ދާކާ، ބަންގްލަދޭޝް (އޯގަސްޓު 3) - ހަލުވިކަމާއެކު ކޮވިޑް ފެތުރެމުންދާ ބަންގްލަދޭޝްގެ ލޮކްޑައުންގެ މުއްދަތު އިތުރުކޮށް، ހަފްތާއެއް ތެރޭ 10 މިލިއަން މީހުންނަށް ވެކްސިން ދިނުމުގެ މަސައްކަތް ފަށައިފި އެވެ.
އޯގަސްޓު ހަތް ވަނަ ދުވަހުން ފެށިގެން އެއް ހަފްތާ ތެރޭ 10 މިލިއަން މީހުންނަށް ވެކްސިން ދިނުމަށް އެތައް ހާސް ސިއްހީ މަސައްކަތްތެރިން 14،000 ސެންޓަރުގައި މަސައްކަތް ކުރާނެ އެވެ.
"ހަފްތާއެއް ތެރޭ 10 މިލިއަނަށް ވުރެ ގިނަ މީހުންނަށް ވެކްސިން ދެވޭނެ. އިސްކަން ދޭނީ އުމުރުން ދުވަސްވީ މީހުންނާއި މަސައްކަތްތެރިންނާއި ފިހާރަތަކުގައި ތިބޭ މީހުންނަށް،" ސީނިއާ މިނިސްޓަރު އޭކޭއެމް މުޒައްމަލް ހައްގު ވިދާޅުވި އެވެ.
ހެލްތު މިނިސްޓްރީގެ ތަރުޖަމާނު މައީދުލް އިސްލާމް ޕްރޮދާން ވިދާޅުވީ 12 މިލިއަން މީހުންނަށް ވެކްސިން ދެވޭ ވަރަށް ސްޓޮކް އެބަ ހުރި ކަމަށެވެ. އެއީ ކޯވެކްސް ފެސިލިޓީގެ ދަށުން ޗައިނާ އާއި އެމެރިކާއިން ފޮނުވި ވެކްސިނެވެ.
މިނިސްޓަރު ހައްގު ވިދާޅުވީ ޖުލައި އެއް ވަނަ ދުވަހުން ފެށިގެން މުޅި ގައުމުގައި ތަންފީޒު ކުރަމުންދާ ލޮކްޑައުން އޯގަސްޓު 10 އާ ހަމައަށް ދިގު ދަންމާލާފައިވާ ކަމަށެވެ.
އަންނަ ހަފްތާއިން ފެށިގެން އާއްމު ދަތުރުފަތުރާއި ފިހާރަތައް ހުޅުވާނެ އެވެ. ނަމަވެސް މަސައްކަތަށް ނިކުމެވޭނީ ހަމައެކަނި ވެކްސިން ޖަހައިގެން ތިބި މީހުންނަށެވެ.
ބަންގްލަދޭޝްގައި މިހާތަނަށް ޖުމްލަ 1.3 މިލިއަން ކޭސް ފެނިފައި ވާއިރު، 21،160 މީހުން މި ބަލީގައި މަރުވެފައި ވެ އެވެ.
