މޮރިޝަސްގެ އަގަލޭގާ އައިލެންޑްގައި އިންޑިއާއިން ސިއްރު އަސްކަރީ މަރުކަޒެއް ހަދަމުންދާކަން އަލް ޖަޒީރާގެ ތަހުގީގީ ނޫސްވެރިކަން ހިންގާ ޔުނިޓުން ހޯދި ސެޓެލައިޓް ފޮޓޯ އާއި މާލީ ޑޭޓާ އަދި އިތުރު ހެކީގެ އެހީގައި ފަޅާ އަރައިފި އެވެ.
އަލް ޖަޒީރާއިން ހޯދި ހެކިތައް ދިރާސާކުރި އަސްކަރީ ތަޖުރިބާކާރުން ވިދާޅުވެފައި ވަނީ ކުޑަކުޑަ އާބާދީއެއް އޮންނަ އެ ރަށުގައި ހަދަމުންދާ އެއާސްޓްރިޕް ބޭނުން ކުރާނީ އިންޑިއާ ކަނޑުގެ ސިފައިންގެ މެރިޓައިމް ޕެޓްރޯލް މިޝަންތަކަށް ކަން ވަރަށް ބޮޑަށް ޔަގީން ކުރެވޭ ކަމަށެވެ.
މޮރިޝަސްގައި އިންޑިއާގެ އަސްކަރީ މަރުކަޒެއް ބިނާކުރާ ކަމަށް ފުރަތަމަ އަޑުތައް ފެތުރެން ފެށީ 2018 ގަ އެވެ. ނަމަވެސް އިންޑިއާ އާއި މޮރިޝަސްއިން ވެސް ބުނެފައި ވަނީ އަގަލޭގާ އައިލެންޑުގައި ހިންގާ ކޮންސްޓްރަކްޝަން މަޝްރޫއު، އަސްކަރީ އެއްވެސް ބޭނުމަކާ ގުޅުމެއް ނެތް ކަމަށެވެ. އެ ތަން ގާއިމްކުރަނީ ރަށުގައި ދިރިއުޅޭ މީހުންގެ ފައިދާއަށް ކަމަށް ބުންޏެވެ.
އަގަލޭގާ އައިލެންޑް އޮންނަނީ މޮރިޝަސްގެ މައި ރަށާ ގާތްގަނޑަކަށް 1،100 ކިލޯމީޓަރު ދުރުގަ އެވެ. ތިން ސަތޭކައެއްގާ މީހުން ދިރިއުޅޭ އެ ރަށުގައި، މިހާރު ބޮޑު ދެ ޖެޓީ އާއި ތިން ކިލޯމީޓަރުގެ ދިގު ރަންވޭއެއް އަޅަމުންދާކަން ސެޓެލައިޓް ފޮޓޯތަކުން ހާމަވެ އެވެ.
"އެ ތަނަކީ އިންޑިއާ ކަނޑުގެ ހުޅަނގު ދެކުނާއި މޮޒަމްބީކް ޗެނަލްގައި އިންޑިއާގެ ސާވައިލަންސް ހަރަކާތް އިތުރު ކުރަން ބޭނުންވާ ވައިގެ އަދި ކަނޑުގެ އުޅަނދުތައް ދުއްވޭނެ ގޮތަށް ހަދާ އިންޓެލިޖެންސް ފެސިލިޓީއެއް،" ނިއު ދިއްލީގެ ތިންކްޓޭންކު، އޮބްޒާވާ ރިސާޗް ފައުންޑޭޝަންގެ އެސޯސިއޭޓް ފެލޯ އަބީޝޭކް މިޝްރާ އަލް ޖަޒީރާއަށް ވިދާޅުވި އެވެ.
"އަޅުގަނޑަށް ލިބިފައިވާ މައުލޫމާތާއި ގުޅުން ހުރި މީހުންނާ ދެކެވުނު ވާހަކަތަކުން އެނގުނު ގޮތުގައި އެ މަރުކަޒު ބޮޑަށް ބޭނުން ކުރާނީ އަޅުގަނޑުމެންގެ މަނަވަރުތައް މަޑު ކުރުމަށް އަދި ރަންވޭ ބޭނުން ކުރާނީ ޕީ-8އައި ވައިގެ އުޅަނދުތަކުން،" އޭނާ ވިދާޅުވި އެވެ.
