ތޫނިސް، ޓިއުނީޝިއާ (ޖުލައި 28) - ބޮޑު ވަޒީރު މަގާމުން ވަކިކޮށް، މަޖިލިސް މެދުކަނޑާލާފައިވާ ޓިއުނީޝިއާގައި "ގަދަބާރުން ވެރިކަން ނުކޮށް" އާ އިންތިހާބެއް ބާއްވަން އިދިކޮޅު ފަރާތްތަކުން ރައީސް ކައިސް ސައީދަށް ގޮވާލައިފި އެވެ.
ރައީސް އުވާލެއްވި ކޯލިޝަން ސަރުކާރުގައި ހިމެނޭ އެންމެ ބޮޑު އަދި އެންމެ ބާރުގަދަ އިންނަހްދާ ޕާޓީން ވަނީ ރައީސްގެ އަމަލުތަކަކީ ބަގާވާތެއްގެ ގޮތުގައި ސިފަކޮށްފަ އެވެ. އެމެރިކާ، ޔޫރަޕިއަން ޔޫނިއަން (އީޔޫ) އަދި އެހެން ގައުމުތަކުން ވެސް ކަންބޮޑުވުން ފާޅުކޮށްފައި ވެ އެވެ.
އިންނަހްދާ ޕާޓީން ގޮވާލާފައި ވަނީ މުޅިން އާއި މަޖިލިސް އިންތިހާބަކާއި ރިޔާސީ އިންތިހާބެއް ބޭއްވުމަށެވެ. އަދި އިންތިހާބު ބޭއްވުން ލަސް ކުރުމަކީ "ހުދުމުހުތާރު ވެރިކަމެއް ދަމަހައްޓަން މަސައްކަތް ކުރުން" ކަމުގައި ދެކޭނެ ކަމަށް ވެސް އެ ޕާޓީން ބުންޏެވެ.
ރައީސް ވަނީ "ޑިމޮކްރެސީގެ އުސޫލުތަކާ ހިލާފަށް ރައްޔިތުން އިންތިހާބުކޮށްފައިވާ އޮފިޝަލުން ބާރު ކަނޑުވާލައި، އެމަނިކުފާނަށް ފެންނަ ބަޔަކު މަގާމުތަކަށް ގެނެސްފައި" ކަމަށް އެ ޕާޓީން ބުންޏެވެ. މިހާރު ގައުމުގައި ހަމަނުޖެހުން އުފައްދަނީ ވެސް ރައީސް އަށް ސަޕޯޓު ކުރާ ގޭންގުތަކުން ކަމަށެވެ.
އެ ޕާޓީން ސަޕޯޓަރުންނަށް ގޮވާލާފައި ވަނީ ގައުމުގެ ހަމަޖެހުމާއި ސުލްހައަށް އިސްކަން ދިނުމުގެ ގޮތުން މަގުތަކަށް ނުނިކުމެ ގެތަކުގައި ތިބުމަށެވެ. ބާރަ މިލިއަން މީހުން ދިރިއުޅޭ ޓިއުނީޝިއާގެ ސިޔާސީ މަޝްރަހު ހަލަބޮލިވީ މިދިޔަ އާދީއްތަ ދުވަހު އެވެ.
ރައްޔިތުންގެ ގިނަ ބަޔަކު ސަރުކާރާ ދެކޮޅަށް މުޒާހަރާ ކުރިތާ އެއް ދުވަސް ފަހުން ރައީސް ނިންމެވީ ބޮޑު ވަޒީރު ހިޝޭމް މެޝީޝީ މަގާމުން ދުރުކޮށް، 30 ދުވަހަށް މަޖިލިސް މެދުކަނޑާލުމަށެވެ. ސިފައިން މިހާރު ދަނީ މަޖިލީހާ ބޮޑު ވަޒީރުގެ އޮފީސް ކައިރި ފޯރިމަރަމުންނެވެ.
ރައީސް ވިދާޅުވީ އާ ބޮޑު ވަޒީރު އިހްތިޔާރު ކުރައްވާނީ އެމަނިކުފާނު ކަމަށާއި އިދިކޮޅުން ހަތިޔާރާއެކު ނުކުމެއްޖެ ނަމަ ރައްދުގައި ސިފައިން ނެރޭނެ ކަމަށެވެ. އޭގެ ފަހުން ޑިފެންސް މިނިސްޓަރާއި ޖަސްޓިސް މިނިސްޓަރު ވެސް މަގާމުން ވަކިކުރެއްވި އެވެ.
