އައްމާން، އުރުދުން (ޖުލައި 25) - އުރުދުންގައި އުމުރުން 12 އަހަރުން މަތީގެ ކުދިންނަށް ކޮވިޑް ވެކްސިން ދޭން ނިންމައިފި އެވެ.
ހެލްތު މިނިސްޓްރީން ނެރުނު ބަޔާނެއްގައި ބުނީ އާދީއްތަ ދުވަހުން ފެށިގެން ކޮވިޑް ވެކްސިން ޖެހޭނެ އެންމެ ދަށް އުމުރަކީ 12 އަހަރުގެ ގޮތުގައި ކަނޑައަޅާ ކަމަށެވެ.
"ވެކްސިން ޖެހުމުގެ އިހްތިޔާރު ލިބޭއިރު، ބެލެނިވެރިއެއްގެ ހުއްދައާއެކު 18 އަހަރުން ދަށުގެ ކުދިންނަށް ޖަހާނީ ފައިޒާގެ ކޮވިޑް ވެކްސިން،" ބަޔާނުގައި ބުންޏެވެ.
ދިހަ މިލިއަނަށް ވުރެ ގިނަ މީހުން ދިރިއުޅޭ އުރުދުންގައި މިހާތަނަށް 763،900 މީހުންނަށް ކޮވިޑް ޖެހިފައި ވެ އެވެ. އޭގެ ތެރެއިން މަރުވީ 9،000 މީހުންނެވެ.
މިހާތަނަކަށް 1.9 މިލިއަން މީހުން ވެކްސިން ފުރިހަމަކޮށްފައި ވާއިރު، 2.7 މިލިއަން މީހުން ވަނީ އެއް ޑޯޒް ޖަހާފަ އެވެ.
އުމުރުން 12 އަހަރުން މަތީގެ ކުދިންނަށް އެމެރިކާ، ކެނެޑާ އަދި ޔޫރަޕުގައި މިހާރު ވެސް ފައިޒާ ވެކްސިން ދެ އެވެ.
މިދިޔަ މަހު އުރުދުން ސަރުކާރުން ބުނީ ކޮވިޑް ވެކްސިން 12 މިލިއަން ޑޯޒް ގަތުމުގެ އެއްބަސްވުމުގައި ސޮއިކޮށްފައިވާ ކަމަށާއި އިތުރު ފަސް މިލިއަން ޑޯޒް ގަންނަން ރާވާފައިވާ ކަމަށެވެ.
ފާއިތުވި ހަފްތާ ބަންދުގައި އެމެރިކާ ސަރުކާރުން ވަނީ އުރުދުންއަށް ބައި މިލިއަން ފައިޒާ ވެކްސިން ޑޯޒް ހަދިޔާކޮށްފަ އެވެ.
ވެކްސިން ޖެހުމަށް ބާރު އަޅަމުން ދާއިރު، ވެކްސިން ނުޖަހާ ފަރާތްތަކަށް ދަތިވާނެ ފަދަ ފިޔަވަޅުތައް ވެސް އުރުދުންގައި ދަނީ އަޅަމުންނެވެ.
އެގޮތުން ވަޒީފާ އަދާ ކުރާ މީހުން ވެކްސިން ނުޖަހާ ނަމަ ހަފްތާއަކު ދެ ފަހަރު ކޮވިޑަށް ޓެސްޓު ކުރަން ޖެހެ އެވެ. އޭގެ އިތުރުން ވެކްސިން ފުރިހަމަކޮށްފައި ނުވާ ބޭރު ރައްޔިތުންނަށް ވޯކް ވިސާ އާއި ރެޒިޑެންސީ ވިސާ އާ ނުކޮށްދެ އެވެ.
