ފ. އަތޮޅު ނިލަންދޫގައި ހުވަނި ގިނަވެ، ރައްޔިތުންގެ އާންމު ދިރިއުޅުމަށް ހުރަސް އެޅިފައިވާކަމަށް އެރަށު ކައުންސިލުން ބުނެފި އެވެ.
އާބާދީގައި 2000 އަށް ވުރެން ގިނަ މީހުން ހިމެނޭ އެ ރަށަށް ހުވަނީގެ އުނދަގޫ ކުރިމަތިވާން ފަށާފައި ވަނީ މީގެ ދެތިން މަހެއް ކުރިންނެވެ. ބޭސްޖަހާ ނައްތާލުމަށް ވެސް މަސައްކަތް ކޮށްފައިވާ ނަމަވެސް އެކަމަށް ހައްލެއް ލިބިފައެއް ނުވެ އެވެ.
ނިލަންދޫ ކައުންސިލްގެ ރައީސް އަލީ އަހުމަދު "އަދަދު" އަށް ވިދާޅުވީ އެ ރަށުގައި އާމްދަނީ ހޯދުމަށް ކުރާ މަސައްކަތްތަކަކީ ފަންވިނުމާއި ކަނަމަދު ވިއްކުން ކަމަށްވާއިރު ރަށު ގާތްގަނޑަކަށް ހުރިހާ މިދިލި ގަހެއްގައި ހުވަނި އަޅާފައިވާތީ ދަތިތަކާ ކުރިމަތިވެފައިވާ ކަމަށެވެ.
"ރަށުގައި ހުވަނި އާލާވެ، ރައްޔިތުންނަށް ތަފާތު އެކި އުނދަގޫތަކާ ވަނީ ކުރިމަތިވެފައި،" އޭނާ ވިދާޅުވި އެވެ.
ނިލަންދޫގައި ހުވަނި އަޅާ ރަަަށުގެ ގަސްތަކުން ފަތްތައް ހުސްވެފައި-- ފޮޓޯ/ ނިލަންދޫ ކައުންސިލް
އަލީ އަހުމަދު ވިދާޅުވީ، އެކަން ހައްލު ކުރުމަށް ރަށު ފެންވަރުގައި ހުވަޅި އަޅާފައިވާ ގަސްތަކަށް ބޭސް ސްޕްރޭ ކުރުމުގެ މަސައްކަތްތައް ކައުންސިލާއި އެމްއެންޑީއެފުން ކުރަމުންދިޔަ ނަމަވެސް، އެކަން ރަށު ފެންވަރުގައި ހައްލު ކުރެވޭ ވަރަށްވުރެ ހާލަތު ގޯސްވެފައިވާ ކަމަށެވެ.
"ފަން ހޯދުމަށާއި ކަނަމަދު ހޮވުމަށް ވަލަށްދާ މީހުންނަށް ވަރަށް ގޮތްގޮތް ވެފަ އެބަހުރި. ކަހާ، ތަންތަން ދުޅަވެގެން ރަށު މަރުކަޒަށް ވެސް ރިޕޯޓް ކޮށްފައި އެބަހުރި،" އޭނާ ވިދާޅުވި އެވެ.
ނިލަންދޫ ފާރެއްގައި ހުވަނި، ފުރިފައި-- ފޮޓޯ: ނިލަންދޫ ކައުންސިލް
އެކަން ހައްލު ކުރުމަށްޓަކާއި ސަރުކާރުގެ އިދާރާތަކުގައި ވެސް އެހީތެރިކަމަށް އެދިފައިވާނެ ކަމަށާއި އެގޮތުން ހެލްތް ޕްރޮޓެކްޝަން އެޖެންސީއާ މަޝްވަރާ ކުރެވުނު ކަމަށް އޭނާ ވިދާޅުވި އެވެ. އެޗްޕީއޭ އިން ޖަވާބުގައި ބުނީ އެއީ ކައުންސިލުން ކުރަން ޖެހޭ ކަމެއް ކަމަށާއި ކޮށްދެވޭނެ ހަމައެކަނި ކަމަކީ ފަންނީ ގޮތުން މައުލޫމާތު ދިނުން ކަމަށެވެ.
ނިލަންދޫ ގެ ތަކުގައި ހައްދަމުންދާ ގަސްތަކަށްވެސް ހުވަނީގެ އުނދަގޫ ފޯރާފައިވާ ކަމަށް ބައެއް ރައްޔިތުން ބުނޭ
ހުވަނި ނުވަތަ ޖިޕްސީ މޮތަކީ އަހަރުގެ ވަކިދުވަސްވަރެއްގައި އާންމުކޮށް ހޫނުގަދަ މޫސުމުގައި ބައެއް ބާވަތްތަކުގެ ގަސްގަހުގައި އަޅާ ފަންޏެކެވެ. ދުނިޔޭގެ ނިސްބަތުން ބަލާއިރު ގާތްގަނޑަކަށް 500 އަށްވުރެ ގިނަ ބާވަތްތަކުގެ ގަސްގަހަށް ހުވަނީގެ އަސަރު ކުރެ އެވެ.
ރާއްޖޭގައި މައިގަނޑުު ގޮތެއްގައި ހުވަނި އަޅާކަން ފާހަގަކުރެފިފައި ވަނީ މިދިލި، ޖަނބުރޯލު، ފުނަ، ކުންނާރު، ބަނބުކެޔޮ، ފޭރު، އަނބު، ދިއްގާ ފަދަ ބޮޑެތި ގަސްގަހުގަ އެވެ.