މި ވަގުތު އަގަލޭގާ އައިލެންޑަށް ވައިގެ އުޅަނދުތައް ޖައްސަން ޖެހެނީ 800 މީޓަރުގެ ކުޑަ ލޭންޑިން ސްޓްރިޕެއް ބޭނުންކޮށްގެންނެވެ. އެއީ މޮރިޝަސްގެ ކޯސްޓުގާޑުގެ ކުދި ވައިގެ އުޅަނދުތަކަށް ކިރިޔާ ބޭނުން ކުރެވޭ ވަރުގެ ތަންކޮޅެކެވެ. ނަމަވެސް އަލަށް ހަދާ ލޭންޑިން ސްޓްރިޕަކީ އެންމެ ބޮޑެތި ޖެޓުތައް ޖެއްސޭ ވަރުގެ ރަންވޭއަކާ އެއް ވަރުގެ ތަނެކެވެ.
އޮސްޓްރޭލިއަން ނޭޝަނަލް ޔުނިވާސިޓީގެ ނޭޝަނަލް ސެކިއުރިޓީ ކޮލެޖުގެ ރިސާވާ ސެމުއެލް ބެޝްފީލްޑް އަލް ޖަޒީރާއަށް ވިދާޅުވީ ގައުމުތަކުގެ ނުފޫޒު ފެތުރުމަށް "ހޮޓްސްޕޮޓަކަށް" އިންޑިއާ ކަނޑު ވަމުންދާ ކަމަށެވެ.
"އިންޑިއާ ކަނޑުގެ ހުޅަނގު ދެކުނަކީ އެ ގައުމުގެ މަނަވަރުތަކަށް ވައިގެ އެހީ ފޯރުކޮށްދެވޭނެ ގޮތްތަކާއި އޮޕަރޭޝަންތަކަށް ލޯންޗިން ޕެޑުތައް ހުރުން މުހިއްމު ތަނެއް،" އޭނާ ވިދާޅުވި އެވެ.
ބޯޓްތަކުގައި ކޮންސްޓްރަކްޝަން ސާމާނު ހިފައިގެން އިންޑިއާގެ ބަނދަރުތަކުން ފުރައިގެން އަގަލޭގާ އައިލެންޑަށް ދަތުރު ކުރި ބޯޓުތައް އަލްޖަލްޒީރާއިން ވަނީ ދެނެގަނެފަ އެވެ.
ބާރަ ކިލޯމީޓަރުގެ އަގަލޭގާ އައިލެންޑްގައި އިންޑިއާއިން ހިންގާ ބިޔަ މަޝްރޫއުގެ މަސައްކަތް ހަވާލުކޮށްފައިވަނީ އެ ގައުމުގެ ކުންފުންޏެއްކަމުގައިވާ އެފްކޮންސްއާ އެވެ. އަގަލޭގާ މަޝްރޫއުގެ މަސައްކަތްކުރުމަށްޓަކައި އެ ކުންފުނިން މީހުން ތިބުމަށް އެ ރަށުގެ އުތުރުން ސާފުކޮށްލި ކުޑަ ތަންކޮޅު، މަޝްރޫއުއާ އެއްވަރަށް ބޮޑުވެ، އެތަނަށް އައިސްފައިވާ ބަދަލުތައް ސެޓްލައިޓް ފޮޓޯތަކުން ފެނެއެވެ.
