ބެންކޮކް، ތައިލޭންޑް (ޖުލައި 29) - ބުރާސްފަތި ދުވަހު ތައިލޭންޑުގައި ރިކޯޑް އަދަދަށް ކޮވިޑް ކޭސްތަކާއި މަރުތައް އިތުރުވެފައި ވާއިރު، ހޮސްޕިޓަލްތަކާއި އައިސޮލޭޝަން ފެސިލިޓީތައް ފުރެމުންދާ ކަމަށް ހެލްތު މިނިސްޓްރީން ބުނެފި އެވެ.
ދެކުނު އިރުމަތީ އޭޝިއާގައި އޮންނަތައިލޭންޑުގައި ހަލުވިކަމާއެކު ފެތުރެމުން ދަނީ އެހެން ވޭރިއެންޓުތަކަށް ވުރެ ނުރައްކާ ބޮޑު ޑެލްޓާ ވޭރިއެންޓާ ހެދި އެވެ. ޕޮޒިޓިވް ކޭސްތަކާއި މަރުވާ އަދަދު ހިފެހެއްޓުމެއް ނެތި އިތުރުވަމުން ދާއިރު، ސިއްހީ ފަރުވާގެ ނިޒާމު އޮތީ ހުއްޓެން ކައިރިވެފަ އެވެ.
ބަލި އެންމެ ބޮޑަށް ފެތުރެމުންދާ ޕްރޮވިންސްތަކުގައި ހަރުކަށި ފިޔަވަޅުތަކާއެކު ރޭގަނޑުގެ ވަގުތުގައި ކާފިއު ހިންގި ނަމަވެސް، ބުރާސްފަތު ދުވަހު އެކަނިވެސް ރިކޯޑް އަދަދަކަށް 17،669 މީހުން ޕޮޒިޓިވްވެ، 165 މީހުން މަރުވި އެވެ.
"އަޅުގަނޑު މި ވާހަކަ ދައްކަނީ ވަރަށް ސާފުކޮށް. ހޮސްޕިޓަލުތަކުގައި ބޭނުންވާ އަދަދަށް އެނދެއް ނެތް،" ޑިޕާޓްމަންޓް އޮފް މެޑިކަލް ސާވިސަސްގެ ހެލްތު މިނިސްޓްރީ ޑިރެކްޓަރު ޖެނެރަލް ސޮމްސަކް އައްކަސިލްޕް ނޫސްވެރިންގެ ބައްދަލުވުމެއްގައި ވިދާޅުވި އެވެ.
"ބޮޑެތި ހޮސްޕިޓަލުތަކުގެ އައިސީޔޫ ހުރިހާ އެނދެން ވަނީ ފުރިފައި. އެ ތަންތަނުގައި އައިސީޔޫއަށް 10 އެނދު ހުރި ނަމަ، 12 އައިސީޔޫ ކޭސް އެބަ ބަލަހައްޓަން ޖެހޭ."
ސޮމްސަކް ވިދާޅުވީ ވެރިރަށް ބެންކޮކްގެ ހޮސްޕިޓަލްތަކުގެ ކެޕޭސިޓީއަކީ ދުވާލަކު 1،000 އާ ކޭސް މެނޭޖު ކުރުން ކަމަށެވެ. ނަމަވެސް އެ އަދަދަށް ވުރެ އެތައް ގުނައެއް އިތުރަށް ބަލި މީހުންނަށް ފަރުވާ ދޭން ޖެހޭ ކަމަށާއި ބުރާސްފަތި ދުވަހު އެކަނިވެސް ބެންކޮކުން 4،000 އާ ކޭސް ފެނުނު ކަމަށް އޭނާ ވިދާޅުވި އެވެ.
ޕޮޒިޓިވް މީހުންގެ ތެރެއިން މާ ބޮޑު އަލާމާތެއް ނުފެންނަ މީހުން ގޭގައި ތިބެ އައިސޮލޭޓްވުމަށް ކަމާ ބެހޭ ފަރާތްތަކުން މިހާރު ދަނީ ބާރު އަޅަމުންނެވެ. ނަމަވެސް އެ މީހުންނަށް ބޭނުންވާ ބޭސް ގޭގެއަށް ސަޕްލައި ކުރުމުގައި ދަތިތައް އެބަ ހުއްޓެވެ.
ކޮވިޑް ބަލިމަޑުކަން ފެށުނު ފަހުން ތައިލޭންޑުން ޖުމްލަ 561،000 އަށް ވުރެ ގިނަ ކޭސް ފެނިފައި ވާއިރު، 4،562 މީހުން މަރުވެފައި ވެ އެވެ.
ބޮޑު ވަޒީރު ޕްރަޔުތް ޗަން އޮޗާގެ ސަރުކަރުން ބަލި ކޮންޓްރޯލް ކުރަން ކުރަމުންދާ މަސައްކަތަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ. އެގޮތުން ވެކްސިން ހޯދުމުގައި ދިމާވަމުންދާ މައްސަލަތަކާއި ބަލިމަޑުކަމުގެ އަސަރުކުރާ ދާއިރާތަކަށް ބޭނުންވާ އެހީ ނުދޭ ކަމަށް ތުހުމަތު ކުރެ އެވެ.
ތައިލޭންޑުގައި މިހާރު ދެމުން އަންނަނީ ސިނޮވެކް، ސިނޮފާމް އަދި އެސްޓްރަޒެނިކާ ވެކްސިނެވެ. ނަމަވެސް ވެކްސިން ޕްރޮގްރާމް ލަސްވުމުންނާއި ފައިޒާ އަދި މޮޑާނާގެ ވެކްސިން ހޯދާފައި ނުވާތީ އާއްމުން އަންނަނީ ނުރުހުން ފާޅުކުރަމުންނެވެ.
އެމެރިކާގެ އެމްބަސީން ވަނީ ފައިޒާގެ 1.5 މިލިއަން ޑޯޒް ތައިލޭންޑަށް ހަދިޔާކޮށްފަ އެވެ. އެ ޝިޕްމަންޓް ހުކުރު ދުވަހު އެ ގައުމަށް ލިބޭނެ އެވެ.
