ތޫނިސް، ޓިއުނީޝިއާ (ޖުލައި 27) - ޓިއުނީޝިއާގެ ބޮޑު ވަޒީރު މަގާމުން ވަކިކޮށް، މަޖިލިސް މެދުކަނޑާލިތާ އެއް ދުވަސް ފަހުން ޑިފެންސް މިނިސްޓަރު ވެސް މަގާމުން ވަކިކޮށްފި އެވެ.
ބޮޑު ވަޒީރު ހިޝޭމް މެޝީޝީ މަގާމުން ވަކި ކުރުމުން އެތައް ހާސް ބަޔަކު އުފާ ފާޅު ކުރިއިރު، އެކަމާ ދެކޮޅަށް ވެސް މަޖިލީސް ކައިރިއަށް މީހުން އެއްވި އެވެ. އެއާއެކު ބޮޑެތި ހަމަނުޖެހުންތައް ހިނގި އެވެ.
ޓިއުނީޝިއާގެ އެންމެ ބޮޑު ސިޔާސީ ޕާޓީ، އިންނަހްދާ ޕާޓީން ބުނީ ރައީސް ކައިސް ސައީދުގެ ނިންމެވުމަކީ "ބަގާވާތެއް" ކަމަށެވެ. މެޝީޝީ ވިދާޅުވީ ރައީސް އިހްތިޔާރު ކުރައްވާ ބޭފުޅަކަށް ބާރުތައް ހަވާލުކުރައްވާނެ ކަމަށެވެ.
ރައީސް ސައީދު ވިދާޅުވީ ގާނޫނު އަސާސީގެ ދަށުން މަޖިލިސް އުވާލަން ތަން ނުދޭ ކަމަށާއި އެހެންވެ 30 ދުވަހަށް މެދުކަނޑާލަން ނިންމެވީ ކަމަށެވެ. މިއީ ޓިއުނީޝިއާ އާއި ގައުމުގެ ރައްޔިތުން ސަލާމަތް ކުރަން އަޅަން މަޖުބޫރުވި ފިޔަވަޅެއް ކަމަށް ވިދާޅުވި އެވެ.
ސިފައިންގެ އެންމެ މަތީ ވެރިޔާގެ ގޮތުގައި ވެސް ހުންނަވާ ސައީދު ވަނީ އިދިކޮޅު ފަރާތްތަކުން ހަތިޔާރާއެކު މަގުތަކަށް ނިކުމެއްޖެ ނަމަ، ރައްދުގައި ސިފައިން ނެރޭނެ ކަމުގެ އިންޒާރު ދެއްވާފަ އެވެ.
ހޯމަ ދުވަހު މެންދުރު ފަހު ޑިފެންސް މިނިސްޓަރު އިބްރާހިމް ބަރްތާޖީ މަގާމުން ވަކި ކުރެއްވި އިރު، ވަގުތީ ޖަސްޓިސް މިނިސްޓަރު ހަސްނާ ބިން ސުލައިމާން ވެސް ވަކި ކުރެއްވި އެވެ.
ސައީދަށް ތާއީދު ކުރާ މީހުންނާއި އިދިކޮޅު ސަޕޯޓަރުންނާ ދެމެދު އިއްޔެ ހަމަނުޖެހުން ހިނގި އެވެ. ސިފައިން ނުކުމެ އެ ސަރަހައްދުގެ ސެކިއުރިޓީ ބެލެހެއްޓިއިރު، ސިފައިން ވަނީ މެޝީޝީގެ އޮފީސް ވެސް ވަށާލާފަ އެވެ.
އެމެރިކާ އާއި ޔޫރަޕިއަން ޔޫނިއަން (އީޔޫ) އިން ގޮވާލެއްވީ ޑިމޮކްރެސީއަށް އިހްތިރާމުކޮށް، ހުރިހާ ސިޔާސީ ފަރާތްތަކާއެކު މަޝްވަރާ ކުރުމަށެވެ.
