ބެންކޮކް، ތައިލޭންޑް (ޖުލައި 24) - ކޮވިޑް ބަލިމަޑުކަމުގައި މި ވަގުތު އެންމެ ހާލަތު ގޯސް ދެކުނު އިރުމަތީ އޭޝިއާއަށް އިތުރު ވެކްސިން ފޯރުކޮށްދެވޭނެ ގޮތްތައް ބަލަމުންދާ ކަމަށް އެސްޓްރަޒެނެކާ ކުންފުނިން ބުނެފި އެވެ.
އިނގިރޭސި ވިލާތާއި ސްވިޑަންއަށް ނިސްބަތްވާ ކުންފުނީގެ ކޮވިޑް ވެކްސިން މިހާރު ވެސް ތައިލޭންޑުގައި އުފައްދަ އެވެ. އެ ވެކްސިން ސަޕްލައި ކުރަނީ ތައިލޭންޑާއި ކައިރި އެހެން ގައުމުތަކަށެވެ.
ނަމަވެސް ހާލަތު ގޯސްވި ވަގުތު، ތައިލޭންޑަށް ވަނީ ވެކްސިންގެ ދަތިކަން ކުރިމަތިވެފަ އެވެ. އެހެންވެ ގިނަ ބަޔަކު ދަނީ ބޮޑު ވަޒީރު ޕްރަޔުތް ޗަން އޮޗާއަށް ފާޑުކިޔަމުންނެވެ.
ތައިލޭންޑުގެ ކަމާ ބެހޭ ފަރާތްތަކާއި އެސްޓްރަޒެނެކާއާ ދެމެދު ސޮއިކޮށްފައިވާ އެއްބަސްވުމުގައިވާ ގޮތުން އެ ގައުމުގައި ވެކްސިންގެ 180 މިލިއަން ޑޯޒް އުފައްދާނެ އެވެ. އޭގެ ތެރެއިން ތިން ބައިކޮށްފައި އެއް ބައި ހާއްސަ ކުރާނީ ތައިލޭންޑަށެވެ. އަދި ބާކީ ޑޯޒްތައް އެކްސްޕޯޓް ކުރާނީ އެވެ.
ތައިލޭންޑުގައި ހުންނަ އެސްޓްރަޒެނެކާގެ މަންދޫބު ޖޭމްސް ޓީގް ވިދާޅުވީ ޖުލައި މަސް ނިމޭއިރު، އެ ކުންފުނިން ތައިލޭންޑަށް 11.3 މިލިއަން ޑޯޒް ފޯރުކޮށްދޭނެ ކަމަށެވެ. ނަމަވެސް މިހާތަނަށް ވެކްސިން އެކްސްޕޯޓް ކުރަން ފަށާފައެއް ނުވެ އެވެ.
"އަޅުގަނޑުމެން މަސައްކަތް ކުރަމުން ދަނީ އެންމެ އަވަސް ދުވެލީގައި. އެކަމަކު ޑެލްޓާ ވޭރިއެންޓުގެ ސަބަބުން، އަޅުގަނޑުމެން މި ދަނީ އިތުރަށް ސަޕްލައިގެ ދުވެލި އަވަސް ކުރުމަށް ހުރިހާ ގަލެއް ވެސް ފުރޮޅަމުން،" ތައިލޭންޑް ރައްޔިތުންނަށް ޓީގް ފޮނުއްވި ހުޅުވާލާފައިވާ ސިޓީއެއްގައި ވިދާޅުވި އެވެ.
"އޭގެ އިތުރުން ދުނިޔޭގެ އެކި ހިސާބުތަކުގައިވާ 20 އަށް ވުރެ ގިނަ ސަޕްލައި ޗެއިން މެދުވެރިކޮށް، ތައިލޭންޑް ހިމެނޭ ގޮތަށް، ދެކުނު އިރުމަތީ އޭޝިއާއަށް އިތުރު ވެކްސިން ފޯރުކޮށްދެވޭތޯ ވެސް މި ދަނީ ބަލަމުން".
އޭނާ ވިދާޅުވީ މުޅި ދުނިޔެއަށް ވެސް ވެކްސިންގެ ދަތިކަން ކުރިމަތިވެފައި ވާއިރު، ވެކްސިން އުފައްދަން ބޭނުންވާ ތަކެތި ލިބުމުގައި ވެސް ދަތިކަން އެބަ ހުރި ކަމަށެވެ. ބޭނުންވާ ސްޕީޑުގައި ސަޕްލައި ފޯރުކޮށްނުދެވޭ ސަބަބަކީ އެއީ ކަމަށް ޓީގް ފާހަގަކުރެއްވި އެވެ.
ތައިލޭންޑުގައި އެސްޓްރަޒެނެކާ ވެކްސިން އުފައްދަން ޕްރޮޖެކްޓު މިދިޔަ އަހަރު ހަވާލުކުރީ ރަސްގެފާނު މަހާ ވަޖިރަލޮންގްކޯންގެ ސިއާމް ބަޔޯސައިންސް ކުންފުންޏަށެވެ. އެއީ މީގެ ކުރިން ދުވަހަކު ވެސް ވެކްސިން އުފައްދާފައިވާ ކުންފުންޏެއް ނޫނެވެ.
ސިއާމް ބަޔޯސައިންސުން ތައިލޭންޑުގައި އެސްޓްރަޒެނެކާ ވެކްސިން އުފައްދަނީ އެ ސަރަހައްދުގެ ނުވަ ގައުމަކަށެވެ. އޭގެ ތެރޭގައި ހިމެނެނީ ތައިލޭންޑު، އިންޑޮނީޝިއާ، ފިލިޕީންސް އަދި މެލޭޝިއާ އެވެ. ވެކްސިން ނުލިބޭ މައްސަލާގައި އެ ކުންފުނިން މިހާތަނަށް އެއްޗެއް ނުބުނެ އެވެ.
ތައިލޭންޑުން ވަނީ ވެކްސިން ސްޓްރެޓެޖީ ބަދަލުކޮށް ޗައިނާއިން އެތައް މިލިއަން ޑޯޒެއް އިމްޕޯޓްކޮށްފަ އެވެ. އެކަމަކު މިހާތަނަށް ވެކްސިން ފުރިހަމަކޮށްފައި ވަނީ 70 މިލިއަން މީހުންގެ ތެރެއިން އެންމެ ފަސް ޕަސެންޓެވެ.
ވެކްސިން މައްސަލާގައި ހިތްހަމަނުޖެހުނު ނަމަވެސް، ތައިލޭންޑުގެ ގިނަ މީހުން ޝުއޫރު ފާޅުކުރަން ބިރު ގަނެ އެވެ. އެއީ ރަސްގެފާނަށް އަމާޒުވާ ގޮތަށް ފާޑުކިޔައިފި ނަމަ 15 އަހަރުގެ ޖަލު ހުކުމެއް އައުން އެކަށީގެންވާތީ އެވެ.
