އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑޭ) މަރަން ގޮވާލި، ނ. ކުޑަފަރީ ސްކޫލުގެ އިސްލާމް ޓީޗަރު މުހައްމަދު އަޝްރަފް އިއްޔެ ވަޒީފާއިން ވަކިކޮށްފި އެވެ.
ކުޑަފަރީ ސްކޫލްގެ ޕްރިންސިޕަލް އަހުމަދު ހުސައިން "އަދަދު" އަށް ވިދާޅުވީ އަޝްރަފް އިއްޔެ ވަޒީފާއިން ވަކިކުރިކަން ސިވިލް ސާވިސް ކޮމިޝަނުން އެ ސްކޫލަށް އަންގާފައިވާ ކަމަށެވެ. އިތުރު ތަފްސީލެއް ނުލިބޭ ކަމަށް އޭނާ ވިދާޅުވި އެވެ.
ވައްޑޭ މަރަން އަޝްރަފް ގޮވާލީ ލޯކަލް ކައުންސިލް އިންތިހާބުގެ ކެމްޕެއިން އެއްވުމެއްގައި، ރައީސް އަބްދުﷲ ޔާމީންގެ ވެރިކަމުގައި މަރަށް މަރުހިފުމަށް ލީތަލް އިންޖެކްޝަން ބޭނުންކުރަން ކެބިނެޓްގައި މަޝްވަރާ ކޮށްފައިވާ ކަމަށް ވިދާޅުވެ އެކަމަށް ވައްޑޭ ފާޑުކީ މައްސަލައިގަ އެވެ.
އެކަމާ ގުޅިގެން ޓީޗަރު އަޝްރަފް ފޭސްބުކްގައި ލިޔުނީ ވައްޑޭ ތައުބާވާން އަންގައި އޭނާ އެކަން ނުކޮށްފިނަމަ މަރާލަން ޖެހޭ ކަމަށެވެ.
"މި ސިކު މުރުތައްދު ކަލޭގެއަށް ތައުބާވުމަށް އަންގައި، އެކަން ނުކޮށްފިނަމަ މަރާލަން ޖެހޭ. ދީނަކީ މިފަދަ މީހުން ކުޅޭ އެއްޗަކަށް ހަދާތަން ބަލަން މުސްލިމް ގައުމެއްގެ ރައްޔިތުން ތިބެގެން ނުވާނެ!" އަޝްރަފް ފޭސްބުކްގައި ލިޔެފައިވެ އެވެ.
އެ މައްސަލައާ ގުޅިގެން އަޝްރަފް ސަސްޕެންޑް ކުރީ މޭމަހު 9 ވަނަ ދުވަހު އެވެ.
އަޝްރަފް "އަދަދު" އަށް ވިދާޅުވީ އޭނާ އިންޒާރުނުދޭ ކަމަށާއި އޭނާ ގޮވާލީ ދީނުގައި އޮތް ހުކުމް ތަންފީޒްކުރަން ކަމަށެވެ.
"އަޅުގަނޑު ގަބޫލުކުރާ ގޮތެއް ނޫން އެއީ އާއްމުން ނުކުމެ ކުށްކުރާ މީހުންނަށް އަދަބުދިނުމަކީ. ކުށްކުރާ މީހުންނަށް އަދަބުދޭން ދީނުގައި އުސޫލުތަކެއް އޮވޭ،" އަޝްރަފް ބުންޏެވެ.
މަރަން މަރުހިފުމާ ގުޅޭގޮތުން ވައްޑޭ ދެއްކެވި ވާހަކައާ ގުޅިގެން ގިނަ ބަޔަކު އޭނާއަށް ފާޑުކިޔައި ވަނީ އިންޒާރު ދީފަ އެވެ. އިންޒާރުތަކުގެ ސަބަބުން ވައްޑޭ އަށް މިހާރު ސިފައިން ސެކިއުރިޓީ ދެ އެވެ.
