައް ގެއްލިގެން އިންތިގާލީ އިންސާފުގެ އޮމްބަޑްސްޕާސަންގެ އޮފީހަށް މިހާތަނަށް ހުށަހަޅާފައިވާ މައްސަލަތަކުގެ ތެރެއިން 19 މައްސަލައެއް ބަލަން ނިންމާފައިވާކަމަށް އެ އޮފީހުން ބުނެފި އެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން އޮމްބަޑްސްޕަރސަންގެ އޮފީހަށް ތަހުގީގު ކުރެވޭނީ ޖެނުއަރީ 1953، އިން ފެށިގެން ނޮވެމްބަރު، 17، 2018 އާ ހަމައަށް ހިނގާފައިވާ ހާދިސާތަކެވެ.
މި މަހުގެ 13 ގެ ނިޔަލަށް އެ އޮފީހަށް މައްސަލަ ހުށަހެޅުމަށް ހުޅުވާލާފައިވާއިރު، މިދިޔަ ހޯމަ ދުވަހާ ހަމައަށް ޖުމްލަ 84 މައްސަލަ ހުށަހަޅާފައިވާ ކަމަށް އެ އޮފީހުގެ ތަރުޖަމާނު މިއަދު "އަދަދު" އަށް ވިދާޅުވި އެވެ.
އޭގެ ތެރެއިން 19 މައްސަލައެއް ބަލަން ނިންމާފައިވާއިރު، 11 މައްސަލައަކީ މަސައްކަތްކުރުމުގެ ހައްގަށް އަރައިގަނެފައިވާ މައްސަލަތައް ކަމަށް އޭނާ ވިދާޅުވި އެވެ.
ބަލަން ނިންމާފައިވާ މައްސަލަތަކުގެ ތެރޭގައި ދެން އެންމެ ގިނައީ ބޯހިޔާވަހިކަމުގެ ހައްގު ނިގުޅައިގަތުމުގެ މައްސަލަތަކެވެ. އެ ބާވަތުގެ ފަސް މައްސަލަ ބަލަން ނިންމާފައިވާ ކަމަށް ވިދާޅުވި އެވެ.
ދެން ބަލަނީ ގާނޫނު ހިލާފަށް ހައްޔަރުކުރުމާއި ޒާތީ ދިރިއުޅުމުގެ މައްސަލައެއްގެ އިތުރުން މުދަލުގެ މައްސަލަ އެކެވެ. އޭނާ ވިދާޅުވި ގޮތުގައި މައްސަލަ ހުށަހެޅުމުގެ މުއްދަތު އިތުރުކުރުމުގެ ވިސްނުމެއް ވެސް އޮމްބުޑްސް ޕާސަނުން ގެންގުޅުއްވާ ކަމަށެވެ.
"އެކަމަކު ވަކި ގޮތެއް އަދި ނުނިންމަވާ. މަޝްވަރާ ކުރެވެމުންދަނީ،" އޭނާ ވިދާޅުވި އެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން އޮމްބަޑްސްޕާސަންގެ އޮފީހަށް ހުށަހަޅާ މައްސަލައެއް މަދުވެގެން ދެ އަހަރުގެ ތެރޭގައި ތަހުގީގުކޮށް ނިންމަންޖެހޭނެ އެވެ.
އިންތިގާލީ އިންސާފުގެ ގާނޫނުގައި ބުނެފައިވާ ގޮތުން ނިޒާމީ ގޮތުން ރާވައިގެން އިންސާނީ ހައްގުތައް ގެއްލުވާލާފައިވާ މައްސަލަތައް "ދެނެގަނެ، އެކަމުގައި ޒިންމާވާ ދައުލަތުގެ މުއައްސަސާތަކާއި އެކަންކުރި ފަރާތްތަކުގެ މައްސަލަތައް ބަލައި، ހަގީގަތާ ހަމައަށް ވާސިލުވުމަކީ" އޮމްބަޑްސްޕާސަންގެ އޮފީހުގެ ޒިންމާއެކެވެ.
އިންތިގާލީ އިންސާފުގެ ޗީފް އޮމްބަޑްސްޕާސަންއަކަށް އައްޔަންކޮށްފައި ވަނީ އަބްދުއްސަލާމް އާރިފެވެ. އޮމްބަޑްސްޕާސަންއަކަށް އައްޔަންކޮށްފައި ވަނީ ކުރީގެ އެސިސްޓަންޓް ޕްރޮސެކިއުޓާ ޖެނެރަލް ޖިހާދާ އަނީސް އެވެ. އަދި ހިއުމަން ރައިޓްސް ކޮމިޝަނުގައި ކުރިން މަސައްކަތް ކުރެއްވި މަރިޔަމް ލައިޒާއަކީ ވެސް އިންތިގާލީ އޮފީހުގެ އޮމްބަޑްސްޕާސަންއެކެވެ.
