ބެއިރޫތު، ލުބްނާން (ޖުލައި 27) - އިގްތިސާދީ ބޮޑު ކާރިސާއެއް ކުރިމަތިވެފައިވާ ލުބްނާންގެ ސިޔާސީ މަޝްރަހު ހަމައަކަށް އެޅުވުމަށް އާ ސަރުކާރު އުފެއްދުމުގެ މަސައްކަތް ކުރީގެ ބޮޑު ވަޒީރު އަދި ބިލިއަނަރު ނަޖީބް މިކާތީއާ ހަވާލުކޮށްފި އެވެ.
އާ ސަރުކާރަށް ކުރިމަތިވާނެ އެންމެ ބޮޑު މަސައްކަތަކީ 150 އަހަރުގެ ތެރޭގައި ލުބްނާނަށް ކުރިމަތިވެފައިވާ އެންމެ ގޯސް މާލީ ހާލަތުން ގައުމު ސަލާމަތްކޮށް، އަންނަ އަހަރު ބޭއްވުމަށް ހަމަޖެހިފައިވާ އިންތިހާބުގެ ކަންކަން ކުރިއަށް ގެންދިޔުމެވެ.
އުމުރުން 65 އަހަރުގެ މިކާތީއަކީ ލުބްނާންގެ ކޮރަޕްޓް މަހުޖަނުންގެ މިސާލެއް ކަމަށް ބައެއް ފަރާތްތަކުން ބުނެ އެވެ. ޓެލެކޮމިއުނިކޭޝަންސް ދާއިރާއިން ކުރިއަށް ގޮސްފައިވާ މިކާތީ ވިދާޅުވީ އާ ސަރުކާރު އުފައްދަން ލިބުމަކީ "އުނދަގޫ ފިޔަވަޅެއް" ކަމަށެވެ.
"އަޅުގަނޑު އަތުގައި ޖާދޫ ހަދާނެ ދަނޑިއެއް ނެތް. އަދި އަޅުގަނޑު އެކަނި ކުރާ މަސައްކަތުން ތަފާތެއް ނުފެންނާނެ،" އޭނާ ވިދާޅުވި އެވެ.
ކުރީގެ ބޮޑު ވަޒީރު ސާދް ހަރީރީ އިސްތިއުފާ ދެއްވީ މި މަހުގެ ކުރީ ކޮޅު ސިޔާސީ ފަރާތްތަކުގެ މެދުގައި އެއްބަސްވުމެއް ގާއިމްކޮށް ސަރުކާރެއް އުފެއްދުމަށް ކުރި މަސައްކަތް ކުރިއަށް ނުދިޔުމުންނެވެ.
މިކާތީ އެންމެ ފަހުން ބޮޑު ވަޒީރުކަން ކުރެއްވީ 2014 ވަނަ އަހަރު އެވެ. އޭނާއަކީ އާ ސަރުކާރު އުފެއްދުމަށް ކަނޑައެޅި ތިން ވަނަ ރަމްޒީ ބޮޑު ވަޒީރެވެ. ލުބްނާންގެ ސަރުކާރު އިސްތިއުފާ ދިނީ މިދިޔަ އޯގަސްޓް މަހު ބެއިރޫތު ބަނދަރުގައި ހިނގި ބޮޑު ގޮވުމަށް ފަހު އެވެ.
މިކާތީއަކީ ބެލެވޭ ގޮތުގައި ލުބްނާންގެ އެންމެ މުއްސަނދި މީހާ އަދި މެދުއިރުމަތީގެ އެންމެ ބޮޑެތި މަހުޖަނުންގެ ތެރެއިން އެކަކެވެ. ފޯބްސް މަޖައްލާއިން އަންދާޒާ ކުރާ ގޮތުގައި އޭނާގެ މުއްސަނދި ކަމުގައި 2.7 ބިލިއަން ޑޮލަރު ހުންނާނެ އެވެ.
