ނިއު ދިއްލީ، އިންޑިއާ (ޖުލައި 30) - އިންޑިއާގެ އައްސާމް ސްޓޭޓާއި މިޒޮރަމް ސްޓޭޓާ ދެމެދު ހަމަލާ ބަދަލުކުރުމާއެކު އައްސާމްގެ ރައްޔިތުން މިޒޮރަމްއަށް ނުދިޔުމަށް ޓްރެވަލް އެޑްވައިޒަރީ ނެރެފި އެވެ.
ދެ ސްޓޭޓް ގުޅޭ ބޯޑަރު ސަރަހައްދުގައި ހިނގި ކުރިމަތިލުންތަކުގައި ފުލުހުންގެ ހަ މީހަކު ވަނީ މަރުވެފަ އެވެ.
އިންޑިއާގެ އިރު އުތުރަކީ 1947 ގައި އެ ގައުމަށް މިނިވަންކަން ލިބުނު ފަހުން ވެސް ހަމަނުޖެހުން ބޮޑު ސަރަހައްދެކެވެ. އެ ހިސާބުގެ ހަތް ސްޓޭޓުގެ ބޯޑަރާ މެދު އަބަދުވެސް ހިޔާލު ތަފާތުވުން އޮވެ އެވެ. ނަމަވެސް ހަމަލާ ބަދަލު ކުރުމަކީ ފެންނަ މަންޒަރެއް ނޫނެވެ.
އައްސާމް އާއި މިޒޮރަމްގެ ބޯޑަރުގެ މައްސަލަ ޖެހިފައި އޮންނަތާ އެތައް އަހަރެއް ވެފައި ވާއިރު، މިދިޔަ ހޯމަ ދުވަހު ހިނގި ހަމަނުޖެހުންތަކުގައި ފުލުހުންގެ ހަ މީހަކު މަރުވެ 60 އަށް ވުރެ ގިނަ މީހުންނަށް އަނިޔާވި އެވެ.
"މިހާރު އޮތް ސީރިއަސް ހާލަތަށް ބަލާފައި، އައްސާމްގެ ރައްޔިތުންނަށް ލަފާދީފައި ވަނީ މިޒޮރަމްއަށް ދަތުރު ނުކުރުމަށް،" ބުރާސްފަތި ދުވަހު ނެރުނު ޓްރެވަލް އެޑްވައިޒަރީގައި ވެ އެވެ.
"މި ވަގުތު މިޒޮރަމްގައި ތިބި އައްސާމް ރައްޔިތުން ވެސް އަމިއްލަ ރައްކާތެރިކަމަށް ސަމާލުކަން ދިނުމަށް ބާރު އަޅަން. މިޒޮރަމްގެ ގިނަ ބަޔަކު ތިބީ އޮޓޮމެޓިކް ހަތިޔާރު ހިފައިގެން".
އިންޑިއާއަކީ އަވައްޓެރި ޗައިނާ އާއި ޕާކިސްތާނާ ދެމެދު ޒަމާންވީ ބޯޑަރުގެ މައްސަލަ އޮންނަ ގައުމެކެވެ. ނަމަވެސް ގައުމުގެ ތެރޭގައި ދެ ސްޓޭޓަކުން މި ގޮތަށް އަރައިރުން ވަމުން ދާތީ މިއީ ބޮޑު ވަޒީރު ނަރެންދްރަ މޯދީގެ ސަރުކާރަށް އޮތް ގޮންޖެހުމެކެވެ.
ހަމަނުޖެހުމާ ގުޅިގެން އެއް ސްޓޭޓް އަނެއް ސްޓޭޓަށް ދަނީ ތުހުމަތު ކުރަމުންނެވެ.
މިޒޮރަމްއަށް ނިސްބަތްވާ ސިޔާސީ ލީޑަރެއް ކަމަށްވާ ކޭ. ވަންލަލްވޭނާ ބުދަ ދުވަހު މަޖިލީހުގެ މަތިގޭގައި ވިދާޅުވީ އެ ސްޓޭޓުން ހަމަނުޖެހުމަށް ތައްޔާރަށް އޮތް ކަމަށެވެ.
"ދުއިސައްތަ އަށް ވުރެ ގިނަ ފުލުހުން އަޅުގަނޑުމެންގެ ބިމަށް އެތެރެވެ، އަޅުގަނޑުމެންގެ ފުލުހުން ފަހަތަށް ޖައްސަން ފެށީ. ފުރަތަމަ ބަޑި ޖަހަން އެންގީ ވެސް އެ މީހުން،" ވަންލަލްވޭނާ ވިދާޅުވި ކަމަށް އިންޑިއާގެ ނޫސްތަކުން ރިޕޯޓު ކުރި އެވެ.
"އެ އެންމެން މަރު ނުވީ އެ މީހުންގެ ނަސީބުން. އެ މީހުން ދެ ވަނަ ފަހަރަށް އަތުވެއްޖެ ނަމަ، އެންމެން މަރާލާނަން."