މެރީޓައިމް ޕެޓްރޯލްތައް
އަގަލޭގާ އައިލެންޑްގައި އެ މަސައްކަތް ކުރަން ފެށީ 2015 ވަނަ އަހަރު އިންޑިއާ އާއި މޮރިޝަސްގެ ސަރުކާރާ ދެމެދު ސޮއިކުރި އެއްބަސްވުމެއްގެ ދަށުންނެވެ. ދެ ގައުމުން އެއްބަސްވީ އެރަށުގެ ކަނޑާއި ވައިގެ ދަތުރުތަކާ ގުޅޭ އިންފްރާސްޓްރަކްޗާ ވަރުގަދަކޮށް ފުޅާ ކުރުމަށެވެ. އޭގެ ބޭނުމަކީ އެ ރަށުގެ ރަށްވެހިންގެ ދިރިއުޅުމުގެ ހާލަތު ރަނގަޅު ކުރުން ކަމަށް ބުނެފައިވެ އެވެ.
އަގަލޭގެ މަޝްރޫއަކީ އަސްކަރީ ބޭނުމަކަށް ހިންގާ މަޝްރޫއެއް ނޫން ކަމަށް، މޮރިޝަސްގެ ބޮޑު ވަޒީރު ޕްރަވިންދް ޖަގްނައުތު މި އަހަރުގެ މޭ މަހު މޮރިޝަސްގެ މަޖިލިސް ޖަލްސާއެއްގައި ވިދާޅުވެފައިވެ އެވެ. އަދި އަގަލޭގާ އައިލެންޑްގައި އަސްކަރީ މަރުކަޒެއް އެޅުމަށް އިންޑިއާއާއެކު އެއްވެސް އެއްބަސްވުމެއް ނޯންނާނެ ކަމަށް ވެސް އެ މަނިކުފާނު ވިދާޅުވި އެވެ.
މޮރިޝަސްގައި އިންޑިއާއިން އެފަދަ މަޝްރޫއު ހިންގުމުގެ ބޭނުމަކީ ޗައިނާއިން އިންޑިއާ ކަނޑުގެ ސަރަހައްދުގައި ނުފޫޒު ފަތުރަމުން ދާތީ އެކަމާ ދެކޮޅަށް މަސައްކަތް ކުރުމެވެ.
އެފްރިކާގެ ގައުމެއްކަމުގައިވާ ޖިބޫޓީގައި ޗައިނާގެ އަސްކަރީ މަރުކަޒެއް ގާއިމްކޮށްފައި ވާއިރު އެ ސަރަހައްދުގެ ގިނަ ބަނދަރުތަކަށް ޗައިނާއިން ވަދެ ހަދަ އެވެ. އޭގެ ނަތީޖާއެއްގެ ގޮތުން ވާދަވެރި އިންޑިއާއިން ވެސް މަސައްކަތް ފެށި އެވެ. އެގޮތުން އިންޑިއާއިން މިހާތަނަށް މި ސަރަހައްދުގެ ބައެއް ގައުމުތަކަށް ކޯސްޓަލް ރޭޑާ ސިސްޓަމް ހަދިޔާކޮށްފައި ވާއިރު، އެ ގައުމުތަކުގެ ތެރޭގައި މޮރިޝަސް އާއި ދިވެހިރާއްޖެ ހިމެނެ އެވެ.
އަލް ޖަޒީރާގެ ތަހުގީގީ ޓީމުން ސުވާލު ކުރުމުން މޮރިޝަސްގެ ސަރުކާރުން ބުނީ އަސްކަރީ މަރުކަޒެއް އެޅުމުގެ އެއްބަސްވުމެއް ނެތް ކަމަށާއި އަގަލޭގާ އައިލެންޑުގައި ގާއިމްކުރާ ފެސިލިޓީތައް ކޮންޓްރޯލް ކުރާނީ އެ ގައުމުން ކަމަށެވެ. އަދި އެހެން ގައުމަކަށް އެ ތަންތަން ބޭނުން ކުރެވޭނީ މޮރިޝަސް ސަރުކާރުގެ ހުއްދަ އޮވެގެން ކަމަށެވެ.
އިންޑިއާގެ ޑިފެންސް މިނިސްޓްރީ އާއި އެކްސްޓާނަލް އެފެއާޒް މިނިސްޓްރީން އަލް ޖަޒީރާގެ ސުވާލުތަކަށް ޖަވާބުދީފައެއް ނުވެ އެވެ.
