ކަންދަހާރް، އަފްގާނިސްތާން (ޖުލައި 25) - ތާލިބާނުންގެ ކުރީގެ މައި މަރުކަޒު، ކަންދަހާރުގައި ހަނގުރާމަ ވަރުގަދަކޮށްފައި ވާތީ، 22،000 އަށް ވުރެ ގިނަ އާއިލާއިން އެތަން ދޫކޮށް ހިނގައްޖެ އެވެ.
ތާލިބާނުންގެ ހަމަލާތައް ވަރުގަދަކޮށްފައިވާ މި ދަނޑިވަޅުގައި އެ ގްރޫޕުން ވަނީ މުހިއްމު ބޯޑަރުތައް ހުރަސްކުރާ ސަރަހައްދުތަކާއި، ޑިސްޓްރިކްޓުތައް ހިފައި، އަދި ޕްރޮވިންސް ވެރިރަށްތަކާ ކައިރިއަށް ޖެހިފަ އެވެ.
ތާލިބާނުންގެ ހަމަލާތައް ވަރުގަދަ ކުރީ މިދިޔަ މޭ މަހު އެމެރިކާ އާއި ނޭޓޯގެ ފައުޖުތައް އަފްގާނިސްތާން ދޫކޮށް ދާން ފެށުމުންނެވެ. މި އަހަރުގެ ސެޕްޓެމްބަރު 11 ގެ ކުރިން ބޭރު ސިފައިން އެ ގައުމުން ފައިބާނެ އެވެ.
"ހަނގުރާމައިގެ ސަބަބުން އެއް މަސް ތެރޭ ކަންދަހާރުގެ 22،000 އާއިލާއަށް ގެދޮރު ގެއްލި ރެފިއުޖީންނަށް ވެއްޖެ،" ޕްރޮވިންޝަލް ރެފިއުޖީ ޑިޕާޓްމަންޓުގެ ވެރިޔާ ދޯސްތް މުހައްމަދު ދަރްޔަބް އޭއެފްޕީއަށް ވިދާޅުވި އެވެ.
އާދީއްތަ ދުވަހު ވެސް ކަންދަހާރް ސިޓީ ވަށައިގެންވާ ސަރަހައްދުތަކުގައި ވަރުގަދައަށް ހަމަލާ ބަދަލުކުރި އެވެ.
ކަންދަހާރްގެ ކަމާ ބެހޭ ފަރާތްތަކުން ވަނީ ގެދޮރު ދޫކޮށް ދިޔަ ކަމަށް ބެލެވޭ 154،000 އަށް ވުރެ ގިނަ މީހުންނަށް ވަގުތީ ގޮތުން ތިބެވޭނެ ހަތަރު ކޭމްޕު ޖަހައިފަ އެވެ.
ބައެއް މީހުން ބުނީ ދޫކޮށްފައި ދިޔަ ގެތަކުގައި މިހާރު އުޅެނީ ތާލިބާނުން ކަމަށެވެ. ގެދޮރު ދޫކޮށް ގޮސް އާއިލާތަކަށް އުޅެން ޖެހިފައި ވަނީ ފާހާނަ ކުރެވޭނެ ގޮތެއް ވެސް ނެތް ތަންތަނުގަ އެވެ.
ބައެއް އާއްމުން ވަނީ ކުރިއަށް އޮތް ދުވަސްތަކުގައި ހަނގުރާމަ ވަރުގަދަ ވާނެ ކަމަށް ބެލެވޭތީ ކަންބޮޑުވުން ފާޅުކޮށްފަ އެވެ. ޖުމްލަ 650،000 ގެ އާބާދީއެއް އޮންނަ ކަންދަހާރަކީ ވެރިރަށް ކާބުލްއަށް ފަހު އަފްގާނިސްތާނުގައި ދެ ވަނަ އަށް އެންމެ ބޮޑު ސިޓީ އެވެ.
އެ ތަނަކީ 1996 އިން 2001 އަށް ތާލިބާނުން އަފްގާނިސްތާނުގައި ވެރިކަން ކުރިއިރު އެ މީހުންގެ މައި މަރުކަޒެވެ. ތާލިބާނަށް ވެރިކަން ގެއްލުނީ ސެޕްޓެމްބަރު 11، 2001 ގައި އަލް ގައިދާއިން އެމެރިކާގައި ދިން ހަމަލާތަކަށް ފަހު، އެމެރިކާ ސިފައިން އަފްގާނިސްތާނަށް އެރުމުންނެވެ.
އޭރުން ފެށިގެން މިއަދާ ހަމައަށް ވެސް ތާލިބާނުން އަންނަނީ އަލުން ވެރިކަން ހޯދުމުގެ ބޭނުމުގައި ހަނގުރާމަ ކުރަމުންނެވެ. ބޭރުގެ ސިފައިންގެ 95 ޕަސެންޓު އަފްގާނިސްތާނުން ގޮސްފައި ވާއިރު، އެ ގައުމުގެ 400 ޑިސްޓްރިކްޓެއްގެ ކޮންޓްރޯލް މިހާރު އޮތީ ތާލިބާނުންގެ އަތުގަ އެވެ.
