ތޫނިސް، ޓިއުނީޝިއާ (ޖުލައި 26) - ޓިއުނީޝިއާގެ ވެރިކަން ކުރާ ޕާޓީއާ ދެކޮޅަށް ބޭއްވި ވަރުގަދަ އެއްވުންތަކާ ގުޅިގެން މަޖިލިސް މެދުކަނޑާލައި، ބޮޑު ވަޒީރު ހިޝޭމް މެޝީޝީ މަގާމުން ވަކިކުރަން ރައީސް ކައިސް ސައީދު ނިންމަވައިފި އެވެ.
އާދީއްތަ ދުވަހު އެތައް ހާސް އާއްމުންނެއް ވަނީ ގިނަ ސިޓީތަކުގެ މަގުތަކަށް ނުކުމް އިންނަހްދާ ޕާޓީއާ ދެކޮޅަށް މުޒާހަރާކޮށްފަ އެވެ. ރައްޔިތުން ދެކޭ ގޮތުގައި ސަރުކާރު ވަނީ ގިނަ ކަންކަމުގައި ފެއިލްވެފަ އެވެ. އޭގެ ތެރޭގައި ކޮވިޑް ކޮންޓްރޯލް ކުރުން ވެސް ހިމެނެ އެވެ.
ރިޔާސީ ގަނޑުވަރުގައި އޮތް ކުއްލި ބަދަލުވުމަކަށް ފަހު މަޖިލިސް މެދުކަނޑާލިކަން އިއުލާނު ކުރެއްވުމާއެކު އާއްމުން ވަނީ އުފާ ފާޅުކުރުމަށް މަގުތަކަށް ނުކުމެ ހަވާ އަރުވާ ހަދާފަ އެވެ. ވެރިރަށް ތޫނިސްގައި ވެސް ކޮވިޑް ކޮންޓްރޯލް ކުރަން އަޅާފައިވާ ފިޔަވަޅުތަކާ ހިލާފަށް އެތައް ސަތޭކަ ބަޔަކު އެއްވި އެވެ.
ދެހާސް ނަވާރަ ވަނަ އަހަރު ރައީސްކަމަށް އިންތިހާބުވެ ވަޑައިގެންނެވި ސައީދު އާއި ބޮޑު ވަޒީރު މެޝީޝީ އަދި މަޖިލީހުގެ ރައީސް ރާޝިދު ގަންނޫޝީއާ ދެމެދު އޮތް ވާދަވެރިކަމާއި ނުތަނަވަސްކަމުގެ ސަބަބުން ސަރުކާރު ހިންގުމަށް ގިނަ ދަތިތަކާ ކުރިމަތިވި އެވެ.
ރައީސް ސައީދު ވިދާޅުވީ ގާނޫނު އަސާސީގެ ދަށުން މަޖިލިސް އުވާލަން ތަން ނުދޭ ކަމަށާއި އެހެންވެ 30 ދުވަހަށް މެދުކަނޑާލަން ނިންމެވީ ކަމަށެވެ. މިއީ ޓިއުނީޝިއާ އާއި ގައުމުގެ ރައްޔިތުން ސަލާމަތް ކުރަން އަޅަން މަޖުބޫރުވި ފިޔަވަޅެއް ކަމަށް ވިދާޅުވި އެވެ.
އޭގެ އިތުރުން އާ ސަރުކާރެއްގެ އެހީތެރިކަމާއެކު ވެރިކަން ހިންގުމުގެ ބާރު ނަންގަވާނެ ކަމަށައި އެ ސަރުކާރުގެ އެންމެ އިސްވެރިޔަކަށް ވާނީ ބޮޑު ވަޒީރުގެ ބަދަލުގައި ރައީސް ކަމަށް ވެސް ސައީދު ވިދާޅުވި އެވެ.
ނަމަވެސް ވެރިކަން ކުރާ ޕާޓީން ނެރުނު ބަޔާނެއްގައި ބުނީ މިއީ ބަގާވާތެއް ކަމަށެވެ. ބޮޑު ވަޒީރު މަގާމުން ވަކި ކުރުމުން އެމަނިކުފާނުގެ އޮފީހުން މިހާތަނަށް އަދި ވަކި އެއްޗެއް ބުނެފައެއް ނުވެ އެވެ.
