ކޮލްކަޓާ، އިންޑިއާ (އޯގަސްޓު 3) - އިރުމަތީ އިންޑިއާއަށް މޫސުން ގޯސްވެ ފެން ބޮޑުވެގެންނާއި، ބިންގަނޑު ކަނޑައިގެން ދިއުމުގެ ހާދިސާތަކުގައި އިތުރު 16 މީހުން މަރުވެ، 250،000 މީހުން ހާލުގައި ޖެހިއްޖެ އެވެ.
ވެސްޓް ބެންގޯލަށް ކުރަމުންދާ ވިއްސާރާގައި މީގެ ކުޑަ ދުވަސްކޮޅެއް ކުރިން ވެސް 11 މީހަކު މަރުވެފައިވެ އެވެ. ފާއިތުވި ދެ ދުވަސް ތެރޭގައި ވެސްޓް ބެންގޯލްގެ ދެ ކޯރެއް ބަންޑުންވުމުން ހަ ޑިސްޓްރިކްޓެއްގައި ދިރިއުޅޭ ބައި މިލިއަން މީހުންނަށް ވަނީ އަސަރުކޮށްފަ އެވެ.
މިފަހަރުގެ ހާދިސާތަކުގައި މަރުވި 16 މީހުންގެ ތެރެއިން ފަސް މީހުންގެ ހަށިގަނޑު ފެނުނީ އޮޔާ ގޮސްފައި ވަނިކޮށެވެ. އެހެން މީހުން މަރުވީ ދިރިއުޅެމުން ދިޔަ ޗަކައިން ހަދާފައިވާ ގެތައް ވެއްޓިގެންނެވެ.
ފެންބޮޑުވެފައިވާ ސަރަހައްދުތަކުގެ އިމާރާތެއްގެ ފުރާޅު މަތިން ވެސް ގިނަ ބަޔަކު ސަލާމަތްކޮށްފައިވެ އެވެ. ހެލިކޮޕްޓަރުގެ ބޭނުންކޮށްގެން ސަލާމަތް ކުރި މީހުންގެ ތެރޭގައި 100 އަހަރުގެ އަންހެނަކާއި ނުވަ މަހުގެ ތުއްތު ކުއްޖެއް ހިމެނެ އެވެ.
ހާލުގައި ޖެހިފައިވާ މީހުންނަށް އެހީވުމަށް 40 ސެންޓަރު ގާއިމްކޮށްފައިވެ އެވެ. މި އަހަރުގެ ވިއްސާރަ މޫސުމުގައި އިންޑިއާގެ ހުޅަނގުން މިހާތަނަށް 250 އަށް ވުރެ ގިނަ މީހުން މަރުވެފައި ވެ އެވެ.
މިދިޔަ މަހު މަހަރާޝްތްރަ ސްޓޭޓަށް ބޯކޮށް ވާރޭ ވެހި ހިނގި ބިންގަނޑު ކަނޑައިގެން ދިޔުމުގެ ހާދިސާތަކުގައި 200 މީހުން މަރުވި އެވެ. އޭގެ އިތުރުން އުތުރުގައި އޮންނަ އުއްތަރްހާންދް އާއި ހިމާޗަލް ޕްރަދޭޝް ސްޓޭޓުން ވެސް މީހުން މަރުވެފައި ވެ އެވެ.
އިންޑިއާއަށް ވިއްސާރަ މޫސުން އަންނީ ޖޫން އިން ސެޕްޓެމްބަރަށެވެ. މޫސުމް ގޯސްވެ ލިބޭ ގެއްލުންތައް އަހަރަށް ވުރެ އަހަރެއް ބޮޑުވަމުން ދާއިރު، އެކަމާ ގުޅިފައިވާ މައިގަނޑު ސަބަބަކީ މޫސުމަށް އަންމުންދާ ބަދަލުތައް ކަމަށް ތަޖުރިބާކާރުން ވިދާޅުވެ އެވެ.
