މުމްބާއި، އިންޑިއާ (ޖުލައި 25) - އިންޑިއާގެ ވިއްސާރަ މޫސުމުގައި ބޯކޮށް ވާރޭވެހި ހިނގި ފެންބޮޑުވުމުގެ ހާދިސާތަކާއި ބިންގަނޑު ކަނޑައިގެން ދިޔުމުގެ ހާދިސާތަކުގައި މަރުވި މީހުންގެ އަދަދު 127 އަށް އަރައިފި އެވެ.
އިންޑިއާގެ ހުޅަނގު އައްސޭރިފަށަށް ބުރާސްފަތު ދުވަހުން ފެށިގެން ދަނީ ވާރޭ ވެހެމުންނެވެ. އިންޑިއާގެ މިޓިއޮރޮލޮޖިކަލް ޑިޕާޓްމަންޓުން ވަނީ އަދިވެސް ދުވަސްތަކެއް ވަންދެން ހުއްޓުމެއް ނެތި ވާރޭ ވެހޭނެ ކަމުގެ އިންޒާރު ދީފަ އެވެ.
ވިއްސާރަ މޫސުމުގައި ފެންބޮޑުވެ، ބިންގަނޑު ކަނޑައިގެން ދިޔުން ފަދަ ކަންކަން އިންޑިއާގައި އާއްމު ގޮތެއްގައި ހިނގަ އެވެ. އޭގެ އިތުރުން ގިނަ ޒަމާންވެފައިވާ ބަލިކަށި އިމާރާތްތައް ވެސް, ވަރަށް ގިނައިން ބޯ ވިއްސާރައިގެ ސަބަބުން ވެއްޓެ އެވެ.
ތަޖުރިބާކާރުން ބުނާ ގޮތުގައި ވިއްސާރަ މޫސުމުގެ އަސަރު އަހަރުން އަހަރަށް ބާރުގަދަވެ، ދިގު މުއްދަތަށް ދެމިގެންދަނީ ދުނިޔެއަށް ދިމާވެފައިވާ މޫސުމީ ބަދަލުގެ މައްސަލައާ ހެދި އެވެ.
މިހާރު ކުރަމުންދާ ވިއްސާރައިގައި މަހަރާޝްތްރަ ސްޓޭޓުން އެކަނިވެސް 117 މީހަކު މަރުވެފައި ވެ އެވެ. ޗިޕްލުންގައި ގާތްގަނޑަކަށް 20 މީޓަރަށް ފެންބޮޑުވިއިރު، މިހާރު ވަނީ ފެންގަނޑު ހިނދެން ފަށައިފަ އެވެ. އެ ތަނުގެ ހޮސްޕިޓަލަކުން ކަރަންޓު ގޮސް، ވެންޓިލޭޓަރުގައި އޮތް ކޮވިޑް ބަލީގެ އަށް މީހަކު ވެސް މަރުވި އެވެ.
ގިނަ ބަޔަކު މަރުވެފައި ވާއިރު، އެތައް ސަތޭކަ ބަޔަކު ގެއްލިގެން ހޯދުމުގެ މަސައްކަތް އަދިވެސް ދަނީ ކުރަމުންނެވެ. ބައެއް ފަރާތްތަކުން ސިފަކުރާ ގޮތުގައި މިއީ 1982 ވަނަ އަހަރަށް ފަހު އިންޑިއާގައި އެންމެ ބޮޑަށް ފެންބޮޑުވި ފަހަރެވެ.
އިންޑިއަން އިންސްޓިޓިއުޓް އޮފް ޓްރޮޕިކަލް މިޓިއޮރޮލޮޖީގެ ކްލައިމެޓް ސައިންޓިސްޓް ރޮކްސީ މެތިއު ކޯލް ވިދާޅުވީ މޫސުމީ ބަދަލުގެ ސަބަބުން އަރަބި ކަނޑުގެ ލޮނުގަނޑު ހޫނުވަމުންދާ ކަމަށާއި އޭގެ ސަބަބުން ކަނޑުގެ މަތީގައިވާ ވައި ވެސް ހޫނުވާ ކަމަށެވެ.
ވައިގެ ހޫނުމިން އިތުރުވެ، ވިލާތައް އުފެދޭއިރު އޭގެ ތެރޭގައި ތެތްކަން ހިފަހައްޓާ ވަރު އިތުރު ކަމަށާއި އާދަޔާ ހިލާފަށް ބޯކޮށް ވާރޭ ވެހެން މެދުވެރިވަނީ އެހެންވެ ކަމަށް އޭނާ ވިދާޅުވި އެވެ.
