މެންޗެސްޓާ (ޖުލައި 25) - މެންޗެސްޓާ ޔުނައިޓެޑްގެ ކޯޗު އޮލެ ގުނަ ސޯލްޝެއާގެ ކޮންޓްރެކްޓް އެ ކްލަބުން އިތުރު ތިން އަހަރަށް އާ ކޮށްފި އެވެ.
އުމުރުން 48 އަހަރުގެ ސޯލްޝެއާ ޔުނައިޓެޑްގެ ކޯޗުކަމާ ހަވާލުވީ 2018 ވަނަ އަހަރުގެ ޑިސެމްބަރު މަހު ހޯސޭ މޮރީނިއޯ ވަކިކޮށް ވަގުތީ އެއްބަސްވުމެއްގެ ދަށުންނެވެ. ވަގުތީ ކޮންޓްރެކްޓެއްގައި ތިން މަސް ދުވަސް ހޭދަކުރިއިރު، ސޯލްޝެއާގެ ކޯޗުކަމުގައި ޔުނައިޓެޑުން ނެރުނު ނަތީޖާ ރަނގަޅުވުމުން އެ ޓީމުން އޭނާ އަށް ދާއިމީ އެއްބަސްވުމެއް ދިނެވެ. އެ ފަހަރު އޭނާ ސޮއިކުރީ ތިން އަހަރުގެ އެއްބަސްވުމެއްގަ އެވެ.
ޔުނައިޓެޑުން އިއްޔެ ސޯލްޝެއާއާ އެކު ސޮއިކުރި އެއްބަސްވުން ހަަމަވާނީ 2024 ވަަނަ އަހަރު އެވެ.
މިދިޔަ ސީޒަނުގެ އިނގިރޭސި ޕްރިމިއާ ލީގުގެ ދެ ވަނަ އަށް ދިޔަ ޔުނައިޓެޑް ވަނީ ޔޫރޮޕާ ލީގުގެ ފައިނަލުގައި ވިޔަރެއާލް އަތުން ޕެނަލްޓީ ޖަހައިގެން ބަލިވެފަ އެވެ.
ޔުނައިޓެޑްގެ އެގްޒެކްޓިވް ވައިސް ޗެއާމަން އެޑް ވުޑްވާޑް ވިދާޅުވީ ސޯލްޝެއާގެ ކޮންޓްރެކްޓް އާ ކުރަން ނިންމި އެންމެ ބޮޑު ސަބަބަކީ އޭނާ ހަވާލުވި ފަހުން އެ ޓީމުން ހޯދަމުން އަންނަ ކުރިއެރުންތައް ކަމަށެވެ.
"ދުރު މުސްތަގުބަލަކަށް ބަލާއިރު އޮލެ އެ ކުރާ މަސައްކަތް ވަރަށް ރަނގަޅު. އެއީ ކޮންޓްރެކްޓް އާ ކުރުމުގެ އެންމެ ބޮޑު ބޭނުމަކީ. ސޯލްޝެއާގެ ކޯޗުކަމުގައި އަހަރެމެން ބޭނުންވާ ކަންތައް ހާސިލްކުރެވޭނެ،" ވުޑްވާޑް ވިދާޅުވި އެވެ.
ސޯލްޝެއާ ބުނީ އޭނާ ކުރާ މަސައްކަތުގައި މެނޭޖްމަންޓުގެ އެއްބާރުލުން ލިބޭ ކަމުގެ އެއް ހެއްކަކީ ކޮންޓްރެކްޓް އާ ކުރުން ކަމަށާއި އުއްމީދަކީ ކުރިއަށް އޮތް ސީޒަނުގައި ކާމިޔާބީ އެއް ހޯދުން ކަމަށެވެ.
ޔުނައިޓެޑްގެ ކޯޗުކަމުން 2013 ވަނަ އަހަރު އެލެކްސް ފާގަަސަން ވަކިވި ފަހުން އެ ޓީމަށް އަދި ލީގެއް ކާމިޔާބު ނުކުރެވެ އެވެ. ސޯލްޝެއާ އަކީ ފާގަސަން އަށް ފަހު ޔުނައިޓެޑާ ދާއިމީ ކޮންޓްރެކްޓެއްގައި ހަވާލުވި ހަތަރު ވަނަ ކޯޗެވެ. ޔުނައިޓެޑުން އެންމެ ފަހުން ތަށްޓެއް އުފުލާލީ 2017 ވަނަ އަހަރު އެވެ. އެއީ މޮރީނިއޯގެ ކޯޗުކަމުގައި ކާމިޔާބުކުރި ޔޫރޮޕާ ލީގެވެ.
