ކޮކްސަޒް ބާޒާރު، ބަންގްލަދޭޝް (ޖުލައި 30) - ބޯކޮށް ވާރޭ ވެހި ފެންބޮޑުވުމާއި ބިންގަނޑު ކަނޑައިގެން ދިޔުމުގެ ހާދިސާތަކުގައި ދެކުނު އިރުމަތީ ބަންގްލަދޭޝްގެ އަވަށްތަކުން 300،000 އަށް ވުރެ ގިނަ މީހުން ހާލުގައި ޖެހިއްޖެ އެވެ.
އޮފިޝަލުން ބުނީ އެ ހާދިސާތަކުގައި މިހާތަނަށް 20 މީހަކު މަރުވެފައި ވާއިރު، އޭގެ ތެރޭގައި ރޮހިންޔާ ދަރިކޮޅުގެ ހަ ރެފިއުޖީން ހިމެނޭ ކަމަށެވެ.
މޫސުން ގޯސްވެ ފެންބޮޑުވި ހިސާބަކީ ބަންގްލަދޭޝާއި މިޔަންމާ ގުޅޭ ބޯޑަރު ސަރަހައްދެވެ. އެ ތަނުގައި ޖަހާފައިވާ ރެފިއުޖީ ކޭމްޕުތަކުގައި މިޔަންމާގެ އެއް މިލިއަން ރެފިއުޖީން ދިރިއުޅެ އެވެ.
"ފެންބޮޑުވެ 306،000 މީހުން ކޮކްސަޒް ބާޒާރު ޑިސްޓްރިކްޓުގައި ވަނީ ހާލުގައި ޖެހިފައި. މަދުވެގެން 70 އަވަށުގައި ފެންބޮޑުވެފައިވޭ،" އެ ޑިސްޓްރިކްޓުގެ އެޑްމިނިސްޓްރޭޓަރު މަމުނޫރް ރާޝިދު އޭއެފްޕީއަށް ވިދާޅުވި އެވެ.
"ފެންބޮޑުވުމާއި ބިންގަނޑު ކަނޑައިގެން ދިޔުމާ ހެދި މަދުވެގެން 20 މީހުން މަރުވި. އޭގެ ތެރޭގައި ރޮހިންޔާ ރެފިއުޖީންގެ ހަ މީހަކު ހިމެނޭ."
އޮފިޝަލުން ބުނީ ގާތްގަނޑަކަށް 36،000 މީހުން ސްކޫލުތަކާއި ވަގުތީ ހިޔާތަކަށް ބަދަލުކޮށްފައިވާ ކަމަށެވެ.
"ބައެއް ގެތަކުގައި އޮތީ އެއްކޮށް ފެންބޮޑުވެފައި. އެތައް ހާސް ބަޔަކު ފާއިތުވި ތިން ދުވަހު ތިބީ ގެއިން ނުނިކުމެވިފައި. މަގުތައް ވަނީ އެއްކޮށް ބަންދުވެފައި،" މީހުން މަދު ޖިލްވަންޖާ ޔޫނިއަންގެ ކައުންސިލަރު ތީޕޫ ސުލްތާން އޭއެފްޕީއަށް ވިދާޅުވި އެވެ.
މި ހަފްތާގެ ކުރީކޮޅު ކޮކްސަޒް ބާޒާރު ސަރަހައްދުގެ ރެފިއުޖީ ކޭމްޕުތަކުން 10،000 މީހުން ރައްކާތެރި ހިސާބުތަކަށް ބަދަލުކޮށްފައި ވެ އެވެ.
އެހީ ފޯރުކޮށްދޭން މަސައްކަތް ކުރާ ފަރާތްތަކުން ބުނީ ކޮވިޑް ކޮންޓްރޯލް ކުރަން ރެފިއުޖީ ކޭމްޕުތައް ލޮކްޑައުންކޮށްފައި ވާތީ އެ މީހުންގެ މަސައްކަތަށް ހުރަސް އެޅިފައިވާ ކަމަށެވެ.
ގާތްގަނޑަކަށް 740،000 ރޮހިންޔާ ދަރިކޮޅު މީހުން 2017 ވަނަ އަހަރު ވަނީ މިޔަންމާގެ ރާހީން ސްޓޭޓް ދޫކޮށް އެހެން ތަންތަނަށް ގޮސްފަ އެވެ. އެ މީހުން ގައުމު ދޫކޮށް ދާން ޖެހުނީ އެ ދަރިކޮޅު މީހުންނާ ދެކޮޅަށް ސިފައިން ޖަރީމާތައް ހިންގަން ފެށުމުންނެވެ.
