ޓްރިޕޮލީ، ލީބިޔާ (ޖުލައި 27) - ލީބިޔާއިން ފުރައިގެން މެޑިޓެރޭނިއަން ކަނޑު ހުރަސްކޮށް ޔޫރަޕަށް ހިޖުރަ ކުރަން މަސައްކަތް ކުރަނިކޮށް ބޯޓެއް ބަންޑުން ޖަހާލައި، 57 މީހަކު ގެނބިގެން މަރުވެއްޖެ އެވެ.
އިންޓަނޭޝަނަލް އޯގަނައިޒޭޝަ ފޯ މައިގްރޭޝަން (އައިއޯއެމް) ގެ ލީބިޔާ މިޝަން ޗީފް ފެޑެރިކޯ ސޯޑާ ވިދާޅުވީ ހިޖުރަ ކުރަން އުޅޭ މީހުން މަރުވާ މައްސަލާގައި އަޅާ ނުލާ ތިބެގެން ނުވާނެ ކަމަށެވެ.
އައިއޯއެމް އިން ބުނީ ބޯޓު ބަންޑުން ޖަހާލީ ވެރިރަށް ޓްރިޕޮލީގެ 120 ކިލޯމީޓަރު އިރުން އޮންނަ ހޮމްސް ބަނދަރުން ފުރި ބޯޓެއް ކަމަށެވެ. ޔޫރަޕަށް ހިޖުރަ ކުރާ ގިނަ ބަޔަކު ފުރަނީ ލީބިޔާގެ ބަނދަރުތަކުންނެވެ.
ބޯޓު ބަންޑުން ޖަހާލި ސަބަބު ސާފު ނުވި ނަމަވެސް، އާއްމު ގޮތެއްގައި ހިޖުރަ ކުރާ މީހުން ގޮވައިގެން ފުރާ ބޯޓުތަކުގައި ކެޕޭސިޓީއަށް ވުރެ އެތައް ގުނައެއް އިތުރުކޮށް މީހުން އުފުލަ އެވެ.
އޭގެ އިތުރުން އެފަދަ ބޯޓުތަކަކީ ރަނގަޅަށް ފަރުމާކޮށްފައި ނުވާ، ރައްކާތެރިކަމުގެ އެއްވެސް ފިޔަވަޅެއް ނުހުންނަ ބޯޓުތަކެވެ. އަދި އާއްމުކޮށް ދަތުރަށް ނުކުންނަނީ ކޯސްޓްގާޑަށް ފިލައިގެން ދަންވަރު މޫސުމަށް ބެލުމެއް ނެތި އެވެ.
މި އަހަރުގެ ފުރަތަމަ ހަ މަސް ތެރޭ ލީބިޔާ ކޯސްޓުގާޑުން ވަނީ މެޑިޓެރޭނިއަން ކަނޑުގައި ހާލުގައި ޖެހިފައި ތިބި 13،000 އަށް ވުރެ ގިނަ މީހުން ސަލާމަތްކޮށްފަ އެވެ.
މި މަހު ކުރީކޮޅު އައިއޯއެމް އިން ބުނީ މެޑިޓެރޭނިއަން ކަނޑު ހުރަސް ކުރަން އުޅެނިކޮށް މަރުވި މީހުންގެ އަދަދު މިދިޔަ އަހަރާ އަޅާ ބަލާއިރު ދެ ގުނަ އިތުރުވެފައިވާ ކަމަށެވެ.
ހިޖުރަ ކުރުން ހުއްޓުވުމަށް ޔޫރަޕިއަން ޔޫނިއަން (އީޔޫ) އިން އަންނަނީ ލީބިޔާއަށް އެހީވަމުންނެވެ. ނަމަވެސް އެފަދަ މީހުން ލީބިޔާގައި ބަންދު ކުރާ މަރުކަޒުތަކުގެ ހާލަތު ވަރަށް ދެރަ އެވެ.
މެޑިޓެރޭނިއަން ކަނޑުން ހިފަހައްޓާ މީހުން އަނބުރާ ލީބިޔާ އަށް ހަވާލު ކުރާތީ ބައިނަލްއަގްވާމީ ފަރާތްތަކުން އެކަން ކުށްވެރިކޮށްފައި ވެ އެވެ.
ތެލުގެ މުއްސަނދިކަން ލިބިފައިވާ ލީބިޔާގައި ހަމަނުޖެހުން ބޮޑުވެ، ހާލަތު ގޯސްވީ 2011 ވަނަ އަހަރު ލީޑަރު މުއައްމަރު ގައްޒާފީ އަވަހާރަކޮށްލުމަށް ފަހު އެވެ.
ނަމަވެސް މިދިޔަ އަހަރުގެ އޮކްޓޯބަރު މަހު ވާދަވެރި ގްރޫޕުތަކުން ވަނީ ސުލްހައިގެ އެއްބަސްވުމެއްގައި ސޮއިކޮށް، އިންތިގާލީ ސަރުކާރެއް ގާއިމްކޮށްފަ އެވެ.
