ކޮލޮމްބޯ، ސްރީލަންކާ (އޯގަސްޓު 3) - ދަނޑުވެރިން މުޒާހަރާ ކުރުމާއި، ކާބޯތަކެތި ލިބުން ދަތިވެ، ސައިފަތުގެ އެކްސްޕޯޓަށް އަސަރު ކުރާނެ ކަމަށް ލަފާކުރެވޭތީ ސްރީ ލަންކާއަށް ކެމިކަލް ފާޓިލައިޒާ އެތެރެ ކުރުން މަނާކޮށްފައި އޮތް އޮތުން އުވާލައިފި އެވެ.
ފިނޭންސް މިނިސްޓަރު ބެސިލް ރާޖަޕަކްސަ ނެރުއްވި ގަވާއިދެއްގެ ދަށުން ހާއްސަ އިމްޕޯޓް ލައިސެންސެއްގެ ދަށުން ކެމިކަލް ފާޓިލައިޒާ އެތެރެ ކުރެވޭނެ އެވެ.
ލަންކާއަށް އެތެރެ ކުރުން މަނާ ތަކެތީގެ ލިސްޓަށް ފާޓިލައިޒާ ނުވަތަ ގަސް ކާނާ އިތުރު ކުރީ މި އަހަރުގެ ކުރީކޮޅު އެވެ. އެއްގަމު އުޅަނދާއި ލަގްޒަރީ މުދަލާއެކު ބައެއް ސާމާނު އެތެރެ ކުރުން މަނާކޮށްފައި ވަނީ ބޭރު ފައިސާގެ ދަތިކަން ދިމާވާ މައްސަލަ ހައްލު ކުރުމުގެ ގޮތުންނެވެ.
ނަމަވެސް ފާޓިލައިޒާ ނުލިބުމުގެ ސަބަބުން ދަނޑުތައް ހަލާކުވާ މައްސަލަައިގައި ދަނޑުވެރިން ވަނީ މުޒާހަރާކޮށްފަ އެވެ.
ރައީސް ގޮތަބަޔާ ރާޖަޕަކްސަ ވިދާޅުވެފައި ވަނީ ފާޓިލައިޒާ މަނާ ކުރުމުން ލަންކާގެ ދަނޑުވެރިކަން 100 ޕަސެންޓު އޯގެނިކް ދަނޑުވެރިކަމަށް ބަދަލުވާނެ ކަމަށެވެ.
ރައީސް އެހެން ވިދާޅުވިއިރު ތަޖުރިބާކާރުންގެ ގްރޫޕަކުން އެމަނިކުފާނަށް ފޮނުވި ރިޕޯޓެއްގައި ބުނީ ދަނޑުތައް ހަލާކުވުމުން ގައުމުގެ އިގްތިސާދަށް ނޭދެވޭ އަސަރުކޮށް، ކާބޯތަކެތީގެ ދަތިކަން ކުރިމަތިވެދާނެ ކަމަށެވެ.
މިދިޔަ ޖުލައި މަހު ލަންކާގެ ސައިފަތް އެކްސްޕޯޓް ވަރަށް ބޮޑު ތަނުން ވެއްޓުނެވެ. ސައިފަތަކީ އެ ގައުމުން އެންމެ ގިނައިން އެކްސްޕޯޓް ކުރާ މުދަލަށް ވާއިރު، 1.25 ބިލިއަން ޑޮލަރުގެ އެ އިންޑަސްޓްރީއަށް މި އަހަރު ބޮޑު ނޭދެވޭ އަސަރެއް ކުރާނެ ކަމަށް ލަފާކޮށްފައި ވެ އެވެ.
ސައިފަތް އުފައްދާ ދަނޑެއްގެ އެގްޒެކްޓިވް ސަނަތު ގުރުނަދާ ވިދާޅުވީ ފާޓިލައިޒާގެ ދަތިކަން ދިމާވުމުގެ އަސަރު އޭނާގެ ދަނޑުތަކުން މިހާރު ފެންނަމުންދާ ކަމަށެވެ. އޭނާއަކީ ރަތުނަޕޫރާގައި އޯގެނިކް އަދި އިންއޯގެނިކް ދަނޑުތައް މެނޭޖު ކުރާ މީހެކެވެ.
"ފާޓިލައިޒާ އެތެރެ ކުރަން އަލުން ހުއްދަ ނުދޭނަމަ، އޮކްޓޯބަރު މަސް އަންނަން ވާއިރަށް ދަނޑުތައް އެއްކޮށް ހަލާކުވާނެ. ނޮވެމްބަރާއި ޑިސެމްބަރު މަހުގެ އެކްސްޕޯޓަށް އޭގެ އަސަރު ކުރާނެ،" ގުރުނަދާ އޭއެފްޕީއަށް ވިދާޅުވި އެވެ.
އޭނާ ވިދާޅުވީ ފަތުރުވެރި ކަމަށް ހާއްސަ ޕްރޮޖެކެޓެއްގެ ގޮތުގައި އޯގެނިކް ދަނޑުތައް ބެހެއްޓި ނަމަވެސް، އެ ދަނޑުތައް ބެލެހެއްޓުމަށް ދާ ހަރަދު 10 ގުނަ އިތުރު ކަމަށް އޭނާ ވިދާޅުވި އެވެ.
ފާޓިލައިޒާ އެތެރެ ކުރަން ކުއްލިއަކަށް އަލުން ހުއްދަ ދީފައި ވާއިރު، އެކަމާ ގުޅޭ ގޮތުން ލަންކާ ސަރުކާރުން ރަސްމީކޮށް ވަކި އެއްޗެއް ނުބުނެ އެވެ.
މިދިޔަ ހަފްތާގައި ވެސް ރައީސް ގޮތަބަޔާ އދ. ގެ ފުޑް ސިސްޓަމްސް ސަމިޓުގައި ވަނީ ފާޓިލައިޒާ މަނާ ކުރުން ދިފާއު ކުރައްވާ ވާހަކަދައްކަވާފަ އެވެ. އަދި އެހެން ގައުމުތަކުން ލަންކާގެ މިސާލު ބަލައިގަނެ އޯގެނިކް ދަނޑުވެރި ކަމަށް ދިޔުމަށް ގޮވާލެއްވި އެވެ.
